عنوان الموضوع : فيدوني بخصوص عقم الرجل لحمل
مقدم من طرف منتديات الضمير العربي

السلام عليكم ورحمة الله وبركاته ,,,,,
خواتي الغاليات ،، لكل اللي مرت بتجربة عقم زوجها أو تعرف أي أحد مر بهالتجربة ساعدوني الله يرضى عليكم

أنا للحين مب متزوجة لكني ناوية عالارتباط أو خلنا نقول أدرس الموضوع.. الرجال وااايد زين وأنا بصراحة مابى أضيعه من إيدي على كثر ما شفت طيبة قلبه واحترامه لي ، عمره من عمري تقريبا وأكبر بشهور،، ولد ناس ومحترم باختصار مابحصل واحد شراته أبدا .. المشكلة بس في شي واحد وللي بسببه أنا نزلت هالموضوع اللي هي "العقم" ! هو كان متزوج من قبل واستمر زواجه تقريبا 4سنوات.. عالج خلالها في جم دولة الصين تايلند ألمانيا بلجيكا الأردن! هاي كلها طبعا من أحسن الدول في علاج العقم ولكن للأسف بلا نتيجة ،، أنا مافقدت أملي بالله سبحانه وتعالى وثقتي فيه كبيرة ،، طول الوقت أدعيله وأستغفر بنية إنه يرزقه الذرية الصالحة حتى لومن غيري ,, والله أقضي الليالي أستغفر الله ألف مرة،، طبعا موكلة أمري لله وحده وحتى في دعائي أقول يارب لو كان زواجي منه فيه خير لي ف الدنيا والأخرة قدره لي ويسره لي وإذا كان فيه شر لي اصرفه عني واصرفني عنه.... المهم ياخواتي أنا كله ولا أتخلى عن إنسان في محنته،، صحيح إني ما صارلي فترة طويلة من عرفته ولا شفته للحين إلا ف الصور وهو ماشافني أبد أبد لااااا صور ولااااغيره لكن والله إني أحس بأجمل المشاعر وياه واتمناه شريك لحياتي وهو نفسي وأكثر’’ والحمدلله إني مثل ما أنا حريصة على إن الشيطان مايدخل بينا هو بعد حريص على هالشي،، عشان لوماصار نصيب خلاص كلن يروح فطريجه بدون مانكون أغضبنا ربنا فأي شي لأن الهدف من البداية كان الزواج وبس,, أدري رمست وايد،، بس اللي خلاني أرمس إنه اليوم بالذات وصلته تقارير آخر فحوصاته اللي طرشهم لجم دولة غير الدول اللي ذكرتهم وكانت النتيجة نفس الشي! أدري هو محبط عالآخر لكن أنا بعدني بنفس القوة وبنفس الثقة بربي الحمدلله ،، كل اللي أباه تدعولي أول شي وتخبروني بتجاربكم بستفيد منها،، وين ممكن يتعالج ؟ وهل موقفي صح إني أنتظره؟ عمري 31 مابى تأنيب ضمير بليز اللي فيني مكفيني.. أدري إني كبيرةعالانتظار ومافي وقت والمفروض أتزوج أول واحد يتقدملي.. وصحيح أنا محتارة بس فنفس الوقت عنيدة أعاند الظروف اللي جدامي لين تتعدل .. فيدوني خواتي أنا وين؟!!!

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
مادام استخرتي توكلي على الله
نحن صارت عندنا شرات هالسالفة ومن طلق الحرمه قالت انه عقيم وعرس مرة ثانيه والحين عنده عيال
سمعت عن حالة انه الريال عنده 0 حيوانات منوية وتعالج عند دكتوره وحرمته حامل وقريب بتربي
وغيرهم الفحوصات سليمة لكن سبحان الله ما كتب لهم الذرية
خلي ايمانج بالله قوي وتوكلي على الله والنفسية تلعب دور

__________________________________________________ __________

>>>> الرد الثاني :
يزاج الله خير أختي والله كلامج يبرد القلب ....

__________________________________________________ __________

>>>> الرد الثالث :
توكلي على الله وان شاء الله الله يرزقكم بالذرية الصالحة
أعرف ناس وحدة بصراحة متزوجة من سنوات ومن فترة سافرت تايلند و سألتها شو سوا حقج قالت ماشي ع أساس كل شي سليم/ وهي حملت وتقول من الله صار هالشي يعني روحتها لتايلند ماسوت شي
الله و أعلم و بالنهاية كل شي بايد رب العالمين خلي ثقتج برب العالمين كبيرة .

__________________________________________________ __________

>>>> الرد الرابع :
من رايي .. بعدج صغيرا ..
و لا تجازفين بانج تاخذين عقيم

الحرمه مهما كان تبى الضنا .. وانتي مافيج عيب ليش تربطين عمرج مع عقيم

حبيبتي الرسل كان امتحانهم بالعقم يعني الشي صعب جداااااا على الانسان

ليش تبلشين عمرج عقب يا تمين معاه طووول العمر في زيارات و امل علاج و الله الرازق صح
بس مادام فيه هالعيب ما انصحج لان بتحنين على العيال

__________________________________________________ __________

>>>> الرد الخامس :
الحرمة من تعرس بعد شهرين والا ثلاث خلاص اتكون متلهفة ع الحمل والولد.... اذا الله حرمه من الذرية إنتي شو ذنبج تنحرمين من الأمومه..... خلي عاطفة الحب بصوب ... فكري بالعقل.... اذا الكل أجمع إنه عقيم.... شو هو الامل إللي متمسكه فيه؟؟؟؟؟ والله العظيم البنات أحينه خصوصا الكبار اشوية بس يبغن يعرسن عشان يجربون الأمومه وما يفتكرن بالحب..... الأمومه غريزة طبيعيه في الأنثى..... بتعيشون الحب سنة وسنتين وباقي العمر قهر وندم لأنج تبغين تستوين أم.... وبتقارنين نفسج مع إللي حواليج وكل وحدة تحمل إنتي تموتين من داخلج مليون مرة.... لأنج إنتي ما فيج شي وتقدرين إتييبين عيال فالقهر بيكون فيج مضاعف.... أنا عندي عيال الحمدلله بس لما أشوف وحدة حامل أو ربت أشتاق للعيال وللحمل... هذا شي طبيعي في الأنثى... والريال هذا يقدر يتزوج أرملة أو مطلقة وعندها عيال.... وترا كلنا تزوجنا بدون حب وزواج تقليدي والحمدلله الحب والألفة والمودة يت بعدين مع العشرة.... الله يوفقج أختي لا يأنبج ضميرج لأنج إنتي مب مسؤوله عن الريال .....