عنوان الموضوع : الطفل المنتظر
مقدم من طرف منتديات الضمير العربي
السلام عليكم خواتي الغاليات .. حبيت أني افتح موضوع عن الطفل اللي كل ام و اب يتريونه بفارغ الصبر و كيف الزوجة تبشر زوجها بهالبشارة الرائعة .. نبا تفاعل و رسائل جميلة للزوج و ربي يرزق كل من تأخر عليها الحمل يا رب .. يالله منو بتبدي و تعطينا رسالة حلوة
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
اول حمل سويت فحص فالبيت الساعه 3 الفجر ووعيت ريلي وقلت له انا حامل قال لي تعالي رقدي ادري انه ما استوعب وبعد 5 دقايق شافني يالسه قال لي حلمت انج حامل انا ما قدرت امسك عمري قلت له مب حلمت هذا صدق انا حامل قال لي الساعه كم قلت له الساعه 3 فديته ما كان مصدق وعلى طول باسني على راسي وقال الصبح اوديج العياده علشان نتاكد وفعلا تاكدنا وفرحنا وايد والحمد الله رب العالمين.
والحمل الثاني سويت له بكس وحطيت له بطاقة ورضاعه وبامبرز وكتبت فالبطاقة رشودي حبيبي بعد 9 شهور بيه اخت او اخو
واستانس وايد
__________________________________________________ __________
>>>> الرد الثاني :
هههههههههه ما شاء الله الله يتمملج على خير يا رب
__________________________________________________ __________
>>>> الرد الثالث :
انا
كان ريلي شاك لان الدوره متاخره ٥ ايام
و شترالي جهاز الفحص السريع
وانا مافهمته ههه قلت مو حامل
و عقب خذا الي بو ١٥ درهم
ع اساس بسويه يوم بنش لصلاه الفير
و منو يقول اني رقدت
تميت اتجلب لين الساعه ٤ والاذان ٤ ونص
ف قلت بنش اسويه و بفاجئ ريلي
نشيت وسويته و طلع خطين
و من الصدمه خليت التيست عالمغسله وطلعت
نمت عالفراش
يلست افكر وافكر
ليش ما اسويله حركه حلوه وجذي
و رديت نشيت (هو حس ان في شي)
رحت و خذت التيست و خشيته
و رجعت عالفراش
و تذكرت ان الكرتون مال التيست ماعقيته فالزباله
و بيكشفني
و نشيت المره الثالثه و عقيت الكرتون
ف ريلي قالي فيج شي؟
شي يعورج؟
يتج الدوره؟
و انا اقول لا
هو قلبه مقبوض
و اذن
و راح يصلي بالمسيد
انا توضيت
و رحت يبت مندوس صغير
و يبت ورقه و قلم
و شموع مال الحالات الطارئه ههه
و رحت فالحوش
بندت الليتات
و حطيت المندوس و داخله التيست و كتبت ب ورقه
ان شاءلله بعد اقل من ٩ شهور بيكون بحظنك ولدك او بنتك
و حذال المندوس نثرت الشموع
و صليت
و تميت اراقب من الدريشه
ويوم دخل
انصدم
و شل الورقه وقراها و تم يضضضضحك
و دخل داخل والعيون محمره وتغرغر دموع
و قال يالحماره عبالي كنتي تصيحين وانتي تروحين الحمام كل شوي
و قلت اكيد سوت الفحص و طلع مب حامل وتميتي تصيحين
طبعاً انا موثقه كل شي بالصور ههه
و عقب طلعنا نتريق لان طار الرقاد
والله يرزقكم مثل فرحتي واكبر ان شاءلله
__________________________________________________ __________
>>>> الرد الرابع :
ما شاء الله عليكم والله عيني دمعت ع مواقفكم لانكم ذكرتوني بهالفرحه الي عمري ما انساها
الله يرزق كل وحده متأخره بالحمل آمين يا رب
انا حملي كان عن طريق اطفال انابيب و صبر 9 سنوات تقريبا فما قدرت اضم عليه اول ما اتصلوا علي المركز و قالولي اني حامل اتصلت عليه وهو فالدوام وتم يصيح فالتلفون فديته وانا اصيح معاه
و اذكر يوم سرت اسوي اول صورة سونار هو كان دوام وما قدر يسير معاي و اتصلت عليه و قلت له انا حامل توأم يقولي جذابه (لاني من قبل عمليه الانابيب وانا اقوله احساسي يقول ان ربنا بيكرمنا بالحمل و توأم بعد وهو كان يقولي لا تصيرين طماعه) وتميت اقوله والله توأم وهو عقبها تم يضحك ومستانس عقبها قلت له حبيبي أنا حامل بتوأم ثلاثي هني صاح على طول و تم يقول الحمدلله الحمدلله وانا اكيد اصيح معاه
الحمد لله والشكر يا رب على نعمك الكثيره و على كرمك يا رب تحفظ عيالي و زوجي و ترزق كل متأخره عن الحمل آمين يارب
__________________________________________________ __________
>>>> الرد الخامس :
انا بحملي الاول
جاب زوجي التحليل
واتفقنا انه نشوف النتيجة مع بعض
ساويت التحليل
وغطيته وطلعت
وشفنا النتيجة مع بعض
رد مع اقتباس
