عنوان الموضوع : لو كنتي مكاني شو بتسوين؟ عروسين بنفس القاعة عروس الامارات
مقدم من طرف منتديات الضمير العربي

السلام عليكم ،

أولاً انا اسمي مها مب فاطمة هذا نك ربيعتي لاني حاولت افعل حسابي وماشي فايدة
طبعا مستأذنه منها..


المهم، أول مرة اطرح استشارة من هالنوع العائلي فمنتدى
بس لثقتي فيكم وفآرائكم ..


السالفة الله يسلمكم..

انا وريلي بنعرس بعد رمضان
المهم، واخو ريلي العود واخيرا لقى عروسته المنشودة
وبيملج قريب ، ومستعيل يبي يعرس قبل رمضان بس اهله رافضين
فقالوله سوي العرس بعد رمضان

وتعرفون هالسنة الاعراس كلها شهر 8 بعد رمضان
فمافي حجوزات قاعات..

وهو اصلا مايبي يسوي عرس لاسباب خاصة فيه
بس لانه ولدهم البكر فيبون يفرحون فيه..

غير سالفة انه ماشي قاعات اصلا فاضية
هم اغلب اهلهم ومعازيمهم من برى البلاد
يعني لازم يسافرون ويتعنون عسب يحضرون العرس..

فاقترحوا اهل ريلي ان الاخ الكبير يتزوج ويانا فنفس اليوم وفنفس القاعة للاسباب التالية:
1- ماله داعي مصاريف زايدة وليش يسوون عرسين فقاعتين دام بنعرس نفس الشهر
2- عشان اهلهم اللي من برى مايتعنون واييون مرتين، لان اصلا هم وايدين ومايرومون يباتون اسبوع مثلا بييون يوم وبيروحون
3- عشان ماله داعي يفصلون فساتين حق مناسبتين ومرة وحدة احسن ليش نحضر عرسين > هذا راي بعض الحريم.

وقالوا الاخوان الرياييل عادي بنفس القاعة بس نحن ماينفع ثنتينا مع بعض لان الناس بتقعد تقارن وحالة
ومب حلو وماعرفها اصلا البنت يعني لو انها اختي عالاقل كنت بوافق..

فاقترحوا عسب " ما ارفض"

ان العرس للزوجة الثانية يكون من العصر للمغرب وعقب ياخذها ريلها ويطلعون
ومابينزلون لهم عشا! بس قهوة وهالسوالف لانه مب وقت عشا

وعقب عرسي من 8 ل 12 الوقت المعتاد..

........

بالنسبة لي انا رافضة
لا وياي فنفس الوقت ولا قبلي،

لان ما اضمن الصراحة شو يصير ممكن يوصخون القاعة او اشياء تخترب وبصراحة ماودي حد يشاركني فقاعتي! بروحه اصلا توتر وتخافين اشياء ماتضبط فكيف حد يستخدمها قبلي ماعرف شو مفاجآت الطريق!
او اهل العروس يطلعون متاخر ومعازيمنا يدخلون ومايعرفون شو السالفة وشو هاللخبطة صراحة ماحبيت الشي ابدا مب داخل مخي

وام ريلي تقول عادي بنقنعها بنييب خدم ينظفون ورى المعازيم واي عذر عندها له حله
وناويين يتصلون فيني بعد اسبوع يعني بعد ملجة ولدهم عسب يقنعوني ...


،،،،،

لو مكاني شو بتسوين؟
وكيف اقنعهم بسبب رفضي؟ ريلي يقولي انا ماعندي مانع بس هم بيقولون كلامج مب مقنع
انتظر رايكم



..

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
اذا انتي مب مقتنعه ارفضي و اصري على رايج
وخل اخو ريلج يسوي خيمه لو ماشي حجوزات

او يعرس بدون عرس اذا وايد مستعيل ومايبا يصبر
هذا مب ذنبكم خله يدور


واذا وافقتي يكونون وياج بنفس اليوم
الحركه اللي اقترحوها مووووووووول مب شي
ارفضي رفض قطعي

وااااااايد احسن انج انتي وهي يسوون لكم كوشتين
وتدخل هي عقبج بنص ساعه مثلا

ورياييلكم ماله داعي يدشون

او الحل العروس الثانيه تطلع قبلج ويزفونها لريلها مب لازم يدش القاعه

وانتي عقب ريلج يدش ويستمر العرس عادي

__________________________________________________ __________

>>>> الرد الثاني :
هلا حبيبتي
ترى هو مابيدش القاعة
بتم هي واهلها واهل ريلي من العصر للمغرب بيزفونها وجي
وعقب هي بتطلع وبياخذها ريلها وبيطلعون معازيمها

بس بعد احس مب عاجبني
يعني يمكن يتاخرون يطلعون يستوي شي ولا شي
وعقب هي ومعازيمها طالعين ونحن معازيمنا يايين


كيف اقنع ام ريلي اني مب موافقة
ماودي ييلسون يرمسون عني من احين ويقولون هاي انانية ولا شي جي
والله وهقة بنات ساعدوني

__________________________________________________ __________

>>>> الرد الثالث :
عادي وضحي لها انها ليلة بالعمر وحابه تكون ليلتج بروحج من حقج


او انج تسوين اللي قلت لج عنه
والله ما انصح تدش قبلج وتعرس العصر
اكيد بيصير لخبطه وانتي بتمين على اعصابج

__________________________________________________ __________

>>>> الرد الرابع :
انا عرسي صار بنفس يوم عرس اخو زوجي وكان عروستين بنفس القاعه وبنفس التوقيت

ما اقول انة الامور كلها بيرفيكت لانه صار مقارنات وووو

بس في النهايه انا وافقت على هالشيء وماندمت لاني من البدايه ادري انه طبيعي الناس تحب تتكلم خير شر

بس قلت معليه بخفف على زوجي لانه هو كان متحمل كل المصاريف ماله ومال اخوه

والحمد لله تم على خير مايهمني الناس ابدا اهم شيء شيء متقنعه فيه

استخيري ربك والي مقتنعه فيه سويه اهم شي تتحملي نتيجه القرار وربي يوفقج

__________________________________________________ __________

>>>> الرد الخامس :
الله يكون بالعون بصراحه توتر
لكن حاولي يا عروس ما تزعلين احد وحاولي تختاري حل يناسب الجميع

لو مكانك مستحييييييييل ارضى ان العروس الثانيه تفوت قبلي , لكن ارضى ان يسوو كوشتين بنفس الوقت , انا ادخل بالأول وبعدين هي ,وخليكي واثقه من نفسك لا مقارنات ولا شي
اصلا الناس بكره تشوفكم بمناسبات ثانيه وبكل الأحوال هيكون مقارنات

وممكن اقترح انهم يسوون خيمه بجاانب الصالة للعروس الثانيه

او ان الصالة نفسها تنقسم بديكور حلو لصالتين بحيث كل عروس تكون بجهه مستقلة

وخبريني شو بيصير معك , والله يهدي بالك ويتمم امورك على خير , ومثل ما خبرتك حاولي تكوني عملية وتوجدي حل وسط يرضى الجميع ماله داعي المشاكل والعناد ,تخافين اهل ريلك يحطونك براسهم وينكدون عليكي بشكل او بآخر سواء بالعرس او بعده