عنوان الموضوع : الله أكبر تعرفين شو يعني ام
مقدم من طرف منتديات الضمير العربي

السلام عليكم خواتي قريت موضوع في المنتدى و مت قهر و كله ضد أم الزوج يزعلن ادا الريل طلع أمه معاه و حرمته وياه و يزعلن لو الأم تتصل في ولدها تطمن عليه ادا رجع البيت أو لا و يموتن قهر بلو الريل عطى أمه فلوس وحدة تقول عمي موجود ليش تاخد من ريلي لا واللي تقول خل ريلج ادا سألته وين رايح ما يجاوبها و يختصر الكلام الله أكبر كلام يغيظ و يقهرر مب جنه هالحرمة أمه اللي عطتج ظناها مب هي اللي كبرت و سهرت لين ما استوى ريال شو تتحرين ريلج ملكج محد ليه حق عليه غيرج خير ان شاء الله هدي أم تعرفون شو يعني ام الله سبحانه و رسوله عليه السلام وصانا فيها ميتة قهر من اللي قريته

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
يزاج الله خير الغلا ع التنبيه وفميزان حسناتج .صدق كله ولا الأم . صح الزوجة لها اهتمامها لكن الأم هي الاول والاخير هي الجنة وهي كل شي ..الله يهدي كل أم لمرة ولدها والله يهدي كل زوجة لعمتها

__________________________________________________ __________

>>>> الرد الثاني :
اذكري الله اختي .. والله يهديهن ترى ياخواتي كما تدين تدان..الله يصلح الحال

__________________________________________________ __________

>>>> الرد الثالث :
يزاج الله خير يا اختي وكلامج صحيح 100 % وكلنا عندنا أولاد وما نرضى ان اولادنا على تالي العمر يهملونا بعد ما ربيناهم وسهرنا وتعبنا عليهم

__________________________________________________ __________

>>>> الرد الرابع :
خواتي ترى ام الزوج في صوب والزوجة في صوب
يعني ام الزوج مالها تتدخل بحياة حرمة ولدها والزوجة مالها تتدخل في بر الولد لامه لكن ان حثته فلها الاجر
والموضوع كله يعتمد على الزوج نفسه لان هو الي واجبه يبر امه وفي نفس الوقت ما يقصر بحقوق زوجته
خلونا واقعين في امهات يتدخل بطريقة مالهن حق فيها
وفي حريم عيال يكونن سبب عقوق الزوج لاهله
يعني المسؤلية على عاتق الزوج هو لازم يعطي كل ذي حق حقه ويعرف متى يوقف حرمته عند حدها

__________________________________________________ __________

>>>> الرد الخامس :
فيه حريم الله يهديهن عندهن حب التملك يعني انت زوجي خلاص ما تتعامل مع امك او خواتك وتلاقيها تعصب او تتنرفز اذا اسالو عن زوجهاا
وتقعد تبعده شوي شوي عن اهله ..هالنوع من الحريم مب صاحي السموحة يعني ..

هذا قبل لا يكون ريلج هذيج امه والثانية اخته وعمته و وو

ما ادري هالحريم متى بيفهمون الوضع صح !!