عنوان الموضوع : الرجال المتأخرون عن الزواج (نقاش)
مقدم من طرف منتديات الضمير العربي


السلام عليكم و رحمة الله وبركاته
حبيت اناقشكن في موضوع ربما لا يلقى التغطيه الاعلاميه الي يلقاها وضع المرأه العازبه او المطلقه

الرجال المتأخرون عن الزواج و اقصد الي يدقون اكثر من باب و يردوهم لاسباب مختلفه منها الوضع المادي

الرياييل ينرفضون لاسباب مختلفه منها النسب و الاخلاق و الوظيفه ... الخ
كلنا فاهمين ان في رياييل ينردون بسبب اخلاقهم (الله يهدي الجميع) و بعضهم ينردون لعدم توافق الاسر من اصل و فصل و غيره و البعض ينردون بعد استخارة البنت و عدم تيسير الامور ... الخ

يطوف عمرهم و هم يدقون بيوت الناس و ينرفضون بغض النظر عن الاسباب

كله رزق و كله نصيب و كله مكتوب و هذا الشي مفروغ منه

لكن تعامل المجتمع مع البنت غير عن الولد

هل تعرفون شباب متعسر امر زواجهم؟ من اهلكم او اهل ربعكم

شو تكون الاسباب الي ينرفضون عليها؟

كم اعمارهم؟

كيف يتعاملون مع الموضوع؟

بالغالب البنات يعبرون عن اهتمامهم بهالموضوع (الزواج) مثل ما نشوف في المواضيع الي تنزل لكن الرياييل كيف تعاملهم مع الرفض و التاخير؟


انتظر نقاشكن

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
اولا اشكرج على هالموضوع

جد محد طرحه من قبل

بخصوص شباب عايلتنا ، كلهم مستعيلين و اغلبهم تزوجوا بعمر اقل من 25 سنة .. و اقصد عيال العم و خوالي وجي

لكــن

بخصوص اللي ينردون بعد مروا علي ..

وايد أسمع باللي يخطب و يردونه ، مع ان اخلاقه زينه .. بس تعرفين بنات هالايام أغلبهم يهتمون بالشكل و الوضع المادي أكثر من اخلاقه ..

مرة بتقولج لا ها دب ، ابيضاني بزياده ، اسمراني بزياده ، مب معضل ، سيارته قرمبع وووالخ

إلا تطلع لج عذر بس المهم انها ما تاخذه ..

أنا قلت ( أغلب ) البنات مب كلهم ، وخاصة هالجيل .. لأنهم منبهرين باللي يشوفونه فهالمواقع .. المعضل الكاشخ اللي كله يسافر و يلبس هالماركات و يتصور لج جنه حرمه استغفر الله ..

انيي للشطر الثاني ..

اعرف اخوان صديقاتي في منهم اللي تعدوا ال 30 سنه و عزابيين .. بس مب عشان ينردون ، هم أساسا ما دقوا باب حد ههههه
مع ان اخلاقهم تمام .. بس مثل ما قلتي النصيب

__________________________________________________ __________

>>>> الرد الثاني :
موضوع حلو صح كلامج موضوع في الصميم


شو تكون الاسباب الي ينرفضون عليها؟


بعضهم ينردون لأنه أسود و (خال) و مب جميل و لأنه أبوه يفشل و سمعته سيئة في الحارة و البعض لأنه أهله زطوط و البعض لأنه انتوا عندكم وايد إخوان و خوات مثلا 14 و انا ما أقدر أعيش عندكم و البعض لأنه مب مثقف مب جامعي على قولتها و البعض لأنه هو معقد و البعض لأنه يلزم عليها أنها تتغشى و هي ما تحب و لا لأنه يحد من حريتها يقولها لا تشتغل و لا اتسوق و لا يباها اتكمل تعليمها و منهم ينرفض لأنه مب من قبيلتنا و مب راهي و ما عنده فلوس و لأنه مب حلو نفس مهند و جواد و نفس اللي اتشوفهم في التي في

و منهم الهم الحق يوم يرفضون لأنه ايكون زواج أقارب و فيه أمراض وراثية فهم يبون ينقون السلاسة و يشوفون من برع أنه أحسن
البعض ينرفضون لأنه أهلهم يتشرطون مهر عالي و بيت حق البنت بروحها من غير الزهاب و غيره من تكاليف الزواج
في النهاية الأسباب متعددة و النتيجة وحدة


كم اعمارهم؟


من 18 لين 30


كيف يتعاملون مع الموضوع؟


يحاولون يدورون يدورون و يوم يتعبون يتعقدون من بنات البلاد و من المواطنات خصيصا لدرجة أنه منهم راحو يتزوجون بنات من برع البلاد من الدول العربية من المغرب و الأردن و مصر و غيره من الدول الشقيقة جمال و تكاليف و شروط أقل

__________________________________________________ __________

>>>> الرد الثالث :
والله زين في حد طرح هالموضوع .. البنت كل ما تكبر يزيد عليها الضغط من ناحية الزواج جنه النصيب بايدها يعني .. لكن الريال حتى لو صك 35 عادي شو يعني! انزين ترا حتى هو مسماه يكون نفس مسمى البنت لما يتأخر نصيبها .. تخلف والله

انا اللي شفته في مجمعنا انه مو شرط يكون السبب من الريال .. عادي يكون السبب من الام نفسها !

مثلا لما تسير تخطب حق ولدها حتى لو البنت ما فيها شي تيلس اطلع فيها شي .. ليش لونج مصفر ليش نظرات عيونج جي امها مب زينه ابوها ماخذ ثانيه .. قسم بالله شي امهات يسيرون يشوفون فوق 30 بنت واخر شي ولا تعيبها ولا وحده

اذا ولدج من الاساس دلوع امه خله عندج ليش تبينه يتزوج .. ترا الدنيا دواره وبيي الدور ع بنتج بعد

__________________________________________________ __________

>>>> الرد الرابع :
بالنسبة للي اجوفه

- في منهم من تروح الام هي تتنقى و ترفض ع راحتها قبل النظرة الشرعية هذا خليه مخلل عند امه
- في شباب ما يبغون يعرسون و عندنا كذا واحد ما يفكرون اصلا في العرس
- في عندنا شباب يوم بيعرسون يخطبون بنات صغار مثلا 30 سنة و يخطب بنت 18 سنة
- في شباب سمعتهم سيئة مثلا اصحاب سوابق او اصحاب سوابق و تابوووا مثلا
- في منهم مطلقين كذا مرة مرتين و ثلاث و البنات يخافون يرتبطون بها النوع من الرجال
- في كذا واحد اعرفهم وايد دلوعين يختارون و يتنقون وما يعيبهم شي
يعني يمكن خطبوا 20 وحدة و عقب يالله يالله عرسوا من كثر ما طلباتهم صعبة

__________________________________________________ __________

>>>> الرد الخامس :
اعتقد ان الرجل لانه بيخلص دراسته او عنده مشاريع عسب جيه رافض فكرة الزواج ها اللي اشوفهم في محيطي حتى لو اتزوج يتزوج في الاربعين
و شكرا ع الموضوع