عنوان الموضوع : قصة حملي بعد 10 سنوات سلامة الحمل
مقدم من طرف منتديات الضمير العربي
السلام عليكم
بصراحة من حملت وانا ابي ادخل واكتب قصة حملي،في البداية بقول لكم نبذة عن حياتي قبل الحمل:
كان عندي مبدأ اني مااحاتي الحمل و كنت اشغل عمري باي شي عشان ماافكر في الحمل، الدراسة ،و طلعات مع ربيعاتي ، والدوام. و الحمدلله كملت دراستي و خذت بكالوريوس مع اني تزوجت وانا في صف ثالث اعدادي، و نسيت اقول لكم اني كنت اسمع اغاني وايد واحف حواجبي وشعري كان يطلع احيانا.
وكنت كل مااسمع ان فلانه حامل ماكنت احسدها او اقارن عمري فيها ، كنت دوم ادور اللي عندي و ماعندها ، مثلا وحدة كنت اقول الحمدلله انا ريلي مب مثل ريلها يغازل او ما يعاملها عدل ، شو ابي في العيال مع ريل مثل هذا، اللي اقصده اني كنت احاول اطلع حالي احسن منهم حتى لو ان الله رزقهم عيال وانا لا، احاول ارضي عمري باللي الله كاتبنه لي، وهالاسلوب له سلبيات وايجابيات.
السلبيات: اني انشغلت عن سالفة الحمل ، ما كنت استمر في علاج الحمل وحتى ما كنت ادعي ربي وانا اصلي اني احمل لاني كنت ناسية السالفة اصلا. وهالشي غلط لان لازم ندعي ونطلب من رب العالمين انه يرزقنا ونفس الوقت نسعى للي نباه.
الايجابيات: اني ماتعبت نفسيتي بالهم وحسد الناس والمقارنات، خاصة انه بعض حريم حمياني تزوجو عقبي وحملو ماشاء الله.
المهم مرت عشر سنين وانا على هالحال وطبعا ريلي مثلي منشغل وماكان ملتزم بالصلاة وكان هيز يباني انا اراكض وهو يقعد يتفرج، بس هذا مب معناه اننا ماكنا نبا عيال بالعكس كنا نتمنى وكنا نموووت في الصغارية وعيال اخوانه متعلقين فيني وفيه واايد.
نرجع للي صار عقب عشر سنين ، صارت بيننا مشكلة كبيرة انا وريلي وكنا عادي نفترق، ومن هالسالفة انا وريلي وعينا وحسينا ان في شي غلط في حياتنا مب بس تاخر الحمل وايد اشيا ثانية مب لازم اذكرها، والسبب الرئيسي لهالشي البعد من رب العالمين، ريلي ماشاء الله قام يصلي في السيد كل الصلوات ويقرا قران بشكل شبه يومي ،وانا صرت اقرب لربي ماقمت اسمع اغاني و مااحف حواجبي بس اشقرهم لانهم غلاظ بس ناوية شوي شوي اخليهم بدون تشقير ان شاء الله ، و صرت اقرى قران اكثر عن قبل ، كنت اقرا بس مب وايد ، ولاني مااحب الف الشيلة صرت البس الكبوس عشان اضمن ان شعري مايطلع وسرنا العمرة بعد.. طبعا خذنا فترة لين مانسينا المشكلة اللي صارت لنا بس الحمدلله الله يسر امورنا واعتدلت حياتنا ، وكنت اقرا سورة البقرة كل يوم تقريبا ومداومة عالاستغفار ،وفي هالفترة وايد اشيا كنا نتريااها ونتمناها صارت، ريلي ترقى ، وطلع اسمه في الاسكان ، زيدو راتبي، وعلاقتي بريلي صارت أقوى واحسن عن قبل. عقب ثلاث شهور قررنا نرد نعالج للحمل. خذت موعد في مركز دبي للاخصاب عشان نبدا العلاج ، وسبحان الله كان عندي يقين وثقة بربي اني بحمل وهالشي وايد مهم، الاشيا اللي سويتها قبل العملية وبعدها واللي يمكن احدها جعلها ربي سبب اني احمل:
1. اقرا سورة البقرة كل يوم ومداومة عالاستغفار.
2.ما كنت اضغط على عمري بس يوم كنت اقدر كنت انش اصلي قيام الليل وادعي ربي انه يرزقني.
3. حتى اذا ماقمت الليل كنت اكيد انش نص الليل كم مرة، وادعي ربي انه يرزقني عسى انه يكون وقت الاستجابة في الثلث الاخير من الليل.
4. ولانه الدكاترة كانو يقولونلي قبل اني لازم اسوي رياضة واكل اكل صحي لان فيني تكيس قمت اسوي هالشي( مع اني كنت مطنشة قبل).
5. طرشتلي بنت اختي مسج وصل لها عالبيبي عن العريفي وصفة للحمل ا انج تقرين على زيت زيتون و الحبة السودا، كانت مطرشة سور من القران وأدعية للأسف ضيعت المسج ، المهم سويت هالشي بس بدون الحبة السودا وكنت ادهن جسمي بالزيت كل ليلة قبل وبعد العملية. (مادري اذا هالشي صدق عن العريفي ولا لا المهم انا سويته ، بالنهاية قران و ادعية ما بتضرني.
6. اخذ فوليك أسيد اللي كتبته لي الدكتورة لأنه مهم قبل الحمل.
7. يوم كنت اروح العيادة او اروح اخذ الابر كنت اطفر واضايج احيانا كالعادة لاني مااحب الالتزامات، ووايد طولت لان البويضة ما كبرت بسرعة عشان اسوي العملية، بس كنت اطمن عمري اني لازم اسعى واتعب عشان ربي يستجيب لدعائي، وطول الدرب كنت استغفر وادعي (حسبنا الله سيؤتينا الله من فضله انا الى الله راغبون) حتى في الوقت اللي كانت اخذ فيه الابرة كنت اقول هالدعاء .( هالدعاء وصلني عالبيبي عن المغامسي ).
بصراحة وقت العملية (الترجيع)من زود ما كانت مثانتي مليانة ما قدرت ادعي عدل، المهم عقب العملية واضبت على النقطة 1-2-3-5-6 والدعاء في 7، انا ماافتي واقول لكم ان هالادعية وهالاشيا تخلي الوحدة اكيد تحمل ، كل شي بايد رب العالمين بس لازم نسعى باللي نقدر عليه، و
وكنت مثل ماقلتلكم عندي يقين اني بحمل اذا هالمرة ماحملت، اكيد عقب بحمل، وكنا انا وريلي ندخل النت نشوف شو لازم نسوي بعد الترجيع في مواقع كانو حاطين شو ناكل مثلا. (كل شي ممكن نلقاه في النت). وطلعت ادعية للحمل من النت كنت اقراها دوم ، كنت بحطها بس ماعندي وقت انا في الدوام الحين بتلقونها في جوجل.
وبختصر النتيجة انا حامل الحمدلله .
سامحوني اذا طولت عليكم او نقعت في الرمسة ، بس حبيت انكم تستفيدون وان شاء الله ربي يرزق كل المحرومين الذرية الصالحة ان شاء الله. ما قدرت اقرا اللي كتبته واصحح الاخطاء
لاتنسون تدعونلي ان الله يتمم حملي على خير
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
مبررررررررررررررروك و الله يثبت حملك و يتمم لك علخير
بس المهم ان تثبتي و تداومي على الصلاة و الاستغفار و القران حتى بعد ما تربين
و الله يرزقك بالذرية الصالحة اللي تقر العين يارب
__________________________________________________ __________
>>>> الرد الثاني :
__________________________________________________ __________
>>>> الرد الثالث :
مبروك اختي والله يثبت لج حملج ان شاء الله
__________________________________________________ __________
>>>> الرد الرابع :
ما شاء الله تبارك الله رب العالمين
الله يبارك لك و يرزقك الذرية الصالحة
و يرزقني و يرزق جميع البنات في هذا المنتدى
__________________________________________________ __________
>>>> الرد الخامس :
الله يثبتج يارب ويرزقج بالذريه الصالحه
رد مع اقتباس
