عنوان الموضوع : كيف تهتمين وشو تلبسين وشو تحطين { إقتراحات . صور . أفكار . نصايح } ؟ لتربية طفلك
مقدم من طرف منتديات الضمير العربي

السلام عليكم خواتي






،

بعيداً عن المشاكل والسلبيات خلونا نعرف شو تلبسن أنتن كـ معرسات
وأمهات فالبيت ؟ كيف تفضلين شكلج يطلع جدام ريلج وعيالج ؟

ولا أنتي من النوع الي ما يهتم وايد وبس جلابية بيت ؟

تحبين تفاجئين ريلج بحناج بدون مناسبة ؟ تغيرين ستايلج بين فترة وفترة ؟

شو ستايلج فالبيت ؟ لبسج شعرج مكياجج !

شو إهتماماتج للجسم ؟ وشو الكريمات والسكرابز الي تستخدمينهم ؟

عندج خلطات أو زيوت معينة خصوصاً للشعر ؟

كيف تهتمين في راحة جسمج ؟ تسوين مساج ؟ وشو أحلى نوع مساج جربتيه ؟

[ طبعا كل هالأسئلة بتفيد خواتنا المتزوجات والعرايس والمقبلات .. ولو تلاحظن القسم يفتقر
هالنوعية من المواضيع .. وخلنا نكون تجمع جميل ومفيد يشمل كل هالأفكار ]

والي تحب تشارك تحط صور لأن ما ينفع كلام وبس ! كل ما كانت المشاركات بالصور كل ما كان أفيد


همسة: مع كل مشاركة كل وحدة تكتب نصيحة بسيطة للمتزوجات و العرايس والمقبلات عالزواج
، سواء حديث أو حكمة أو خبرة أو آية { اللي حابة ولها الاجر }



أتمنى ما تستخسرن بالمشاركة لأن فالنهاية لمصلحتنا !!!




نبدأ

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
قلتي جلابية والشعر 24 ساعه ملفوووف

البنات اخبر بهذي السوالف كاامهات ماعندنا وقت

استخدم زيت الورد لمنع تجاعيد العين+زيت اللوز المر..

كل فترة اغير من قصة شعري ...<<ماحبببه خخخ

ونسوي ليزر للشعر جدا ممتاز انصحكم بنات وحريم

ومنكم نستفيد ,,بعدين بنزل صور

__________________________________________________ __________

>>>> الرد الثاني :
مشكورة فاطمة على الموضوع الحياة حلوة لما نحن نخليها حلوة بعد التوكل على الله والرضى بالمكتوب
عودت نفسي من قبل العرس اني اكشخ لكن بعد اول ولادة تعبت وايد وما كان لي نفس اسوي شي
والحمدالله الحين هذي ثالث ولادة وبالعكس صرت احب اكشخ واتعدل لنفسي واعدل عيالي معاي
الحنا ما اتحنى لانه عيالي ما يحبون ياكلون من ايدي من يشمون ريحة الحنا يرجعوا فبس اتحنى في المناسبات او خفيف على طرف الايد
الويه استخدم غسول ماريا جالاند والبيس من بودي شوب فيتامين سي لونه برتقالي وللوشن من فيكتوريا سيكرت وياس وانفاسك وبودي شوب وماركس اند سبنسر و الصوابين احيانا استخدم جونسون او سيباميد او من المحلات مع الكوليكشن
السكراب ملح الحليب
الماسكات روب او حليب وجبن او خيار للعيون او نشا مع ماي ورد او ورق الشاي
للتشققات زيت الزيتون او زيت اللوز مع الرياضه
والشعر







__________________________________________________ __________

>>>> الرد الثالث :
تبغين الصدق انا قبل وايد اكشخ
بس من ربيت و يبت عيال اتوووهق وايد بس هذا ما يمنع

اني مرة في الاسبوع تلقيني فجأة متمكيجة و لابسة دريس ولا ميني جلابية و يالسة بكشختي و متبخرة
وكل مناسبة اتحنى و افصل فستان و جي مثلا يوم زواجي يوم ميلاده يوم خطبتنا يعني متذكرة كل مناسبة و اتريى الفرصة عسب اسويها مناسبة و افر اليهال عند اهلي
مرات احسه يشك يقول لي وين بتطلعين يحليله يغمضني

بالنسبة لاهتمامي في جسمي و ويهي و شعري الحمد الله وايييييييييييييييد اهتم فيني هوس :

بالنسبة للشعر .. كل 6 شهور تقريبا اصبغ شعري و محافظة عليه .. بديت بالبني الغامج عقب الجوكليت عقب الاشقر عقب الكستنائي
بالنسبة للويه ... كل فترة امر العيادة اتسمكر ... تقشير لويهي مثلا او ليزر او بوتكس لخطوط يبهتي لان عندي تجاعيد خفيفة
بالنسبة للجسم .. حاليا احاول اسوي رجيم و مسجلة ف جم ... مع اني كنت مخططة اسوي شفط بس تراجعت لان ابغي احمل عقب سنتين و ما شي فايدة من الشفط
و ان شاء الله عقب ما اخلص الرجيم و احس اني نزلت شوي بسوي LPG او مساج كل اسبوع عسب تخف شوي الخطوط و التمدد ف الجسم و يرتب الجسم ..
اسوي حمام مغربي مرة كل شهرين ... و طبعا السمكرة المعتادة مرة كل شهر ف الصالون

احلى شي فيني ان جسمي صافي ما فيني ولا نتفة شعر و ناعم بسبة الليزر لان صار لي 6 سنوات اسوي و الحمد الله خلاص ما يطلع خير شر
نصيحة سووى ليزر و ارتاحوا خاصة اللي فيها شعر

__________________________________________________ __________

>>>> الرد الرابع :
انا عندي ليزر منزلي.. لشعر .. والحمدالله الشعر خفيف
صبغت شعري 3 الوان .. روعة كان لكن بعد اسبوعين تقصف + تساقط مب طبيعي
الحين حامل ما البس غير جلابية .. والشعر مرفوع


للاسف

__________________________________________________ __________

>>>> الرد الخامس :
شوفي فاطمة، يختلف من وحدة لوحدة حسب الظروف، يعني ما اعتقد ان في حرمة في العالم ما تحب تكون دايما حلوه و مرتبه خاصة اذا كانت معرسة.

بس الموظفة مثل حالاتي يكون صعب عليها تسوي كل اللي تتمناه.

بالنسبة لي بما اني موظفة، لمن اوصل البيت اكون مهلكة و من فترة كنت صراحة وايد مهملة لان بنوتي آخر العنقود كانت وايد صغيرة لكن الحين الحمدلله كبرت شوي و استوى عمرها سنتين.

اول ما اوصل البيت ، انظف بشرتي بمناديل تنظيف و بعدين استخدم غسول مضاد للأكسده و بعدين احط ماي ورد على بشرتي و اصلي العصر.

البس روبات بيت واايد سمبل عشان اكون مرتاحة و احيانا احط رشة عطر وحدة بس "لان بنوتي عندها الربو"
بالنسبة لشعري كل 45 يوم اصبغة بسبب الشعر الابيض ، بس استخدم صبغات البيت الخفيفة، لاني اخاف عليه من صبغات الصالونات القوية المركزة.

من فترة مريت العيادة و سويت ابر بوتكس و فلر و الحمدلله النتيجة كانت جيدة و الكل لاحظ الفرق و دايما اشتري كريمات انوع احيانا من باريس جاليري و احيانا من بودي شوب و احيانا من الصيدلية.

بس بالرغم من هذا احسن اني وايد مهملة بنفسي و ممكن اظهر بصورة اجمل بس ما احب اني اهمل ببناتي على حساب جمالي و شكلي.

وقت السبوح استخدم ملح الحليب و غسول جونسون و بعدين ادلك بشرتي بزيت اطفال للنعومة بعدين احيانا احط قناع الطين او قناع من the face shop واحب اسوي منكير و بدكير لاظافري احيانا احط الالوان الجديدة مثل السماوي او البنفسجي الفاتح.

و هذا كل اللي اذكره الحين، ثانكس ع الموضوع الحلو