عنوان الموضوع : منو يقول ما يحتاي خدامة في البيت يتفضل تدابير منزلية
مقدم من طرف منتديات الضمير العربي

السلام عليكن خواتي
من فترة قريت موضوع إن ليش الخدامة و ما نحتايها - و الله البيت بدونها احسن و نحن نقدر نخدم و نحن نقدر نسوي
فحبيت اكتب في ها الموضوع.

الغاليات اللي اتقول ما نبي و موضة و مادري شو اتراويني همتها في البيت - ما عرف اشكبر بيتكم اللي ما يحتاي خدامة و شو من نظافة اتسوون

تعالوا نحسبها

الساعة 6 الصبح قومي جهزي الفطور لعيالج و ريلج
6:30 حفلة لبس الملابس الصباحية
6:45 وين دلاغي؟ وين مريولي؟ كتابي حطيته اهني البارحة وينو؟ يا ام فلان وين سويج سيارتي بتاخر و انتوا السبب (و طبعا المفتاح مكانه ما تحرك)
7:00 ابداي البسي بسرعة عشان تلحقين توصلين اليهال للحضانة و المدرسة و عقب تلحقين توصلين الدوام على الوقت
4:00 العصر(انا اداوم الين العصر) اطلعي ركض من الدوام للحضانة جلي الياهل و ركض على البيت
4:40 (يادوب مسافة الطريج لو مافي زحمة) و صلتي البيت فري الياهل و ركض على المطبخ (العباه افصخيها في الدرب للمطبخ) سخني الاكل و جهزي السفرة
5:15 تعال يا فلان يا فلانة يا ابو فلان هات الياهل يصيح ما تسمعه يعني

و بعد ما يخلصون الغدا – عليج تنظيف السفرة و غسل المواعين و تنظيف الكارثة اللي ف المطبخ و عقب جهزي دلة الجاي و القهوة و الى الصالة

خمي الصالة و رتبيها (بعد 5 دقايق ردت نفس الاول) و تعال يا فلان حل الواجب – يا فلانة وين شهادتج و نفس الوقت سولفي يا ريلج اللي لبس و كشخ و طالع شوية (فكة)
تاكدي إن الياهل نظيف و الحفاظة نظيفة و شبعان – شوي و اييلج تيليفون من الاهل وينج ما تنشافين يا لا بنمرلج بعد ربع ساعة
يالا عاد اربعي للمطبخ و جهزي شي للضيوف و صحن الفواكة و دلة يدية و فهمي اليهال يتادبون و يتمون حجرتهم

قبل 5 دقايق من وصول الضيوف اتمكيجي بسرعة بسرعة (عشان تخشين الارهاق ) و حياكم الله و هلا و الله و الخ و الخ و الخ
بعد ما يروحون ردي رتبي وعقب سيري المطبخ جهزي لغدا اليوم الثاني و شغلي الغسالة و بنفس الوقت على السريع غسلي الحمامات شوية
وصلت الساعة 10:00
سيري اكوي الملابس لليوم الثاني و بخريها و سوي حليب للنونو عشان ينام و انتي رووحج اتقولين وين المخدة بس
يوصل ابو الشباب بعد ما شبع من برع – تعالي بسوولف معااج شوية و انتي مب متفيجة لاي سوالف و لو قلتي تعبانة عندي شغل بخلصه و برجد يبدا الحوار المعتاد
انتي ما تحسين بريلج و ما عندج تنظيم و و و و
و اليوم الثاني نفس الروتين.
اللي تقدر تسوي ها كله روحها و تقول ما تحتاي خدامة تراويني همتها. طبقوا الموضوع لمدة اسبوع مب يوومين و عقب بنجووف

بالنسبة لي الخدامة ضرورية – اتغسل و اتكوي و تخم الصالة و الحوش – الطبخ نحن نسويه و تربية العيال نحن نهتم فيهم
عيالي و الحمد لله انا اغسلهم و اسبحهم و عقب يكبرون روحهم يغسلون اعمارهم و مرتاحة و الحمد لله و مرتبة اموري
و اتريا تعليقاتكم 

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
موضوعج حلو ما شاء الله عليج كفيتي ووفيتي .
انا الا الخدم ما استغنى عنهم . بدونهم اضيع
ما انكر اني كارهه وجودهم بالبيت و مرات يعصبوني و يغشون , لكن في أخر المطاف بحطهم فوق راسي
اذا راحن أنا لي بتبهدل و ما حد بيحس فيني و لا بيعاوني .

__________________________________________________ __________

>>>> الرد الثاني :
اختي الحاجه للخدم من الازل
لكن كل وحده تعرف اجتياجاتها
بالنسبه لي احس وجودها حاليا عندي بيت عادي منظمه دخلتها وطلعتها فما اتقيد فيها
بس كنت قبل ف شقه طبعاااااا ما احتاجها صح شغل ع طول لكن الحمدلله مرتاحه نوعا ما
كل عايله لها ظروف من طبيعةوالزوج و حتى طبيعه العيال اذا متعاونين او لا من حجم البيت

يعني نحن بعد بعض العادات تصعب شوي
مثل طالبه من الدكان او بتعقين الزباله لازم الريال موجود

يعني فالنهايه كل وحده و لها ظروف

__________________________________________________ __________

>>>> الرد الثالث :
أختي بنوته طرحج للموضوع رائع وعساج ع القوه
انا من المعارضين وجود الخدم في البيت
لكن في حالة وحده تشتغل مابيدها حيله لازم خدامه تعاونها
لكن اذا الوحده فينا ما تشتغل قاعده في البيت ( البيت الصغير ) ماله داعي خدامه
خواتي انا عكس التيار انا تعقدت من الي اسمعه واشوفه من جرائم الخدم
من سحر وسرقه وتحرش جنسي بالأطفال وتسمم الأكل كل هذا بسبب الخدم
انا ما انكر ان فيهن الزينات الي يخافن الله بس وينهن قليل من هالنوعيه
والحين هابين ع الكينيه انتو تدرون ان الأفارقة عندهم معتقدات غريبه وخطيرة
الي عندها خدامه تحط كيمره عشان تتطمن ع بيتها وعيالها
والله خير الحافظين

__________________________________________________ __________

>>>> الرد الرابع :
انا ماعندي خدم و مرتاحة
و ما اسوي كل شي بروحي ريلي يساعدني و مو مقصر و اليهال دربيهم من اول انه كل واحد مسوول على شغلته من صغرهم و الترتيب مهم
اما عمل اليوم لين باجر ها الي يخلي كل شي يتلخبط
و في شغلات ممكن تلاقين لها بديل
التوصيل لليهال - في مواصلات
الكوي في مصابن هالكثر
الغدا يتجهز ويا العشا لليوم التاني
ماعرف بس انا اقول انام و انا مرتاحة و قلبي مو ماكلني انه الخدامة بتضر اليهال او بتضرني او بتخرب بيتي
احسن من انه اجلس مربعه يدي و متقلبة منها قاعده فوق راسي عسب ترتب
لو انا عجوز اوك
يعني ما عرف مول مول مول مول ما بدخل هالخدم بيتي الا ادا حصلت وحدة عربية ممكن
مااقدر اسمع انه يسحرون و ادخلهم بييتي بتقول لا ؟
دخلو يوتيوب حطو خدامة تسحر لاهل البيت و تفرجو الشرطة و شو محصله

ماقدر اسمع انهم يقتلون اليهال وادخلهم بيتي
بتقولو لا ؟ ما سمعتم اخبار السعودية و الامارات ؟
ماشفتم تالا و غيرها و غيرها ؟
ما شفتم البيبي وهو تغيرله تضربه كيف؟
ما شفتم يوم تعض ادان ولد ما تعدا عامين و هي تغيره ملابس ؟
ما شفتم وما شفتم هالقصص ما تاتر ؟؟
ما اقدر اسمع انهم يحطون بول و مدري شنو في الاكل واخليهم
بتقولو لا ؟ دخلو و شوفو خامة مراقبة بالكمرات
ولو اكون مدري شنووو ماادخلهم

وبخصوص التنظيف العام كل اسبوع في خدم بالساعه يجيون يفركون البيت فوق تحت و مع السسسسلامة

بس بغيت اقول الي محصلة خامة و هي معاها مضبوطة الى الان الله يهديها لها و يسخرها لها
اما انا الي عرفت من الناس و من السجون و الدكاترة النفسيين انهم ناس عاشو قمع كبير و استغلال و عندهم عقد بكم هايل
وممكن يسوون اي شي ما يخطر على البال

__________________________________________________ __________

>>>> الرد الخامس :
حبيبتي الي تشتغل لازم خادمة
لاكن انا ماشتغل بيتي وسط مو كبير ولاصغير 5 غرف وصالة و4 حمامات عزكم الله وعندي طفلين
قبل كنت مع اهل زوجي غرفتين وكان عندي خدااامة كرهوني حياتي ماوراي الا مشاكلهم وسوالفي مع الناس الخدامة وشو سوت وشو قالت
انتقلت بيتي وكنت حامل وبدون خدامة ورتبت عمرري لما سافرت اوربا عرفت ليش الاجانب ماعندهم خدم مع ان مسوليتهم اكثر مناا لانهم منظمين
اول شي جبت غسالة صحون طبعا لو توصل المواعين للباب ماشيل همها ثانيا غسالة ملابس اتوماتيك مع نشافة والكوي بس ملابس زوجي يكويها برا وحقي انا وعيالي بالبخار وانا واف

البيت مرتب ونظيف انام وانا مرتااااااحة ماافكر شو تسوي ولا ااخاف تقوم وتدخل حد ولا تشرد ولا تدخل تسوي شي في عيالي
اطلع من بيتي اصك الباب وينتهي امرر بيتي لااجلس افكر شو تسوي ولا تاخرت برد عشان الخدامة ولا اشيلها وابتلش فيها
كلي اكله ونا مطمنة انه نظيف اغراضي في اماكنها محد شالها ولاغير ولا ضيع شي المنديل لو احطه ع الطاولةحتى بعد شهر القاه مكانه

بس ماانكر اني افكر اجيب خدامة حاليا واناا اعيش صراع لان بيتي دايما مليان واطفال واحس صرت مااستمتع بالجلسة معاهم لاني اشيل هم الاطفال وشو يسون وغير كدا مااقدر ادخل المطبخ واخليهم بروحهم مع انه كل شي جاهز واحيان اجلس اقول ليش اجيب وحدة ماعرف شو من جنس وشو هي عشان الناس

والله يستر علينا جميع والحياة بدون خادمة وربي جننننة وراحة باااااااااال