عنوان الموضوع : غرفة بناتي دليل العروس
مقدم من طرف منتديات الضمير العربي

مرحبا الغاليات

بغيت اغير ديكور غرفة البنات عندي

قلت بشاور بنات المنتدى الغالي اللي كلهن ذوق وفن


اولا : مساحة الغرفة 19 قدم مربع يعني تقريبا 1.5 متر مربع ذات زوايا قائمة

ثانيا : فيها شباك واحد ، مقابله في الجدار الثاني باب الدخول

ثالثا: أثاث الغرفة اريده عبارة عن سرير يناسب بنتين العمر خمس سنوات وسنة و4 شهور + خزانة ملابس + كوميدينو + سجاده ديكور + اباجورة + رفوف للكتب + مكتب دراسي صغير + خزانة إضافية للألعاب( اختياري)

رابعا: انا فكرت في اللون الأخضر الفاتح والبنفسجي الفاتح يعني جدار وجدار

خامسا: اريد اعرف احسن نوعية صبغ ما تسوي ريحة قوية واقدر اصبغها بروحي من غير ما احتاج لعامل ومن وين اشتريها وكم بتكلف؟

سادسا: الستارة عندي خضراء بدرجات والأرضيه خضراء غامق، هل يناسب ويمشي حاله مع الديكور المنتقى؟ ولا أغيرهم؟

سابعا: والأثاث الأحسن من حيث النوعية من وين أقدر اشتريه( هوم سنتر ولا هومز أر أس ولا حول الإمارات أو غيرهم؟)

ثامنا: حاولت اشوف موديلات لديكور غرف البنات المنتشرة في النت بس لقيتهم مبالغ فيها يعني حق بيت المستقبل مب بيت إيجار( اللي ساكنه فيه الحين)

تاسعا: بنتي العودة ( شماني) تحب أميرات ديزني وكأنها تباهم مزروعات عندها في ديكور الغرفة بس انا ما افضل احطلها صور بهالطريقة، ولا شو رايكم؟


عاشرا: ادري غثيتكم ( كأني في مسلسل نعم ولا) بس عشمي فيكم كبير

وإن شاء الله بلاقي الرد الشافي عندكم لأني أريد ابدأ بسرعة وكل شهر اسوي شي

والسموحة يالله اتريا دودكم

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
السلام عليكم ورحمة الله وبركاته

اولا اختي الله يباركلجفي بناتج وتفرحين بهم
ثانيا انا عن نفسي اشتري الاصباغ من ايس هاردوير وهوعندنا في دبي في شارع الشيخ زايد وفي الفيستفل سيتي وعندهم تختارين اللون والنوعيه انا افضل جوتن واختارة سلكي يعني فيه لمعه حلوه مخمليه
سوي دفعه لون والدفعه الثانيه تدرجات اللون الثاني على شكل خطوط عرض الواحد منهم تقريبا 40 سم يعني غامق افتح فاتح وايد
ونفس المحل يبيع خلفيه اسفنجيه على شكل تاج مرسوم عليها اميرات ديزني
الوحده اعتقد بشئ وخمسين او ستين ما اذكر بالضبط بس وايد حلوات تقدرين تستخدمينهن كخلفيه للسرير
وفي محل في مول الامارات اسم تيبي هوم هاذا اثاثه حلو واسعاره حلوه بعد
عندهم اثاث ابيض ريفي روعه عجيب

__________________________________________________ __________

>>>> الرد الثاني :
مرحبا اختي برسلج الرسم اللي رسمته مع الشرح بالتفصيل الممل
بعد شوي جيكي الرسايل
عجبتني افكار ريم واااااااااايد

__________________________________________________ __________

>>>> الرد الثالث :
ريم الحزوم مشكورة وايد
أيس موجود عندنا في بوظبي وإن شاء الله لي طلعة بس سالفة اني ألون الجدران بخطوط بتطلع صعبة شوي ..أخاف ما اسوي الخطوط بانتظام يعني تطلع عويه شوي .. ولو يبت شركة أو عامل ما ادري كم بيكلف !!!! وفكرة الساسفنج وايد حلوة


Alnajla مشكورة الغالية .. وصلني الايميل والصور .. ما قصرتي بس السالفة يبالها شغل وايد .. بدرس الموضوع اكثر وبشوف إذا قدرت اسويه.. تصميم الديكور وايد حلو.. بس مثل ما قلت ان الغرفة صغيرة شوي يدوب متر ونص في متر ونص

باقي الخوات الخبيرات في الديكور وين همتكم؟؟؟؟

__________________________________________________ __________

>>>> الرد الرابع :
مرحبا اختي
لا ترى الصبغ المخطط وايد سهل لا يغرج
شوفي انا اشتري الصبغ واييب صباغ اللي باليوم كان يصبغ النا باليوم 100 درهم وفيوم بس خلصت الصاله يعني ما كلفني شي
والمخطط اول شي تصبغينها كلها نفس اللوون وبعدين تييبين لزق البراقع وتمسكينها من فوق لين تحت تركبين دري وتخلين حد يمسك اللزقه لج من تحت واللزقه روحها تستوي سيده وتخلين خط نفس الصبغ وخط لون اغمج شوي وهكذا
انزين بما ان الغرفه صغيره
شو رايج تشترين الشبريه مالت ايكيا الطابقين وحده ارضي يعني حق البنوته الصغنطوطه بس تحطين مخدات عالاطراف
وفوق بتحصلين مثل الخيمه يحطونها عالشبريه عشان ما تطيح البنت والها دري مب طويله ما ينخاف منها
انا شاريتنها حق عيالي الاولاد
وحلو ترومين تسوين ستاير تحت وافكار وايد
وبيكون عندج مساحه للكمبيور والكوميدينو

__________________________________________________ __________

>>>> الرد الخامس :
الغالية Alnajla مشكوووووووورة وما قصرتي كنت برد عليج بالايميل بس السيرفر لوع جبدي..

سراير بو طابقين انا مقتنعة100 % انها عملية بس طبعي اني خاف على البنات لا يطيحون من فوق.. يعني حتى لو بحط شي يحميهم من الطيحة بعدني بخاف عليهن

شفت عند مرت اخوي سرير بو ثنين اللي يكون ارضي والسدة مالته لاصقه فيه ويحطون فيها فراش حق سرير ثاني بس يلست احاتي ان العودة تطيح على الصغيرة وهم رقود.. يا رببببببببببببببي ما اعرف شو اختار!!!!

وفكرة جدارين بلون وجدارين بلون ثاني ما تنفع؟؟ يعني مب شيك؟ والله اني احس لو صبغت الغرفة اسود بتكون اهون من الحالة اللي هي فيها الحين