مساء العسل حبيباتي وربي يوفق كل المخطوبات
ويرزق كل البنوتات بأزواج صالحين
ويسعد كل العرايس ياااااااااااارب
ويهني كل المتزوجات
اليوم حبيت نوريكم فكرة عن الاعراس في عاصمة ليبيا الحبيبة طرابلس
والي تتميز عن بقية المدن بعاداتها و تقاليدها الخاصة
اول شي حفلة الزواج تقام في احدى القاعات ، وتتناسب الاسعار
حسب المقدرة المادية للمواطنة و ذوق العروسة و عدد المعازيم
بداية وانتي داخلة لابد يضيفوك بالشكلاطة ، الي فكل عرس تختلف عن الاخر
اعراس فيريرو واعراس باتشي واعراس كواليتي ستريت
واعراس شكلاطه من جينيف ، واعراس شكلاطه مخصوص من برا ههههه
كل حد ومادياته ،، بس في العادي تكون زي الي ذكرتهم بداية ،
اول شي يقدم المشروب الذي عرفه اهل طرابلس من ايام الاحتلال الايطالي
وهو الروزاطا ، وهي عباره عن عصير اللوز مع الحليب ( يعمل بطريقة خاصة )
طعمه حلو ومميز ، ويحبه الجميع لأن لونه ابيض كفستان العروس
ومعاه العبمبر ، وهو عباره عن حلوى من زلال البيض
ونكهة اللوز تعلمها اهل طرابلس من الايطاليين ايضا ايام الاحتلال
وبعض الناس كتغيير او موضة الان ، يقدمون عصير الطبقات
الي نسموه في ليبيا ( عصير هافانا ) ومعاه الماكرون
الذي تحبذ العروس ان يكون لونه كلون مسكة الورد وديكور الصاله
( اناقة زايده يعني ^_^ ) ههههههههه
مثلا مسكتها فوشيا ومكياجها
فتطلب من ادارة الصاله ان لون المفارش والاكسسوارات يكون فوشيا
والتوزيعات وكذلك الماكرون ،، مثال طبعا وكل وحدة وذوقها
بعدين لو العريس داخل مع العروسة ، يقطعوا الطورطة سوا
ولو مثلا مستحي ودخلت وحدها حتوزع مع الشاهي والقهوة
حلويات ليبية ( حديثة او قديمة وفي العادة يكونوا اربع او خمس قطع )
طبعا الحلويات ينعملوا زي التوزيعات يعني في باكيت مربع ومزين
بزينه حلوة زي الديكور
او قطعة كيكة زي الي تحت في الصورة
وبعدين جا دور المكسرات ، وتكون في صحون صغيرة
او في اكياس قماشية صغيرة مزينة بزينة جميلة
وأخيرا العشاء و يكون عبارة عن صحن لكل ضيفة
ويحوي رز بالمكسرات او مكرونة بصلصلة المفروم او شعيرية بالمكسرات
ومعاها اربع قطع اخرى متنوعة ما بين دجاج ولحم وخضار و اثنين صنف
من السلطة أو أكثر ، وكل ذلك على حسب مقدرة الماديه
وهذي عينة لصحن العشاء (الصورة طبعا للشيف عواطف )
وبعد العشاء واحنا خارجين يجي دور الكوفيتي
وهو حلوى ايطاليه قديمة من ايام الاحتلال ايضا ^_^
تكون من داخل بالشكلاطة او باللوزة و غلافها صلب من السكر
وتوضع في زينة زي هالوردة مثلا او في صندوق حلو زي الي بالصورة
ومعاه البكلاوة الطرابلسية والتي تختلف عن التركية بالمرة ،،
الا اني احبذها اكثر ، فطعمها مميز واكثر اكثر من تهبلللللللل
لاحظوا حباة الكوفيتي هن البيض المطويات كالبتلات
وهذي صورة البكلاوة الطرابلسية والي يتم تقديمها في باكيت خاص بيها
زي التوزيعات يعني
وهذي لقطتين لكوشة احدى الصالات لأنها تعجبني
يدكور حلو مريح واكسسوارات انيقة وواااااااااااااسعه
و سقفها عااااااااالي وتصميمها المعماري حلو حلو حلو
بس للاسف مالقيتش صورتها كلها ، بس الكوشة
وهذا طبعا عرس عادي ، بس الناس الهاي اعراسهم غير
والناس الي وضعهم اقل من العادي نفس الي ذكرته بس يختصروا
مثلا في العشاء بدل اربع قطع يعملوا 3 معاهم رز و سلطة
او قاعة تكون بتكلفة 2017 دولار مثلا
يعني ،، وهكذا
عموما حبيت نعطيكم فكرة ، أمانة ادعولي بالزوج الصالح
انا وسائر بنات المسلمين يااااااااااااااااااااااارب
وباذن الله حنحطلكم صور عرسي بالتفصيل ههههههه
من ليلة الحنة الى شهر العسل ، يااااااااااارب
وربي يكمل بالخير عليكم يالمخطوبات ويهنيكم يا احلا عرايس
يااااااااااااااااااااارب
رد مع اقتباس
