اهلا يا بنات !
طبعا مثل ما العنوان واضح نبغي نسوي تجمع للمصابات بنقص فيتامين د.
وعشان انا استفدت من التجمع الاول للمصابات بنقص فيتامين د
على هذا الرابط واللي للاسف انغلق لانه موضوع قديم ،
https://forum.uaewomen.net/showthread.php?t=1018071
.. قلت ليش ما نسوي تجمع ثاني عشان كل وحدة تقول تجربتها
وكلنا نستفيد
وخاصة اني اكتشفت مؤخرا انه نقص الفيتامين د
منتشر بشكل غير طبيعي في جميع الفئات العمرية عندنا
وهذا معناته وجود اسباب خفية لازم الكل يعرفها ويتجنبها !
وانا بابدا بتجربتي :
من فترة ، فجاة قمت احس بدوخة وتعب شديد
ورغبة متواصلة في النوم وبعدين بديت احس بالام في العظام واوجاع في المفاصل !!
اول شي خطر على بالي انه الهيموغلوبين عندي نازل
لانه عادة ينزل كل فترة يوم اهمل في اكلي والحل اني ابدأ اخذ حبوب حديد عشان يرتفع عندي.
سرت للدكتور وسويت تحليل !
وطبعا انصدمت انه السبب هالمرة مب الهيموغلوبين ،
السبب انه نسبة فيتامين د عندي 17 والطبيعي يكون بين 50 – 100 !!
يعني وايد ناقص !
فكتب لي حبة عبارة عن 50000 وحدة اخذها مرة في الاسبوع
ونصحني بالتعرض لاشعة الشمس لانها المصدر الطبيعي لفيتامين د .
بديت اخذ الحبوب لكن التقدم كان بطئ !
نفس التعب استمر عندي فقلت خليني اتعرض لاشعة الشمس بصورة يومية عشان احس بتغيّر !
والنتيجة المذهلة اني من بعد ثالث يوم من التعرض للشمس اختفت عني تقريبا كل الاعراض
واستويت احس براحة اكثر اثناء الحركة
واختفت الدوخة وشوي شوي قمت ما احس بالام المفاصل !!
والحين مستمرة على العلاج وبعد ثلاث شهور ان شا الله باعيد التحليل وباشوف !
اشياء مهمة لازم تعرفينها :
1 فيامين د غير موجود بكثرة في الاكل !
موجود بكميات قليلة في سمك السلمون والجوز!
لكن تحتاجين الى كميات كبيرة منهم عشان تقدرين تحصلين القدر الكافي اللي يحتاجه الجسم منه!
2 التعرض لاشعة الشمس يكون صباحا قبل العاشرة وفترة العصر من بعد الساعة 4
(يقال انه السمراوات بحاجة لفترة مضاعفة من صاحبات البشرة الحنطية او البيضاء)
لكن عموما انا ايلس نص ساعة في المرة الوحدة !
ملاحظة : ما في داعي تيلسين بالبكيني مثلا !
بس طلعي الساقين والذراعين يعني العظام الطوال من جسمج والبسي كاب اذا ما تبين تعرضين ويهج للشمس !
3 طريفة اخذ الجرعات تختلف من حالة الى الثانية :
في ناس ياخذون ابر ويكملونهم بحبوب
وفي ناس يحتاجون حبوب اسبوعية فقط
وفي دول مثل مصر لازم يكون العلاج عبارة عن حبوب كالسيوم بالاضافة الى فيتامين د.
4 اهمال علاجه يمكن يسبب لج مشاكل صحية وايده اهمها هشاشة العظام !!
ومن قراءاتي عرفت انه من اسباب انتشار نقص فيتامين د في الامارات بوجه عام (والله اعلم) :
1 وضع الـ sunblock بكثرة
2 نوعية اقمشة العبايا يمكن تمنع وصول اشعة الشمس الى الجلد
وعشان جذيه من الضروري تخصيص وقت يومي
للتعرّض لاشعة الشمس المباشرة
(يعني ما يستوي تيلسين ورا الدريشة وتقولين الشمس تدقني !
لا ! ضروري التعرّض للشمس يكون مباشر.)
والحين انتي خبرينا عن تجربتج
سواء تعالجتي وخلصتي او لازلتي تتلقين العلاج ولج الاجر ان شا الله
المشاركة الأصلية كتبت بواسطة حرمة
رد مع اقتباس
