عنوان الموضوع : أستحي من نفسي أبغي إجابات على هالأسئلة السخيفة والمحرجة من الناس لسعادة الزوجية
مقدم من طرف منتديات الضمير العربي
مثل ما قريتو في العنوان الناس مب مخليني في حالي من هالأسئلة المحرجة وبخاصة إني في شغلي وفي حياتي اليومية أسير نادي رياضي وأقابل حريم من جنسيات مختلفة فيهم العربية والآسيوية والفلبينية وتعبت من هالاسئلة اللي مالها إجابة، مثلا فلانة انتي ليش ماتعرسين أو متى بتتزوجين أو كم عمرج وانا ماحب أقول عمري لحد لان في نص الثلاثينات وأستحي والله لان ينصدمون شكلي أصغر من سني ويوم يعرفون أحس البعض ينصدم ويزعل ويخوفوني يحسسوني اني في خطر وان راحت علي واني لازم اسوي شي واتحرك، وانا مابيدي شي هذا رزق من رب العالمين، ومع ان انا مالي خص فيهم قمت أكذب وأصغر نفسي بس في بعض الأماكن مضطرة والله اني اطلع بطاقتي الأصلية سواء فعيادة أو في نادي يوم تبين تشتركين ويسون نفسهم يبون ينصحوني اني أسير وأدور لنفسي زوج شو بقولهم يعني ؟ ما يعرفون ان عيب اسير أدور ريال ولا يتحروني مثلهم اني مثلا بتعرف وبصادق وبيي بياخذني على طول ؟ هم مب فاهمين هالمجتمع يتحرون ان لي حرية هالشي والبعض يقول حرام عليج سيري كلمي أهلج يدورولج والله تعبت وانا أسمع هالكلام لان يضايقني أعرف ان نصيب من الله، بس انا ماحب حد يقولي هالكلام أحس بإحراج والله قمت مافكر في الزواج إلا عشان الناس تسكت وتخليني في حالي أقول على الأقل لو الوحدة تعرس تسكت ألسنة الناس من الأذية، قمت أشوف المطلقة أهون على الأقل لو حد أذاني بالكلام بقولهم تراني عرست وخلاص وما توفقت ولا اني أتم جي عرضة لكلام الناس وأسئلتهم السخيفة، عاد انا منقهرة لان البارحة وحدة موظفة تقوللي مس فلانة أنتي متى بتتزوجين طالعتها بنظرة وقلت ليش هو بكيفي؟ انتي تعرفين متى بنفسج بتتزوجين؟ قالت لا بس أنا على الأقل أدور لي، فقلتلها وانا نفس الشي (علما بأن مب صح لاني طبعا مارضي لنفسي وكرامتي)، فقلتلها وشو سبب هالسؤال قالتلي لا بس لاني لاحظت ان شكلج حلو وغيرج اقل منج بوايد ومعرسات وحرام تضيعين وقتج بدون ما تعرسين! يعني شو تبوني أسوي بنفسي اسير في الشارع مثلا أدور ريال شو هالناس حشا؟ وبعدين في شي طالع يديد عند الأجانب (غير العرب) من الجنسيات الأسيوية والأوربية يوم بيقولوج فلانة أنتي عندج بوي فريند؟ شو اقولهم هايلا معقولة يشوفونا بشيلة وعباة وتفكيرهم جذي، تصدقون قمت بسبة هالتفكير اللي فيهم أخاف ان يشكون اني مثلا مب طبيعية لاني مب مرتبطة بريال، طبعا يمكن البعض يقوللي لا تسيرين هالأماكن ولا تختلطين بهالجنسيات بس هذا غصبن عني انا أسير نادي رياضي في كل الجنسيات ومن فترة طويلة وحتى لو غيرته الغالبية أجانب لان بلادنا ماشاء الله كل الجنسيات فيها، ماقدر ماحتك فيهم لان هم مسؤولين عني في هالنادي سواء من المبيعات ولا مثلا التدريب لاني مشتركة عشان أحافظ على وزني ما يزيد لان جسمي قابل للزيادة وفي نفس الوقت اتسلى بدل ما تصيبني كآبة وملل البيت لان ماعندي غير الدوام والبيت ، انا الحمدالله راضية بقضاء ربي واقول كل تأخيرة وفيها خيرة وان لو هالشي زين لي كان ربي كتبه من زمان، لكن انا مب متحملة الناس واسئلتهم اللي تفشلني قام لساني ينربط وأسكت ومن داخل أنقهر منهم ما يفهمون ان هالسؤال عيب والله اني مستحيل أقول حق وحدة ليش يا فلانة ماتزوجتي للحين سواء كانت وافدة او أجنبية أو حتى مواطنة لان مابغي أجرح إحساس حد مثل ما اني مستحيل اقول حق حد ليش ما حملتي او يبتي عيال. شو أقولهم انزين والله استحي من وضعي الإجتماعي أحس مب حلوة حتى لو أنا أعرف حد بنفس حالتي احس بشفقة شو الحل
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
اختيه خليج واثقة من نفسج واذا اي حد سالج جاوبي بدون تردد نصيب ما يا لين الحينه ولا تجذبين ابد خليج قوية ما عليج كلام ناس وايد واذا انتي بتمشين ع كلام ناس بتتخبلين اخر شيء سموحة ع هكلمة بس صدق والله يعني شو يبون نسال كل واحد فشارع بتتزوجني يستهبلون شو صدقج والله اهم شيء كرامة وسموحة اذا ضايقتج بكلامي بس صدق ما عليج منهم حتى عمتيه داخلة ثلاثين وبعدها وناس كيف تتكلم عنها وهيه يحليلها من دوام لين بيت وتصلي وتخاف ربها وعايشة حياتها ما عليها من كلام ناس .
__________________________________________________ __________
>>>> الرد الثاني :
احسن شيء سويته انج اشتركتي في نادي هههههههه دبة خخخخخ(اتغشمر ترى)
__________________________________________________ __________
>>>> الرد الثالث :
أختي ما عليج منهم, خلي ثقتج بالله أولاً وأخيراً. ولا تخلي حد يخليج تستحي من عمرج , فيه آلاف غيرج ما متزوجات , مب أنت بس, قولي لأي وحدة تسألج ليش ماتزوجتي : نصيب , الله للحين ما كاتب, والحمدلله لو الله شايف الزواج خير لي كان تزوجت , يمكن بعد ما ها الوقت المناسب لزواجي, الله يختار لينا الأفضل, حتى الأجنبيات قولي لهن نفس الكلام. وسالفة البوي فرند هذه , قولي لهن بثقة : أنا الحمدلله مسلمة وملتزمة بديني لأنه ديني هو اللي مكرمني كإمرأة وإنسانة.وعادي قول لهن عن عاداتنا وتقاليدنا الإسلامية وبكل فخر.
تراهن الأجنبيات عندهن بوي فرند ومعظمهن طبعاً هذا البوي الفرند مستغلنهن وذالنهن ! والله ياأختي عندي أسيويات وأجنبيات ويشتكلن لهي من بلاوي البوي فرندس مالهن! . أختي أنت أحسن من كثيرات , الحمدلله, أنظري للإجابيات أختي الغالية ولا تخلي كلام حد يحبطج أو يحطم نفستج.
__________________________________________________ __________
>>>> الرد الرابع :
__________________________________________________ __________
>>>> الرد الخامس :
بالعكس حلوو انج تبينين اصغر عن سنج
واللي تسأل قوليلها انتي كم تعطيني وخليهم
يخمنون بنفسهم وغيري السالفه مب شرط
تردين واذا عن الريل قوليلهم ما احب اتكلم
عن خصوصياتي، لا تنسين هاييل لا هن
صديقاتج المقربات ولا من اهلج ف ماله
داعي انج تردين حرف حرف ع اسئلتهم
رد مع اقتباس
