عنوان الموضوع : ( أبا أتزوج ).. ممكن أفضفض معاكم شوي لسعادتك
مقدم من طرف منتديات الضمير العربي

السلام عليكم خواتي وصديقاتي....
أبا أكتب موضوع وموضوع جداً مهم بالنسبة لي ولغيري من البنات، اتمنى إن تفهمونه وتحسون باللي نحس فيه، يمكن هذا الموضوع إنكتب أكثر من مرة في المنتدى، وكل وحده تكتب وتفضفض وأكيد تسمع منكم الكلام الحلو اللي يريحها ويعطيها دافع للحياة يزاكم الله خير أولاً وأخيراً. بدخل في الموضوع على طول الصراحه...... أمنيتي إن أتزوج...... بس لحظة لا تقولون عيب تقولينها ولا تقولون عاداتنا وتقاليدنا ما تسمح إن نفضفض ونقول اللي بخاطرنا لا تقولون منقود البنية تقول تبا تزوج..

الزواج صار مطلب مهم وستر للبنت والشاب، الحمدلله نحن مستورات فبيت أبونا بس أمج وأبوج لين متى بيتمون عندج! والله الفتن زادت والحمدلله نحن محافظين على نفسنا وماشين عالصراط المستقيم لا نشوف يمين ولا يسار والحمدلله ولا شعرة تطلع ولا نرقد في المولات ولا مواكبين الموضه والنيو لوك بس والله يوم نسير أعراس نتمنى إن نكون مكان العروس ونتمنى وايد أشياء حلوة. ترى هذي فطرة في الإنسان إن يميل للجنس الثاني إن يفكر بالزواج والعيال.

لا تتحرون إن أبا أتزوج عشان المظاهر والكماليات والمفاخر والزهبة والسفر (مع احترامي للجميع)، لا أبا أتزوج عشان الإستقرار وعشان السند وعشان الراحه النفسية وعشان الأسرة والعيال.. محد ينكر إن الزواج له إيجابيات كثيرة ومحد ينكر إن حياة البنية بعد الزواج تتغير للأفضل والأحسن.

أنا مب حاطه فبالي إن الزواج كل شي في الحياة، هي بس تكون إضافة حلوة للبنت وحياة يديدة لها ومسؤولية وحقوق وغيره، ممكن بعض البنات يردون علي ويقولون (ليس كل ما يتمناه المرء يدركه تجري الرياح بما لا تشتهي السفن) ويمكن يقولون الزواج مب حلو ونحن جربنا ويمكن في مشاكل ويمكن ويمكن لكن أنا عندي قناعه إن الإنسان يتفاءل بالخير ويؤمن بقضاء الله وقدره ويدري إن الله بيكتب له الخير وين ما كان والحياة الزوجية ما تخلوا من المشاكل واختلاف الاراء وغيره.

الحمدلله يوني 20 خاطب أظن ما شاء الله خلال 5 سنين لكن سبحان الله ما في نصيب لازم يطلع فيهم شيء وأحياناً اهلي ما يوافقون وأحياناً يكون الرفض مني وأحياناً الخطاطيب يتكلمون في الموضوع وعقب ينسونه ويروحون من غير ما يردون علينا خبر.. والحمدلله نحن مب من النوع اللي يحط شروط طويلة وعريضة ونرفض على أي شي بس سبحان الله، الله مب رايد إن الفرحة تكتمل والحمدلله الخير فيما اختاره الله.

البنية اللي مجربه مواضيع الخطبة بتفهم إحساسي يعني مثلاً يوم وحده تتصل في أمي وتخبرها إن في حد يبا يخطبني أقول في نفسي يالله هالمرة صدق بتزوج بس سبحان الله ما في نصيب.

الصراحه مليت من هالموضوع، لدرجة إن كلمت خطابه معروفه ولو ذكرت اسمها بتعرفونها أكيد وفعلاً بعد أسبوع اتصلت فيني وأنا كنت هذاك اليوم تعبانه وراقده من وقت، رديت عليها اليوم الثاني جان تقولي كنت يايبتلج واحد بس يوم ما رديتي كلمت وحده ثانيه وفي موافقة مبدئية. أنا ما تضايجت الحمدلله لأن قلت هذا مب نصيبي لأن نصيبي مستحيل يآخذه غيري، وقلتلها خلاص سكري ملفي ورب العالمين مب رايد إن أكلم خطابة.

الحمدلله علاقتي بربي قوية وثقتي فيه كبيرة وأنا ما بمدح نفسي بس أدري إن ربي بيكتب لي الزواج بشخص مثلي واللي دقوا الباب ما كانوا مناسبين لي ولا أنا اناسبهم أكيد، تعرفون يمكن 5 مرات أكون يالسه في مكان مثلاً عيادة أو أحضر عرس أو فالسفر إيوني حريم ييلسون احذالي ويقولون لي أنتي بنت منو وياخذون كل التفاصيل ويقولون ترا نحن بنييكم وعقب ما ايون ولا يتصلون حتى مرتين في حريم متصلين في امي وما تعرفهم يقولولها بنتج فلانج مخطوبة ترا هي عايبتنه وشايفينها ونحن نبا نزوركم؟؟ أمي تقول لهم حياكم الله بس عقب ما يزورونه ما أعرف ليش يختفون!!

ففريجنا شي 3 حريم قبل 3 سنين وحده قالت تبا تخطبني حق ولدها والثانية ردت عليها إن تباني حق ولد أختها وهذاك اليوم كنا يالسين في ميلس الحريم أيام رمضان، أنا تميت ساكته ومبتسمه وبعدها بسنه الاولى خطبت حق ولدها والثانية طرشت لنا بطاقة عرس ولد اختها، بعد سنة حرمت الأول حملت ويابت ولد وصارت مشاكل بينهم وكنا يالسين في ميلس الحريم وطبعاً أسرار البيوت كلها تنقال وعلى لسان الحريم الله يهديهم المهم وحده منهم قالت ليش ما خطبتوا فلانه حق فلان هم يقصدون أنا حق اللي تزوج وبينه وبين حرمته مشاكل وكل وحده تعق اللوم على الثانية وحده تقول هيه والله والثانية تقول خسرناها، الصراحه أنا تضايجت قلت ليش يرمسون ويطيروني في السماء وعقب يدقوني بالأرض.

بإختصار أنا تعبت نفسياً وأبا آخذ رايكم في مكاتب الزواج الشرعي.؟ هم مكتبين وحيدين في الدولة عندهم ترخيص من وزارة الشؤون الإجتماعيه وهم الأثنين يشتغلون فيه أكثر من 15 حرمه مواطنة وكلهم كبار يعني أمهات وفاهمين وواعين وملتزمين أظن كانوا يشتغلون في التربية وتقاعدوا.. الحلو إن مستحيل يوافقون على اي طلب من الشباب إلا وهم عارفين منو هو وياخذون رقم الجواز والإثباتات وحسن السيرة والسلوك يعني شغلهم وايد نظيف ومطمئن وشغلهم حكومي وعندهم ترخيص يعني مب مثل الخطابات العاديات.

لا تقولون اشغلي بالج بربيعاتج، ربيعاتي كلهم عرسوا ونسوني حتى اتصال ما يتصلون وإذا أنا اتصلت ما نكمل 5 دقايق إلا ويقولون الحين بطلع مع ريلي ويوم اكون فبيوتهم وأنا يالسه يتصلون فريايلهم ويسولفون ويضحكون أحس عمري غلط، يوم أقولهم تعالوا بيتنا يقولون نحن كبار الحين يقصدون معرسات وعيب ايون لازم أنا العزابية أسير لهم مع إنه كلنا صغار وبعدنا فالعشرين!

لكن يوم تستوي مشاكل بينهم وبين ريايلهم يتصلون فلانة خبرينه شو نسوي فلانه تضاربت وياه وحتى يوم وحده منهم ربت بالبجر سرت لها المستشفى وتميت معاها 3 ايام أنا أشل ولدها وأهتم فيه وانا انظفه وانا البسه وانا اقمطه وأمها وحليلها تحبني مثل ما أنا أحبها ما تخلي حد يشله غيري كانت ربيعتي مسويه قيصريه وتعبت شوي وامها حرمة عوده والحمدلله أنا أحب الصغارية وايد وأعرف لهم. حتى بعد ما طلعت من المستشفى كنت ازورها فالبيت وكانت تعطيني البيبي وتسير ترقد عادي 4 ساعات 6 ساعات. والحين لا تتصل ولا تسلم ولا اطرش مسج اسويلها تيلفون ما ابا أعرف اخبارها بس ابا اسأل عن ولدها عن الولد اللي اهتميت فيه بس ما ترد الحين من شهرين. المهم خلونا من سوالف ربيعاتي الله يسامحهم وخبروني شو رايكم في المكاتب الشرعيه للزواج؟؟

اتمنى اقرأ ردود حلوة وشي يدفعني للأمام وهذا نك يديد وأنا عندي نك جديم بس ما حبيت أكتب المشكلة فيه واسفه عالفضفضة

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
صح كلامج ..الزواج ستر للبنت ..

الله يرزقج ويرزق بنات المسلمين اجمعين يارب ^_____^

__________________________________________________ __________

>>>> الرد الثاني :
ما قول الله يرزقج الزوج الصالح يارب ..

و يرزق كل البنات ..



آمين ..

__________________________________________________ __________

>>>> الرد الثالث :
السلام عليكم ورحمة الله وبركاته


بصراحه اختي كلامج صح ميه فالميه وبالعكس مافيها شي لو الوحده قالت تبا تعرس كل البنات يبون يعرسون مافي اي عيب وًحلو الواحد يفضفض بدال مايكتم بقلبه


واختي دامج بعدج صغيره بالعشرين خليج من سوالف الخطابات والمكاتب يعني صبري


ليش ماتعدعين انا سمعت عن بنات كانو يدعون ويستغفرون ماكملو شهور ونخطبو


واذا تبين بيبلج هالدعاء وحاولي تستغفرين فاليوم ١٠٠٠ مره صدقني ربي مابيخيب ظنج

جربي لمدة خمس شهور


الله يرزقج بالريال اللي تتمنينه

والله يرزق الكل

__________________________________________________ __________

>>>> الرد الرابع :
الله يويفقج في حياتج حبيبتي وتحصلين اللي يستاهلج ويقدرج ..

لكن بخصوص المكاتب ماعندي فكره ان شاء الله البنات بيفيدونج

__________________________________________________ __________

>>>> الرد الخامس :
السلام عليكم ورحمة الله وبركاته
(المال والبنون زينت الحياة الدنيا )
عليج بسورة البقره وايد بنات سمعت انهن تأخرن فالزواج وداومن على قرايت سورة البقره بنيت ان الله يرزقهن ولد الحلال وبالفعل الله وفقهن وتزوجن
والله يرزقج ولد الحلال ويرزق جميع بنات المسلمين
اللهم امين