المشاركة الأصلية كتبت بواسطة R A N S H E Z
السلام عليكم خواتي
ما بطول عليكن لو تسمحن وما عليكن اماره
في عروس ميزانيتها 50.000 درهم وتبا تعرف كيف تقسمهن
يزاها الله خير اللي ترد لو بدعوه او رفع
والسموحه
الله يتمم لها على خير ان شاءالله ويسعدها ويهنيها
* تجهيزات ليلة العرس:
- فستان العرس = 10,000
- المكياج والتسريحة = 3,000
- الحنا = 800
- المسكة = 500
- اكسسوار الشعر = 300
فيه تجهيزات اخرى تعتمد ع العروس اذا تسوي جلسات ليزر او حلاوة وحمام مغربي وبدكير ومناكير او كيراتين للشعر ..
* زهبة العروس:
- الذهب = 15,000 طقمين (فضي وذهبي)
- الشنط والجواتي = 2,000
- ملابس داخلية = 1000
- بجايم = 1000
- اكسسوارات = 500
- الساعات = 2000
- مشط + سشوار + شباصات للشعر = 600
- شنط الزهبة = 500
- العبي والشيل = 3000
- كنادير عربية = 1000
- موديلات مغربي = 2000
- جلابيات البيت وشيل صلاة = 3000
- ملابس نوم = 3000
- مكياج = 800
Total = 50,000
ان شاءالله ماكون نسيت شي
وان شاءالله الاسعار الي حطيتها تكون مناسبة .. والمفروض كل عروس تتقيد بالميزانية مالتها عشان ماينقصها شي، مابتقدر تشتري كل شي، حتى نحن الي ميزانيتنا عاليه نوعاً ما مانلحق نشتري كل شي
هو اهم شي مصاريف تجهيزات ليلة العرس هاييل اهم شي، وان شاءالله تقدر تقلل المصاريف اذا قدرت .. لازم تشتري كل شي بقياس وبأعداد معينه يكفي .. عقب بتطلع ويا ريلها وبتروح تشتري اشياء يديدة ان شاءالله ..
الله يوفقها ويسعدها ويهنيها يارب
- بالنسبة للكنادير العربية والمغربيات ترا سوق الشارجة الجديم يفصل اشياء روعه واسعارهن 200 - 450
- فساتين العرس عند التاجرات الي يأجرن فساتين
- الساعات والاكسسوارات متوفرات في كل مكان وبأسعار معقوله سواء من الانستقرام او باريس غاليري ، يعني غير ساعة العرس
بميزانية 2000 بتقدر تاخذ جم ساعه من باريس غاليري ماركات او من الانستقرام يبيعن الحريم اشياء رووعه
والمغزى مب فالعدد مب شرط تشتري 20 ساعه .. اعتقد 5 ساعات راقيه وماركات يكفي
الشنط والجواتي اشياء مهمة بالنسبة لي .. لانهن اول شي يشوفونه الناس حتى لو كانت البنت لابسة عباة ساده مافيها شي .. وانا اشتريت جواتي رووعه من محل new look كانو مسوين تنزيلات والواحد كان ب 50 - 100 ومن غير التنزيلات يكون سعرهن 200
وعندهم كل شي فلات وكعب ..
احسن دايماً تشتري فالتنزيلات اذا بعده باجي عن عرسها وقت
الملابس الداخلية لاسنزا ملابسهم جودتها عاليه وتدوم عندج فتره طوييله ويسوون تنزيلات تقريباً كل شهرين يعني 5 تشكيلات ب 500 تقريباً
فكتوريا سيكرت شوي غالي وعندهم اشياء روعه اما نعومي انا ماحب المتيريل الي عندهم بس لاحظت انهم واايد قامو يسوون تنزيلات
وفيه اماكن ثانيه مثل ماركس آند سبنسر ومحل ماكس .. اسعارهم مناسبه بعد
البجايم تقريباً سعر الوحده 200 فالمحلات الي فالمولات .. اما عند التاجرات الي ع الانستقرام اقل شوي .. وفيه بعد المعارض ( فالعين عندنا معرض الخبيصي) الي يفتح كل شهرين يمكن تكون اسعار البجايم اقل طبعاً ، ويبيعون جلابيات الثلاث ب 1000 ويكونن جلابيات راقيات مثل الدراعات الكويتيات بس شوي ابسط ، على مكياج خفيف واكسسوارات ناعمه بتكون العروس انيقة حتى فالبيت
العبايا والشيل انصح بالشارجه وعيمان لاسعار اقل .. وطبعاً بسرعه تروح موضة العبايا الا اذا كانت عباه سادة او فيها شغل خفيف اسود
افصل انا فالغالي والرخيص .. فالشارجه العباه ب 350 غالباً وحتى لو قال سعر اعلى كاسري ولاتقبلين تدفعين
حلوان / العهود / السوق الجديم
فالشارجه
وفيه عبايا غاليه بس فخمات وحلوات حق عروس، فيه حرمة اسمها (المها) تفصل عبايا واايد فخمه ومميزه بس تقريباً سعر الوحده ب 1800
وفيه غيرها حريم واايد بعد يمكن اسعارهن اقل شوي بس ماجربت الا عند المها
الاسبوع الي طاف رحت السوق الجديم وفصلت عباتين ف محل العريش الي فالشارجه ب 620 والعبايا حلوات وع الموضه، فصلتهن للدوام
اذا محتاجه اي مساعده فالج طيب
رد مع اقتباس
