عنوان الموضوع : لكل من تسأل عن العلاج في بلجيكا تتفضل لحمل
مقدم من طرف منتديات الضمير العربي

السلام عليكم ورحمة الله وبركاته

خواتي اللي حابه تتعالج عن تأخر الحمل مابنقول العقم الله يرزقنا ويرزقكم الذريه الصالحه في بلجيكا

اول شي حبيبتي للعلاج على حساب الدوله يا اما تروحين عن طريق الدفاع أو عن طريق هيئة الصحه في بوظبي

طبعا الكلام هذا لكل الاماراتيات واهم الشروط للقبول
1_ اذا كانت عندج واسطه علي طول بيقبلون اوراقج حتي لو حالتج ماتستدعي
2_ لو ماكانت عندج واسطه لازم يا اما تكون حالتج مالها علاج في الدوله او انج جربتي التلقيح المجهري او الانابيب اكثر من مره وفشل في الدوله

خطوات التقديم

1_ تاخذين التقرير الطبي من مستشفي حكومي والافضل يكون من احد مستشفيات بوظبي او العين لانهم مابيسولن لج سالفه لو يايبتنه من مستشفي القاسمي مثلا هههه وتقدمينه علي الهيئه او الدفاع وبعدين تنعقد لجنه ويقررون هل انتي مستحقه او لا ,,
2_ بعد اللجنه يتصلون فيج اذا قبلوج ويقولون لج تبين الجوازات

شو الطلوب منج اثناء التقديم :
1_ المتابعه الدااااائمه لاتنسين بمعني كلي جبدهم كل يوم اتصلي واسألي لانج لو بردتي اوراقج بتم علي الرف وخصوصا بعض المسؤولين في الهيئه خاصه يشوفون ان تأخر الحمل حاله مب ضروريه مب مسأله حياه او موت علي حد تعبير احدهم !!!

الفرق بين الهيئه والدفاع :

اولا: بتكلم عن الهيئه ,, لج محاولتين اذا مانجحن يقولون لج مع السلامه بس مثل ماقلت لج اذا عندج واسطه لو عشر ,, اول ماتوصلين يصرفون لج 6000 يور وبعد نجاح المحاوله 6000 يورو وبس لاتحلمين تشوفين غيرهم ليش اقولج ها الكلام علشان تسوين حسابج وماتعتمدين ماديا عليهم لانج بتتعبين بمعني عندهم لكل دوره علاجيه 6000 السكي ومصرفج الخاص علي حسابكم يعني المبلغ اللي بيعطونكم اياه اما تخلونه مصرف وانتوا تتحملون السكن او العكس

ثانيا : عيال العز الدفاع يصرف لهم 9000 يورو شهريا يعني من ناحيه الماده مايحاتون وتقريبا لهم مده ست شهور الحمدلله المبلغ يكفيج سكن ومصرف ودلع بعد

هناك السفاره توفر لج المترجمه قبل كانت وحده اسمها فرقد وحوريه تشتغل لحسابها اما الحين فحوريه قامت تشتغل لحساب الهيئه

نصيحه

عمليه التلقيح عاده تكون في مستشفي يو زاد وهم الافضل علي صعيد عالمي بدقه مختبراتهم وشطاراتهم بعد ماتتاكدين ان شاء الله من الحمل علي طول حولي اوراقج علي مستشفي سان لوك لان قسم متابعه الحمل عندهم الافضل

واي استفسار انا حاضره

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
مشكوره اختي

ان شاء الله ولا وحده فينا تكون مجتاجه لسفر وتحمل طبيعي يااااااارب

__________________________________________________ __________

>>>> الرد الثاني :

المشاركة الأصلية كتبت بواسطة حبيته بجنون
مشكوره اختي

ان شاء الله ولا وحده فينا تكون مجتاجه لسفر وتحمل طبيعي يااااااارب



العفو اختي
هذا الموضوع مخصص للبنات اللي سألن عن العلاج هناك وانا مابغيت احطه في رد علشان مايضيع بين الردود فنزلته في موضوع خاص والله يرزقج ان شاء الله انتي والجميع عاجلا غير آجل

__________________________________________________ __________

>>>> الرد الثالث :
الغاليه بغيت اسالج تقريبا كم ياخذ وقت لين يردون في حالة استمرينا في الاتصال والمراجعه تقريبا
وسؤالي الثاني لاهنتي يقدر الشخص يقدم عن طريق الجيش في حالة ماعنده حد يداوم في الجيش

__________________________________________________ __________

>>>> الرد الرابع :
مشكورة على البادرة الطيبة منج والله يرزقج ويرزقني ويرزق الجميع الذرية الصالحة من غير زيادة ولا نقصان

بالنسبة لتقديم الطلبات ( خاطري اقدم بس ما عندي واسطة !! الله المستعان )

يزاج الله خير

__________________________________________________ __________

>>>> الرد الخامس :
للرفع