عنوان الموضوع : شو اعمل مع المكتب و شو القوانين عمل يدوي
مقدم من طرف منتديات الضمير العربي

الشغالة من بعد ما سوينا الأقامة قالت لي ماما انا بشتغل سنة و بسافر
كان زوجي مسافر و جواز الشغالة محتفظ فيه ما اقدرت اراجع المكتب لكن خبرت المكتب بعدين .

اخواتي الشغالة الأن اشتغلت عندي سنة و ثلاث اشهر و نصف
بعد ما تعبت معها فبعد حوالي 9 شهور مرت على خير بدت تشاكس ناديها ما ترد و ما تتطيعني و تخرب و تغايظ .
و كل ما اقول لها ليش تعملي كده تقول انا ابغي سفر انا ابغي سفر اقولها ايه انتي قلتي سنة واحدة تبغي تشتغلي و العقد 2 سنة و انا دفعت للمكتب لسنتين ليش تكلفينا مكتب و اقامة و ميديكال اذا ما تبي تشتغلي غير سنة كنت خليكي باندونسيا ليش ما خبرتيني قبل ما اعمل الأقامة و ادفع للمكتب اجلسي كملي المدة و لا تعملي مشاكل.

و صدف اني من 3 اشهر و نصف انكسرت ريولي بسبب هشاشة العظام و قعدت بالمستشفى شهر و عندي بظهري ديسك و ضغط و سكري و الحين ما اقدر امشي عدل يعني 3 او 4 دقايق و اجلس ما يتحمل ظهري يصير عندي انقراص بالفقرات غير ريولي المكسورة و براغي و قطع تثبيت و دوم جالسة بالفراش و اصلي و انا بالفراش و ما اقدر احمل حتى صحن بيدي هذا يتعبني .

المهم تكسير و تخريب قلت بوديها المكتب يشوفوا حل معها
و قلت للمكتب شو تعمل و تسوي و انها تقول بتشتغل سنة و بتسافر و بعد ما غبت عن
بيتي شهر قضيته بالمستشفى رجعت لقيتها قالبة ويهها و تبى تسافر

بعدين اتصل علي المكتب يقول الخدامة تقول ضربتيها و ان ادفع كل رواتبها و ان اشتريلها تيكيت يعني أدفع بعد تكيت على حسابي .

شرحت له اني ما عندي خادمة اخرى و اني مريضة و تعبانة بالفرشة و كلموها انها تكمل المدة و ان الخدامة تكذب عليكم و هذه تبغي تسافر و المكتب جالس يدافع على الشغالة كاني أنا مجرمة . ارتفع عندي السكري يومها و تألمت بشدة من الكذب و رحت نمت عدة ساعات كاني غبت عن الوعي من الزعل.

اخواتي كل ما تكلم زوجها باندونسيا تحرن و تبى تسافر و تجلس تكسر و تخرب مسكتها تتطلع ليفة المنيوم تبغي تفرك طنجرة الميلينيوم و كل واحدة مشتريتها فوق الالف و الألفين و خربتلي طاولة مشتريتها بالغالي و ما اريد اعد لكم شو خربت حيطلع قائمة هالطول.

و الله تعبانة و مريضة ما لي قادرة اعمل شي .

لها اسبوع الشغالة مش مجلسينها بالمكتب يقولوا مجلسينها ببيت صاحب المكتب و اتصل علي امس المكتب يقول بيقنعها انها تشتغل بمكان تاني و بيردلي جزء بسيط من الفلوس او ادفع تيكيت و اسفرها على حسابي بدل ما يهذبوها. نفخوا بالشغالة و فتحوا لها باب تكذب و خلوها تتفرعن . هذه الشغالة ما تنفع تشتغل باي مكان بعد هي تبى تسافر .

و المكاتب عصابة تبي تتربح . اعرف بيقنعوها تشتغل بمكان تاني لان الاندونسية الان صارالمكتب ياخذ 13500 درهم.

المكتب قال بيعطيني 3 الاف
و اذا المكتب هذول الثعالب اقنعوها تشتغل بمكان تاني كم المفروض يردولي من الفلوس .باقي لها 8 اشهر و نصف لتخلص المدة.


اريد نصايحكم و شو القانون بعد ما وضعتكم بالصورة
و ما اريد اظلم احد من الناس

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
القانون حسب معلوماتي يقول ان اذا اهي ما تبي تكمل المدة تدفع قيمة تذكرتها
ولو كنت مكانج بسفرها على حسابها وبسوي لها حرمان دخول
شي يرفع الضغط المكاتب والخدم مسوين مثل العصابة
ما يخافوا ربهم ياكلون فلوس حرام

__________________________________________________ __________

>>>> الرد الثاني :
اسأل الله العظيم رب العرش العظيم أن يشفيج يا حبيبتي !

اللي استوالج مب هيّن تبغين لج راحة وحد يساعدج !

واضح جدا انه اللي خلّى الدامة تتفرعن راعي المكتب نفسه
(والا لو كانت بتسافر من الأساس ليش ترضى تشتغل مكان ثاني؟ )

والله يا حبيبتي ما أعرف بخصوص المبلغ اللي المفروض يرده
بس انتي حمري عينج عليه شوية وقولي له انه الأتفاق من الأساس وياك سنتين
وهي من البداية قالت سنة يعني مب حسب العقد والمفروض هو يتحمل جزء كبير من المبلغ !

الله يعينج !

__________________________________________________ __________

>>>> الرد الثالث :
الحين جي المكاتب حسبي الله ونعم الوكيل انا يبت شغاله يوم وبس قالت رجعيني بروح بيت ثاني ويوم اتصلت فالمكتب اخبره قالي شو المطلوب ماتبا كيفها رجعيها وهاذا مكتب الزعيم تندمت ليش خذت من عدهم

__________________________________________________ __________

>>>> الرد الرابع :
موفقه

__________________________________________________ __________

>>>> الرد الخامس :
حبيبتي الله يشفيج يارب

نحنا دايما نقول انه حماية المستهلك ما يسون شي ونحنا غلطانين بصراحه لانه جربنا حماية المستهلك
وخلال يوم طلعو لنا حقنا من مكتب الخدم
اتصلي فيهم واشرحي لهم الموضوع وهم بيساعدونج
وشكله المكتب متعاون وياها او محرضنها لانهم بيعطونها ناس غير بنفس السعر يعني ربحو مرتين فيها
للعم انا خدامتي عندي من 4 شهور اندونيسيه والحين تقول لي انها بتكمل سنه وبتروح انا ما رديت عليها
لكن حزتها بتصرف ان شاء الله