عنوان الموضوع : تجربتي في معهد الطبخ من اتعس ما يكون للمطلقات
مقدم من طرف منتديات الضمير العربي

أنا كنت أدور قبل أماكن تعلم الطبخ للي صفر في الطبخ مثل حالااتي يعني انا نهائيا ماعرف أسوي أي شي أبدا ومافي مساعدة ولا تشجيع في البيت أبدا بالعكس والله منتهى الإحراج وبغيت أتعلم برع لاني حاسة إن في خاطري هالشي خاصة هالزمن اللي تطبخ هي اللي متميزة عند أهلها وعند أهل ريلها خلو عنكم اللي بتقول الشهادة وهالسوالف ها كله مب مهم، المهم دورت في النت ولقيت مكان وسرت سجلت وياليتني ماسجلت ضيعت فلوس على الفاضي تسيرين وتيلسين تراقبين الشيف وهو يطبخ وبس لو خلاج تسوين شي بيقولج مثل قلبي البصل في الزيت حركي البشاميل ولا قلبي اللحم في الصلصة بس لكن ما يعلمونج شي من الصفر يعني انا مشكلتي كنت أبا حد يعلمني كيف أبدا مثل كيف طريقة التقطيع الصح ومهارات استخدام السكين وكيف مثلا تقطعين الدياي واللحم ها كله ماشي ولو بغيتي لازم تدفعين فوق 14000 والمكان صغير واشكثر يايين يبون يتعلمون بس في كلاسات ثانية فتمين متلخبطة ويستخدمون نفس عيون الغاز اللي انتي عندها، وانا كنت المواطنة الوحيدة وشكلي غلط وسطهم يطالعونج ماشفت حتى ناس عرب وتلعوزت والحين باقيلي كلاسين لان إجباري تدفعين حق 3 مالي خاطر أسير إذا الموضوع بس اني ايلس اتفرج ترا بيلس اشوف فيديوهات الطبخ على اليوتيوب والشيف سريع في الطبخ ويعطونج ورقة فيها الوصفات كلها بالجرام يعني لازم تشترين ميزان، يعني اوكي لو بتاخذين درس الحلويات والكيك مب مشكلة لكن في الطبخ أرف مافي تطبيق وعقب سرت سألت عند الرسبشن مالهم لو بغيت أطبق وروحي اسوي جان تقولي لازم تدفعين حق دروس خاصة يعني تدفعين القيمة دبل وعقب بيخليج الشيف تسوين بروحج لان لويابو حق كل طالب ادوات ومكونات روحه بيخسرون عالفاضي، والله وانا مستحية على الآخر ومرتبكة لان الشيف أجنبي وريال وانا اصلا خجولة ماحب اتعامل ويا رياييل بشكل مباشر يعني مب لدرجة واحد واقف عدالي و يعلمني طبخ، واحين متضايقة كنت بانية أمل اني لو خذت دروس بتزيد ثقتي في نفسي وبطبق في البيت لكن للأسف ماقدرت، وبس حبيت أكتب لكم هالتجربة لان في بعض البنات قبل قالولي لو دورتي مكان قوليلنا وها اللي اكتشفته ان محد يقدر يعلمج هالشي وان لو بغيتي لازم بروحج

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
لنزعلين كل شي يجي بالتدريج ومافي واحد طلع من بطن امه لازم سكين ويعرف يستعملها الكل ابتدى من الصفر وارتكبنا اخطاء
بس في هنا وحدة مااذكر اسمها كانت مستعدة تعلم على الطبخ ادعي انها تقرا موضوعج وترد عليج

__________________________________________________ __________

>>>> الرد الثاني :
حطي طلب في قسم طلبات الزبونات .. شي وايد عضوات عندهم قابليه انهم يعلمون حد الطبخ ... بيكون ارخصلج واللي بتعلمج حرمه وبتتعلمين اكلاتنا

والله يوفقج

__________________________________________________ __________

>>>> الرد الثالث :
اختي دشي المطبخ انتي وخذي كتب مهارات الطبخ وتعلمي بروحج مرة مرتين ثلاث بتتعلمين احسن من هالمعاهد عندج اليوتيوب وعندج المنتدي اسالي والبنات ما بيقصرن وياج

__________________________________________________ __________

>>>> الرد الرابع :
والله اني مستعده اعلمج ببلاش من والى بش كيف وانا ربة بيت ؟
بنصحج بشغلة تابعي قناه فود نتورك اانا عندي هواية وعشف للمطبخ بديت من الاعدادية وليومج احي اطبخ واتغنن
وصرت ابتكر وصغات صحيه 100%

ماحب امدح بنفسي بس صدقيني احب افيد غيري
فب كتب طبخ مصورة وممتازة تعلمت منها قياسات وتعلمت منها
كيف انظف الدجاج السمك الروبيان كل شي بالصور
وتعلمت انواع العيش والمعكرونة وطرق طبخهن
كثير وصفات بالكتاب بحط لج اسمه ان ربي ذكرني

انتي بتتعلمين من الصفر مهارات تقطيع هاي صدقيني بس تابعي برامج طبخ
مثل فود نتورك عالشو تايم
وتابعي فتافيت او موقعهم كله وصفات
وبالممارسة بتبدعين ومارح تحتاجين لقياسات واوزان محددة
لكن المعجنات والحلويات تحتاجين لضبط المقادير

__________________________________________________ __________

>>>> الرد الخامس :
انا مستعده اساعدج بالمنتدى ان ربي قدرني ومابي منج غير دعوة بحسن الخاتمه