عنوان الموضوع : السمبوسة المنزلية (من العجين حتى القلي) بجميع التفاصيل شيف لطيفة مسعود من مطبخ الامارات
مقدم من طرف منتديات الضمير العربي
السلام عليكم ورحمة الله وبركاتة
أغلب الوقت نستسهل نستخدم عجينة السمبوسة الجاهزة. لكن نكهة السمبوسة المعدة باستخدم عجينة عجينة ولذيذة وخفيفة لو اتبعنا الطريقة الصحيحة والتكنيك الصحيح . عن نفسي افضل أسوي العجينة بنفسي لاني العجينة الجاهزة احس اني اكل ورق مقلي . فخليت استخدم عجينة السمبوسة الجاهزة لمقبلات وأصناف ثانية بس مش للسمبوسة .
بإسم الله نبدأ طريقة عمل السمبوسة من الألف إلى الياي . بداية هذا شكل السمبوسة النهائي شو رايكم ؟؟
مقادير عجينة السمبوسة
هذي المقادير تعطيج عدد 22 سمبوسة حجم كبير . وكل ما صغرتي الحجم بتكثر الكمية
حشوات السمبوسة
بالنسبة لي ألذ وأروع حشوتين للسمبوسة هم اللحم المفروم . والجبنة الفيتا المضاف له بقدونس ونعناع مفرومين
واكتشف بعد حشوة جديدة ولذيذة وهي (جبن موزاريلا مبشورة , جزر مبشورة, فلفل بارد مبشور)
وبنحتاج إلى قطاعات السمبوسة حسب المتوفر عندج
وراح نحتاج إلى صواني مرشوشة بالطحين بشكل خفيف جداً
في محضرة الطعام بنضيف الطحين والملح والباكنج باودر والزيت ونعجن
بتظهر عندنا عجينة عبارة عن فتات مثل يوم نسوي التارت .
بنبدأ نضيف ماء بالتدريج ونعجن . انا استخدمت الطحين الكويتي الفاخر والكوبين خذو حوالي 3/4 الكوب او اقل بشوية . لكن أنصج دايما تضيفين الماء بالتدريج لاني درجة رطوبة الطحين تختلف في انواع تحتاج ماء اكثر من انواع ثانية.
هذا شكل العجينة خذيت بالظبط 4 دقايق وصارت لينة ومتماسكة وناعمة . ولو شديناها ممكن تشد وما تنقطع وهذا هو القوام المطلوب.
نرش صحن بشوية طحين ونحط العجينة ونرشها بعد بقليل من الطحين ونخليها ترتاح على الاقل ثلاث ساعات وأفضل نسويها قبله بيوم لنتائج أفضل
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
طريقة تشكيل السمبوسةهذا شكل العجينة بعد ما ارتاحت بشكل جيد . لحظي كفي ملساء وناعمة مش ناشفة.
بنفرد العجينة بارتفاع وايد رهيف على الاقل ربع سم . وراح استخدم الدائرة الي فيها مثلثات. وبعد قوالب السمبوسة العادية
وحطيت قطعة من العجية وصفيت في أنصاف المثلثات الحشوات الي عندي .
وحطيت قطعت عجينة ثانية وغطيتها بشكل جيد . وبإستخدم فرداة العجين ضغط عليها علشان تسكرها وعلشان تاخذ شكل القالب.
وهذي المثلثات الحلوة نزلت بسهولة . لاني العجينة مرتاحة وما تعاند معانا ههههههه
ورصيتهم في الصينية المرشوشة بالطحين
الموديل الثاني المتعارف عليه . قصيت بأسفل القطاعة الدوائر بهذي الصوره
بس يا جماعة الخير لازم ندهن الحواف بقليل من الماي عسب ما تفتح معانا .
ونحط الحشوة وما نكثر
وهذي السمبوسة بعد ما خذت شكل القالب
نتأكد اني الاطراف كلها مقفولة بشكل محكم عسب ما تطلع الحشوة أثناء القلي.
وهذا موديل السمبوسة الثاني بعد ما رصيته في الصينية المرشوشة بالطحين
وممكن تسوين مني سمبوسة محشية كيري وتحطيها في القطر بعد القلي مثل هذيلا الحلوات^_^
هذي كل الكمية الي سويتها بهذي المقادير
بعد ما رصينا السمبوسة في الصواني المرشوشة بالطحين دخلتهم الفريرز عسب يجمدون مدة ساعة . وبعدين طلعيتهم . ورصيت نص الكمية في صحن بلاستك . لاحظوا بعد ما جمدون الشكل ما تغير لاننا جمدناهم وفي صينية الاول.
وهذا نص الكمية حطيته في صحن بلاستك وعلى الفريزر . أباكم تشوفون أشكال السمبوسة المختلفة كل شكل واضح ومش معجن وشكلة متقن. الكمال لله وحدة
__________________________________________________ __________
>>>> الرد الثاني :
قلي السمبوسة
لازم تنقلي السبموسة في زيت متوسط الغزارة وعلى متوسطة .
وميزة هذي العجينة . انها تنتفخ في الزيت وتكون من داخل طرية وتذوب ومن الخارج مقرمشة لاحظو يوم ضغط على .
وما نوصيكم بالتقديم الحلو والحركات القميلة ^_^
أتمنى تحوز طريقتي في السمبوسة على اعجابكم وفي انتظار التطبيقات الحلوة.
أختك في الله
لطيفة مسعود
__________________________________________________ __________
>>>> الرد الثالث :
شكله لذيييذ
لازم اجربه
تسلم ايدج حبيبتي
__________________________________________________ __________
>>>> الرد الرابع :
شكله شهي
بس سؤال شو أحسن لحم للسمبوسة
__________________________________________________ __________
>>>> الرد الخامس :
روعه .. تسلم إيدج
رد مع اقتباس
