السلام عليكم يا بنات
رجعنا لكم بالجزء السابع من سلسلتنا
اليوم بنتكلم عن ماركة يمكن اول مرة تسمعون عنها
الي هي ريل نيكنيك Real Techniques هالماركه بس لفراشي المكياج حاليا وهي بريطانية
هاي الماركة طلعتاهه وحده كانت تسوي فيديوات تعلم الناس عن المكياج هي واختها اسمها سمانثا شامبان Samantha Shampan هالاختين يسوون الفيديوات ولو تبون تتابعون فيدوياتهم اسم قناتهم pixiwoo
المهم وحده من هالخوات طلعت هالفراشي الي عباره عن فراشي للاستخدام البروفيشانال جميع الفراشي اسعارها وااااو وااااو واااو والكل يقدر ياخذها يعني اكبر فرشاه الي هي فرشاه البودره سعرها 9.99 دولار يعني 10 دولارات فقط والشحن لانها خفيفه بياخذ عنج بحدود الدولار إلى 2 دولار لكل فرشاه وباسرع واغلى طريقة شحن الي هي الدي اتش ال اكسترا برويوريتي يعني يوصلنج من تاريخ الي دفعتي البيزات لين عندج خلال 3 او 4 ايام فقط
المهم بلى قرقر وايد ونبدا بالصور
هني الكوليكشن مالي الي طلبته
طلبت كل الكوليكشن ماعدا ست فراشي العين لانهم ما عيبوني الي اتيج لونها بنفسجي كلها من النوع المفعوص المفلطح وهالنوع ما احب استخدمه في مكياج العين احب المدور والفلافي مثل فراشي ماك رقم 219 او 217
هني فرشاتين فقط من فراشي العين الي يات مع الست مال فراشي الويهه الي طلبتهم
هذا الي اقصده بالمفلطحين والمفعوصين بالنص
وهني وحده من الست البنفسجي لفراشي العين
ممكن استخدمها هاي
نبدا بالريفيو باسم الله
نوع الشعر : صناعي
المقبض : معدني ومن تحت رابر الفراشي لها قاعده مسطحه ممكن انها توقف على الطاولة
وزنها: خفيفة نوعا ما لكنها اثقل حبة عن الفراشي المتعارف عليها والسبب جزء الرابر الاسود الي باخر الفرشاه وهالشي لحد الان ما ضايق بي بالاستخدام ولكن يحتاج ايد متمكنه ولازم تقبضينه بشكل غير عن قبضة باجي الفراشي لانه وزن الفرشاه بيتم يمطط الفرشاه لتحت ( ان شاءالله فهمتوا قصدي ) بشكل عام استخدامها سهل ما اقول انه صعب او شي لكن بيختلف استخدامها نظرا لشكل المقبض المختلف عن باجي الفراشي بس مب شي تعجيزي او صعب
كواليتي الصنع : عااالي (شي واحد لاحظته خلاني انزل درجة الكواليتي من بيرفكت إلى عالي الي هو بعض الفراشي مب كلهم لاحظت شعره وحده سوده طالعه عن مستوى الفرشاه هالشي لاحظته في فرشاتين اضطريت اني احرطهم لصوب واقصهم بالمقص غير عن جيه مافي شي يذكر عن الكواليتي )
ثبات الشعر: ثاابت ولا شعره طاحت لحد الان اول ما يبتهم على طول غسلتهم وماشفت شي طاح اللهم لك الحمد
الحفاظ على شكل الفرشاه: جميع الشعرات لما تنشف الفرشاه ترد لمكانها الطبيعي ماشي شعيرات تطلع هني والا هناك وهاه احسن شي بالشعر الصناعي انه ما تعانين من بروز الشعرات من مكانها لانه الشعر الطبيعي مهما كانت جودة صناعه الفرشاه مع تكرار الغسيل والاستخدام يفقط طبقة الكيراتين الي تغلف الشعره وتصير الشعره عرضة للتكسر فتحسينها تهتري وتبدا تضعف وتتقرمط شوي وبالتالي تبرز من مكانها وتخرب شكل الفرشاه
نعومة الفرشاه: ناااااااااااااااااااعمة بشكل جميييييييييييل جميل جميييييييل ^_^
باخذهم مرة ثانية : اكيد لو نزلوا كوليكشن يديد ان شاءالله باخذهم
والسعر مثل ما قلتهم وااايد روعه وما تدفعين وايد على الشحن لانه وزنها خفيف
توافرها : لحد الان مش موجوده الا اون لاين ممكن تطلبينهم من امازون يوفرونهم لج انا عن نفسي طلبتهم من موقع ثاني لانه امازون من كثر ما يطلبونهم الناس شيش فراشي كانت اوت اوف ستوك (مخلصات) فطلبتهم من موقع امريكي اظن اسمه Iherb
ملاحظة مهمه بالنسبه للطلب والسعر اسعارهم في موقعهم نفس اسعارهم في امازون لكن الموقع مال ريل تيكنيك ما يطرش الا لامريكا وبريطانية او اوروبا وشي مواقع اتطرش لين باجي دول العالم لكن سعر الفرشاه دبل دبل سعرها الموجود في امازون او في ريل تيكنيك فانتبوا ما تطلبون من هالمواقع البريطانية الي مدبلة السعر من غير سعر الشحن طلبي من امازون او امازون بيوديج لموقع ثاني امريكي يبيع الفراشي بنفس اسعار امازن انا موقع اي هيرب من امازون حولوني عليه وطلبت منه اي شي يحولونج منه امازون عرفي انه مضمون ولو صار خلل او خطا او ضاع حقج امازون بيتكفلون انهم يردون لج حقج وبيتواصلون مع الموقع من جيه امازون من احسن واجود مواقع البيع اون لاين لانه تقريبا يضمن حق المشتري
الحين بنقارن شوي بين هالفراشي وفراشي نوع اخر من ماركات ثانية عندي من نفس نوع الفرشاه
فرشاه البلاش من ريل تيكنيك مع فرشاه الباودر من بوبي براون
نفس الشكل ونفس طريقة قص الشعر
نوع شعر بوبي براون طبيعي شعر حصان اما ريل تيك فهي صناعي
النعومة نفس النعومه تقريبا بس لحد ما الريل تيكنيك حسيتها كانها حبة انعم عن بوبي براون
الكواليتي : ماحسيت شي فرق
الكثافة : بوبي براون حبة اكثف عن ريل تكينيك بس لازم ننتبه ان فرشاه بوبي براون للبودره فلازم تكون نوعا ما كثيفه عشان تضمن توزيد البودره على كل منطقة بالويهه اما الريل تكنينك فهي للبلاشر فلازم تكون فلافي نوعا ما عشان توزع البلاشر بطريقه هادية وناعمه وما تركز اللون في مكان واحد وهالشي ممتاز للي مبتدئات بالمكياج ويعانين من صعوبة وضع البلاشر مع اني جربت الفرشاه باستخدام بلاشر ديبورا الي يصبغ بقوة وحطت الفرشاه طبقه خفيفة وتميت اعيد كمن مرة لين وصلت للون المطلوب
السعر : بوبي براون +300 درهم وريل تيك بحدود 45 درهم مع الشحن خليها 50 او لو توصل 60 درهم بعد تظل يابلاش (انتبهوا للموقع الي تطلبون منه لانه المواقع البريطانية دبل السعر)
انزين المقارنة الثانية بين الستريبيلينق براش من ريل تيك مع شبيهاتها من ماك وسيجما
هني تلاحظون انه الستيريبلينج براش من ريل تيك شكلها غير اقصر وكثافة شعيراتها اكثر ووااايد حبيتها لانها بتظمن توزيع الاساس بطريقة متساوية ولانها كثيفة واقصر اتيج ثابته ما تنفعص الشعرات وبالتالي تدخل الاساس للبشرة وتدمجه عدل خلاف مال سيجما وماك مول ما استخدمهم كفرشاه لتوزيع الاساس لانهم بالنسبة لي خفاف وايد فاستخدمهم للبلاشر
غير عن جيه من ناحية الكواليتي والنعومة لا تعليق نفس الشي (هاي الفرشاه شفت منها شعره وحده سوده ناقزة اضطريت اقصها ) غير عن هالشي ما عندي كلام عليها
وهني فرشاه سيفورا مع فرشاه البيرفكت فيس من ريل تيك
كواليتي ممتاز للاثنين بس ريل تيك مضغوطه من النص شوي فتحسينها ياية بيضاوية شبه مفلطحه مقارنة مع سيفورا الي مدورة مكورة
استخدامهم اثنينهم روعه وتحتاجين للتنويع بالفراشي لحد الان هاي اول ماركة اشوفها توفر هالنوع من الفراشي كثيفه وشعرها قصير وشوي مضغوطه مب مدورة كامل
واخيرا فرشاه البودرة
هالفرشاه روووعه عوووووده وكثيفة وناااعمه
مقارنة مع سيجما وبن ناي
سيجما اكثف من ريل تيك
ريل تيك اكثف عن بن ناي
النعومه ريل تيك انعم عن سيجما تقريبا نفس نعومه بن ناي
كواليتي كلهم تمام ما عندي كلام عليهم
سيجما حبيتها اكثر عن هالفرشاه لانه شعراتها اقصر حبة وبالتالي تعطيج تحكم احسن واكثف فتوزع احسن لكن بعد حبيت ريل تيك لحجمها لانه نادر ما تحصلين فرشاه بودره عملاقه جيه ^_^
وخلاص خلصنا
ترقبوا الجزء الثامن بماركة فراشي اخرى اسمها ايكو توول لها قصه روعة هالفراشي واسعارها واو واو واو والكواليتي صدمني الصراحه ما تخيلت جيه الي وصلني بس فرشاه اتريا الطلبية الثانية توصل وبطلب باجي الكوليكشن وعقب بحط الموضوع
صورة عشان احمسكم للموضوع
دعواتكم لي بالتوفيق والصلاح فديتكن ^_^
من زمان في خاطري آخذ هالفرش والحين شجعتيني يزاج الله خير .. وضحتي لنا أشيا ما افتكرنا فيها ..
رد مع اقتباس
