استعمل مربع البحث في الاسفل لمزيد من المواضيع


سريع للبحث عن مواضيع في المنتدى
النتائج 1 إلى 3 من 3

الموضوع: يومياتي* اطفال الانابيب (افتح لكم قلبي) لحمل

  1. #1
    Junior Member
    تاريخ التسجيل
    May 2014
    المشاركات
    0

    يومياتي* اطفال الانابيب (افتح لكم قلبي) لحمل

    عنوان الموضوع : يومياتي* اطفال الانابيب (افتح لكم قلبي) لحمل
    مقدم من طرف منتديات الضمير العربي

    السلام عليكم ورحمة الله وبركاته

    الله يرزقنا واياكم بالذرية الصالحه ولايحرمنا من شعور الامومة

    قبل كل الشي الحمل بايد الله سبحانه وتعالى الدكتور فقط سبب ولاكن لازم الانسان يسعى
    عليكم بالاذكار والاستغفار دئما

    هالكلام ينطبق على علاجي انا يمكن من شخص لين شخص يختلف محد يحط نفسه في مكاني بس حبيت نشارك بعض وندعم بعض بالكلمة الحسنة

    انا مب شاطرة في كتابة المواضيع بس ماشوف وايد ناس تكتب عن هالموضوع وغير انه في ناس محتاجه حد تسأله ومب لاقيه فقلت نساند بعض وموضوعي يكون كالكتاب المفتوح لكل انسانه حابة تسألني طبعا انا ماعرف اكتب عربية فصحى وايد لذلك ياحبيباتي كلامي بيكون بالعاميه والي عندها استفسار تقدر تسأل بكل حب
    والي حابه تشاركنا باي تجربه شخصيه تتفضل نبا كلام من واقع وتجارب مانبا كلمة سمعت من فلانه ...

    اهلا وسهلا بكم في صفحتي

    انا يا بنات اول يوم دورة كان يوم الجمعه الماضي في تاريخ 13-6-2015 وللمره الاولى قلت اتوكل على الله واجرب اطفال الانابيب من بعد تجارب فاشله لمحاولة الحمل والتلقيح الصناعي الحمدلله

    وانا من زمان شفت مقابله للدكتور مايكل فقيه في قناة ام بي سي وسبحان الله ارتحتله وتم اسمه في بالي مع انه كل حد ينصحني بمكان لاكن في النهايه ابا اجرب المكان الي انا ارتاحله..

    يوم السبت تاريخ 14-6-2015 توجهت لعياة الدكتور مايكل فقيه (موقعهم مقابل الطب الوقائي ) تقدرون تتصلون بتلفون وتاخذون موعد وانا لانه الدوره يتني الجمعه مالحقت اتصل بس السبت الصبح اتصلت عالاستقبال قلتلها اقدر ايي واشوف د.مونيكا قالت هيه

    ورحنا انا وزوجي ونصيحه يابنات اذا زوجج من النوع الي مايتحمل انتظار المواعيد لاتشلينه معاج لانه بتمين على اعصابج

    انتظرنا هاليوم وايد لانه الزحمه كانت على دكتور فقيه بما انه له ايام معينه في فرعه في أبوظبي وماتلقونه كل يوم والناس تروحله وايد

    في فرع في دبي واعتقد العين بعد ،، تقدرون تاخذون ارقامهم من البداله وتشوفون

    نرجع ليوم السبت طبعا انا كنت على اعصابي ودخلت على الدكتوره وقالتلي كل شي زين بنبدأ ناخذ ابر منشطه من اليوم وعطتني ورقة لفحص الدم لي انا وزوجي وخلت المترجمة تشرحلي كل شي عن اطفال الانابيب والصراحه راسي عورني وحسيت اقرا من النت احسن ..
    وعلى فكره عطتني بطاقتها وقالت اي شي تبينه طرشي مسج << وبخبركم في شو نفعني بعدين

    عقب ماخلصت من الفحص قعدت انتظر النيرس لين ماتكتبلي الوصفه وورقة فحص الدم ويوم خلصت بدت تشرح وعلى فكره من كثر الابر حسيت اختبصت انا اقول يا خواتي خذو راحتكم واسألو واكتبو فتلفونكم لين ماتقتنعون بالشي

    عطتني بطاقة الابر لمدة 3 ايام يعني السبت ابدأ نفي اليوم بعدين الاحد ابره بعدين الاثنين ويوم الثلاثاء اخذ موعد واشوف الدكتوره

    وبالفعل رحت وعطيت الكاشير الورقه مالت الدفع (عن طريق بطاقة ثقه تغطي التكلفة) وعطتني ورقة الابر ونزلت المختبر سويت فحص دم وبعدين زوجي سوا وعطيتهم ورقة الابر

    ظربتني اول ابرة في بطني تحت السرة بشوي اللي هي اسمها جونال وبعدين قلتلها انا ابا اكمل بروحي فالبيت مابا ايي كل يوم عشان اظرب وقالتلي لازم تقريبا يكون نفس الوقت ومايضر لو اختلاف ساعه

    وعطتني الابرة وراوتني كيف استخدمها طبعا لو شرحتلكم مابتفهمون بس يعني يابنات اسألو كثر ماتقدرون لاتستحون

    وبعدين عطتني وصفة ابرة المضاد الحيوي + حبوب مضاد ابدأ اخذ حبتين من اليوم الثاني اللي هو كان الاحد .. للاسف ماعندهم صيدليه عشان اشتري هالابره وقالت هاي تنضرب فالخلفيه وحسيت ماقدر اضربها بروحي ولا اقدر اشتريها وارجعلهم لانه بيتي بعيد فقررت اني اخذها من الصيدليه واضربها فأي عيادة وسألتها عادي قالت هيه عادي راويهم البطاقه وانا اعتمدت على هالكلام >>>> انتبهو زين لهالنقطه

    وطلعت ومريت الاستقبال عشان اخذ موعد يوم الثلاثاء نفس ماخبرتني الدكتوره وخذت موعد واتجهت الى الصيدليه القريبه من بيتي وحصلت ابرة المضاد +
    حبوب المضاد الي ببدأ اخذهم من ثاني يوم .. وعلى كلام النيرس رحت عياده قريب من بيتي وقلتلهم انا جي جي سالفتي قالو لا مايصير نضربج الابره قلتلهم كيف بس شوفو هاي بطاقة الابر وانا اشترتها والخ

    قالو مانعين هيئة الصحة اي ابره او دوا يدخل من برع ولو كان من فرعهم الثاني لانه ممكن يأثر على المريض المهم قالت الدكتورة اول بشوف اذا في فالصيدلية اقدر اعطيج اياها بس وطبعا هالكلام عقب سالفة يعني مستحيل مره ثانيه يرضون وياخسارة المضاد الي اشترته من الصيدلية هههههههههههههه المهم اول شي قالتلي جرعة المضاد كبيرة كانت 1000 ليش يعطونج هالكثر قلتلها هي دكتورتي وهي ادرى يعني بعدين قالت لا بنسويلج تجربة اذا عندج حساسيه منه ةعقب بنعطيج وقلتلها اوكي
    ويت النيرس وحطت شوي منه فايدي تشوف اذا بحسس وعقب 10 دقايق اتنظار الحمدلله ماتحسست منه وعطوني اياه ورديت البيت

    ثاني يوم الاحد تاريخ 15-6-2015
    خذت حبة مضاد مع الريوق حبة حديد عالغدا والعصر ضربة ابرة جونال وعالعشا مره ثانية حبة مضاد

    ثالث يوم الاثنين تاريخ 16-6-2015
    خذت حبة مضاد مع الريوق حبة حديد عالغدا والعصر ضربة ابرة جونال وعالعشا مره ثانية حبة مضاد
    وبجذي خلصت ابر

    يوم الثلاثاء 17-6-2015
    كان في حبتين مضاد بعد + حديد
    ورحت موعدي والحمدلله فحصتني الدكتوره وشافت كل شي زين ولله الحمد والشكر وقالت راح نكتبلج على ابر مره ثانيه بس هالمره في 3 ابر بتكون مع ابرة جونال
    نزلت المختبر لعمل فحص دم مره ثانيه
    وضربتني ابره في نفس المكان فالبطن ونسيت اخبركم انه مثلا اليوم ضربت جهة اليمين من بطني ثاني يوم اضرب جهة اليسار يعني بالتناوب
    فهي ضربتني جهة اليسار لانه يوم السبت كان جهة اليمين الاحد يسار الاثنين يمين
    وبعدين راوتني الابر الثانيه الي لازم اخذها لمدة 3 ايام طبعا من شفت ابرة سيتروتايد خفت لانه يعني قصه سالفتها وفالعياده يضربونج اياها اسهل
    توكلت على الله وقلت ماعليه علميني كيف وعلمتني وقلتلها خلاص كل شي اوكي وخذت الابر معاي
    بجذي بيكون عندي ابرة جونال فيها 3 ابر للتبديل ومحلول يكفيني 3 ايام الاربعاء والخميس والجمعه
    3 ابر سيتروتايد تكفيني الاربعاء والخميس والجمعه
    ويوم السبت ارجع اشوف الدكتورة+دكتور البنج لاني اول مره اسوي عملية ببنج فلازم يشوفني

    يوم الاربعاء 18-6-2015حبتين مضاد طبعا صبح ومسا + حبة حديد
    ابرة جونال فالبطن وفي نفس المكان ضربة ابرة سيتروتايد
    هني بقوللكم في شو استفدت من رقم الدكتوره اول ماضربت ابرة سيتروتايد تفاجأت بطني صار فيه بقع حمره وكأنه شي لادغني منتفخ وخفت وايد قمت طرشت مسج حق الدكتوره قالت عادي وسويت سيرج وقريت انه ممكن يسبب احمرار وحكه بس بعد تميت خايفه طرشت صورة البقعه للدكتورة وقالتلي عادي يصير وتقدرين تاخذين زيرتك
    يوم الخميس 19-6-2015بما اني فالدوام للحين بكون ماخذه بس حبة مضاد
    وللحديث بقية
    اذا ماشفت ردود حلوه ومشاركات بزعل ومابخبركم شي

    >>>>> ردود الأعضـــــــــــــــــــاء على الموضوع <<<<<
    ==================================

    >>>> الرد الأول :
    الله ايسر لج يارب والله يثثبت اجنتج ويرزقج الذرية الصالحة يارب
    توكلي على رب العالمين عليج بالاستغفاااااااار و قيام الليل وصدقة
    الله يفرحج ويفرحنا يارب

    __________________________________________________ __________

    >>>> الرد الثاني :
    هلا اختي ..حلو موضوعج فديتج .. انا بعد امر بنفس التجربة وبنفس المركز بعد فقيه بس الفرق ان انا بفقيه اللي بمستشفى برجيل بس عند دكتورة لمياء وهي نفسهاىاللي كانت مع الدكتور فتطيمي قبل لا يصير المركز لفقيه لان الدكتور فاطيمي طلع بيسوي بيزنز خاص فيه ..بس هي وااايد شاطرة وتدربت ع ايد الدكتور فاطيمي تبع البعثة البلجيكية وماشاء الله تعاملها وااايد ارتاحلها..وتقريبا انا مريت لنفس خطواتج بس مع فارق اني ماخذيت المضاد الحيوي يعني ماوصفوه لي .. وكمان ماصار لي اي اثر من السيتروتايد بس حرقان اثناء ضربها .. وكمان مارجعت الاجنة بعد خمسة ايام من السحب لان الدكتورة خافت ان يصير عندي فرط اباضة لان عدد البويضات اللي انسحبن كثير ماشاء الله من شان جي جمدوهن لي وقالت بعد الدورة الثانية بتسويلي الترجيع وعطتني من ثاني يوم الدورة الثتنية من بعد السحب وعطتني بروجليتون وبريدينزيلون وفوليك اسيد وبيبي اسبرين ومستمرة عليه تقريبا 11 يوم وقالت الاثنين اليتي بتسويلي ان شاء الله الترجيع .. وان شاء الله يارب يتمم لي ولج على خير ومايي رمضان الان والله كاتبلنا الحمل بإذنه تعالى

    __________________________________________________ __________

    >>>> الرد الثالث :
    الله يرزقكم الذرية الصالحة يارب بس اختي انا باسالج عن بطاقة ثقة مالج اي رقم 1ولا2ولا3 وأي إمارة ومشكورة اختي

    __________________________________________________ __________

    >>>> الرد الرابع :
    بالتوفيق عزيزتي والله يرزقك الذرية الصالحه


    __________________________________________________ __________

    >>>> الرد الخامس :
    حلو موضوعج ذكرتيني بتجربتي مع الدكتور وليد السيد بس ان شاء الله ناويه أعيد التجربة يا مع برجيل أو فقيه للحين محتاره


  2. #2
    Junior Member
    تاريخ التسجيل
    Feb 2015
    المشاركات
    2
    السلام عليكم حبيبتي.. الله يرزقك و يرزقنا جميعا الذرية الصالحة.. طمنينا شو صار معك ؟؟
    أنا عم أفكر أروح عند الدكتور مايكل.. بعد تجربتك بتنصحي في

  3. #3
    Junior Member
    تاريخ التسجيل
    Feb 2015
    المشاركات
    2
    السلام عليكم حبيبتي.. الله يرزقك و يرزقنا جميعا الذرية الصالحة.. طمنينا شو صار معك ؟؟
    أنا عم أفكر أروح عند الدكتور مايكل.. بعد تجربتك بتنصحي في

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •