>>>> الرد الرابع :
البارت الثاني...
********************
عبدالله/انا السبب انتي من البداية صديتي وانا اصريت..وهاذي النتيجة...
ندى/عبد الله غير الموضوع...
عبدالله/أي بس اللي بقوله لك ماراح يعجبك بعد؟
ندى كانها فهمت علشان كذا اسكتت..
عبدالله/متى راح اشوفك؟
ندى/صعب...
عبدالله/ابي اشوف البنت اللي حبيتها واسرتني...حرام اموت وانا ماشفتك ياندى؟
ندى/عبدالله حبيبي لاتجيب طاري الموت الله يخليك....
عبدالله/مرة وحدة بس ياقلبي...
ندى/بفكر بس مو اكيد..
عبدالله/اهم شي يكون فيه امل....
ندى/تعرف اني اموت اذا ماسمعت صوتك؟
عبدالله/حبيبتي صدقيني انا الظروف تمنعني احيانا اغيب بس تاكدي مافي غيرك بالقلب.....
ندى/.......
عبدالله/روح عبدالله انتي وقلبه وكيانه وكل تفكيره.....
ندى/متى تولد؟
عبدالله/ماقلنا مانبي نتكلم في ها الموضوع؟
ندى/ليه ماتبيني اعرف ياعبدالله؟
عبدالله/طاريها يضيق خلقي ويعفس الجو اللي بينا...!!!
ندى/بس انا يهمني اعرف حبيبي...
عبدالله/ندى انا مزاجي رايق معك لاتخربينه بطاريها الله يخليك؟
مر اليوم الثاني والثالث بروتين ممل على الكل وريما مطنشة تلفونات نورهان لها وحتى نور وشروق......
اخذت بعضها ولبست وراحت الراشد.....
بالصدفة في الشارع كان داق عليها ماجد...
ماجد بشوق/هلالالالالالالالالالا بااميرة البنات..
ريما ببرود قتل ماجد/نعمين.....
ماجد/اللله...ليه كل هذا عاد؟
ريما/انا طالعة تبي شي؟
ماجد/وووين وانا اجيك؟
ريما/لا انا طالعة اتسوق بالراشد بخذ لي ثياب وكم شغلة وماابي ادوش راسي بااحد؟(قالت له الراشد متعمدة علشان تشوف هل بيجي لو لا)
ماجد بخبث/طيب خلاص اخليك تتسوقين براحتك وبرواقك بس امانة ..ترى واحشتني اذا فضيتي عطيني رنة وانا بدق عليك..
ريما فهمت انه بيجيها من لهجته/طيب...في شي ثاني بعد؟
ماجد/امووووواه باي....,,
سكرت منه ودخلت الراشد وبدت مسيرة المعاكسات من جديد,,,,,,,
نورهان/وبس؟
مساعد/بس...
نورهان/شتبيني اقول بعد ماعندي سوالف..
مساعد/كيف ماعندك سوالف...
نورهان/يعني انا بطبعي مااعرف اسولف كثير...
مساعد/أي بس انا احب السوالف كثير!!!!
نورهان/مو مشكلة اضبطك مع ريما ذيك تخلق لك سوالف ماهي موجودة..
مساعد مسوي روحه مستغبي ومايدري منهي ريما/أي ريما!!!
نورهان/خويتي اللي كانت معي البارح!!!لحقت نسيتها؟
مساعد بخبث/أي وحدة فيهم؟؟
نورهان/بيبي اللي كانت قاعدة جنب ماجد رفيقك,,
مساعد/اه ..ام البايسن يعني..؟
نورهان/أي هي بعيونها...
مساعد/بس ماشكلها حلوة مثلك؟
نورهان/.........
مساعد/يعني لو كانت واثقة من جمالها كانت قطت لثامها شوي علشان نشوفها؟
نورهان/اهم شي تشوفني انا مو هي؟؟؟
مساعد/اكيد وانتي في اللي هي احلى منك ياعسل....
نورهان/لاطبعا...
مساعد بدى يتملل من كلام نورهان لان مافي شي وهو اللي قاعد يسحب الكلام منها....
مساعد/نشوفك الليلة؟
نورهان/أي بس انا ماخبرت البنات ان احنا بنطلع؟؟
مساعد/مو لازم البنات انا وانتي وبس!!!
نورهان/وين بتعزمني؟
مساعد/وين تبين؟
نورهان/أي مكان على ذوقك......
ودق جوال مساعد الثاني....
مساعد/لحطة نورهان هذا ماجد بشوفه شيبي مني؟
هلا ماجد .......اي....اي......ليه ....طيب يعني انت رايح اللحين......خلاص انت تقدم وانا بعدين اجيك هناك........
مساعد/هلا.....
نورهان/شيبي؟
مساعد/يقول واحد من اخويانا اللي بالرياض جاي الليلة...
نورهان/خسارة يعني ماراح نشوفك.
مساعد/بكلمك بكرة نتفق على موعد ثاني يالله باي...
ام محمد/ندى ...وين اختك؟
ندى/ها..مدري والله يمكن انها نايمة بدارها او انها طلعت..
ام محمد/وهاذي ماتعرف تقعد في البيت ابدا!!!
ندى في بالها تقول اذا انتي امها فشي اكيد بيكون العرق دساس!!!!!!!
ام محمد/وانتي شقاعدة تسوين..
ندى/ولاشي يمه ..
ام محمد/تعالي سوي لنا دلة قهوة وخلنا نسولف...
ندى/طيب.....
(ام محمد ...يسمونها ام محمد بس هي ماعندها عيال ماعندها غير اربع بنات )
ريما كانت تتمشى في الدور الاول بلا هدف ماكان لها هدف تسوق لانها حاطة في بالها ماجد لكن لو ماجا او انه يجي ومايتشرى لها ياويله ياسواد ليله,,,,
وبالفعل مرت ثلث ساعة وشافته من بعيد كان يلف حوالينه ويناظر ومبين انه يدور احد معين..
حبت تلفت نظره ....ومالقت قبالها الا الشاب اللي يعاكسها ...فرفعت صوتها تتهاوش معه,,,
ريما بصراخ/تعرف انك وقح وقليل ادب..
الشاب/لاوالله ماحد قال لي!!!!
ريما وبصراخ اكثر/جعلك العمى ان شاءالله قول امين,,
ماجد دقق في الصوت وتقرب وما خاب ظنه كانت هي,,,
اما ريما يوم ارتاحت بعد ماحدد ماجد موقعها مشت وكانها مطنشة الشاب ودخلت مانجو اول مكان صادفها...وماجد ركيض وراها....
نورهان/ها الحمارة مطنشتني من امس ماترد علي..
شروق/حتى انا سافهتني ماردت علي؟؟
(شروق اكثر ميلا للنورهان عشانها القائد ودايم تخلق مشاكل بين ريما ونورهان)
نورهان/طيب ياريما طنشي براحتك بس تاكدي اني مو شايلة همك بالناقص فيك؟
شروق/بلاش نكلمها مرة ثانية لو بغينا نطلع يانورهان هاذي ماوراها الاوجع الراس تقولين ماحد يعرف يتكلم غيرها!!
نورهان/وانتي الصادقة..
شروق/وبعدين اصلا الشباب يموتون على جمالك انتي فوجودها مو معنا مايشكل لنا أي خوف...
نورهان/معك حق,,,
شروق/ماعلينا في شي الليلة؟
نورهان/لا...
شروق/خلنا نطلع ندور احنا بنفسنا الليلة؟ وشرايك؟
نورهان/والله مدري بشوف...
في مانجو.....
ماجد/ريما..
ريما لفت وكانها متفاجئة/ماجد!!!انت كيف....كيف جيت هنا وكيف لقيتني؟
ماجد ببتسامة/قلت اساعدك يمكن انك تحتاجين احد يمسك عنك الاكياس ..اكون انا حاضر في الخدمة..
ريما بضحكة استخفاف/هههه لا..والله..طيب كيف عرفت اني في ها المحل؟
ماجد/سر المهنة.....
ريما لفت تكمل تشوف البضايع....
ماجد مسك لها ثوب زيتي ....
ماجد/وش رايك في هذا..
ريما ناظرته باحتقار/اقول اذا ينقصك الذوق ترى مايحتاج تفرض رايك؟؟
ماجد/ههههههه حلوة منك ياقلبي...
ريما اخذت لها قميص وتنورة وعطتهم ماجد ..
ريما/حاسب على ذولا والحقني....
وطلعت من المحل بدون أي كلمة,,,,
///////////////////////////////////////////
في جهة ثانية من الشرقية وتحديدا على كورنيش الدمام كان زياد قاعد مع وائل يسولفون...
زياد/يعني حملت المادة؟
وائل/شسوي مع اني كنت حاط كل اهتمامي فيها بس النصيب.....
زياد/تصدق ها السنتين اللي باقيين لي احسهم هم علي...ماراح يخلصون...
وائل/شسويت على الوظيفة؟
زياد بحسرة/ماحد رضى يوظفني كلهم يبون شهادة جامعية وانا بشتغل بثانوي....
وائل/طيب انت اللحين عديت سنتين من الجامعة يعني نص جامعي لو اشتغلت معهم وكملت دراستك,,,
قاطعه زياد/مافي امل ياوائل والله اني تعبت من كثر ماادور على وظيفة ان شاءالله بالفين ريال انا راضي بس اصرف على نفسي....
وائل/بكرة بتتعدل الامور كلها...
زياد/بكرة.....من متى واحنا نقول غدا يوم اخر ولايجي غدا واذا جا مايكون يوما اخر!!!!!
وائل/ياولد الناس احمد ربك انك عايش بها الدنيا ومافيك علة ولامرض ....
زياد/الحمد لله....
وائل/الا اقول زياد...انت ماتشوف امك؟
زياد/...........
وائل/انا اسف...بس كنت....
زياد/امي من تزوجت شالتني من بالها نهائيا....
وائل/.................
زياد/حاس نفسي مخنوق.....عمري ماحسيت ان في احد يحبني في الدنيا ياوائل...
وائل/ياشيخ وانا وين رحت....
ابتسم زياد لوائل ابتسامة باهتة وكانت دمعته في عينه...
زياد/وانا من لي غيرك يابو عبد الرحمان....
ماجد كان يمشي ورى ريما وهو يحمل اكياسها وهي ماكانها تشوفه ولاهي معبرته اصلا...
كانت تدخل المحل وتختار لها قطعة وتعطيها ايه وتطلع واحيانا تختار اشياء ماتعجبها بس لعانة منها علشان يدفع ...
ماجد/ريما.....ريمي....خل نقعد نشرب لنا شي انا مت من العطش.....
وقفت ريما.....ولفت عليه,,,
ريما/طيب....
ماجد/مابغينا......وش تشربين..
ريما/ابي.....ودق تلفونها ,,,,
ريما/هلا ندى.....بالراشد.....ليه.....ضروري....طيب شتبي....اوووف يالله راجعة اللحين,,,,
ريما/ماجد انا بمشي...
ماجد/ليه؟؟؟؟؟؟؟
ريما/امي تبيني....
ماجد/وهذا وقت امك عاد!!!!
ريما/معليش لانها بتروح دبي الليلة وتبي تشوفنا كلنا قبل لاتروح.....
ماجد/.........طيب شربي لك شي وبعدين....
ريما/مرة ثانية.....وبعدين احنا اصلا يبيلنا قعدة مو على الماشي..
ماجد/وعد ياريما..
ريما وهي تناظر باكياسها/اكيد وعد.....
ماجد/طيب بمشي معك للبوابة.....
وصاروا يمشون..
ماجد/من بيردك البيت؟
ريما/باخذ لي تاكسي....
ماجد/تاكسي وانا موجود!!!!!لامايصير...
ريما/لا باخذ تاكسي....
ماجد/طيب اعتبريني تاكسي....
ريما/ماجد مااحب اعيد كلامي مرتين....
ماجد/طيب,,,,,,,,انتي وين بيتكم؟
ريما/بالدمام.......
ماجد/وين....
ريما/مو شغلك......
ووصلوا للبوابة......ووقف لها ماجد تاكسي وركبت......وحاسب التاكسي وعطاها اكياسها.....
مشى شوي وسمع صوت من وراه يناديه...
ماجد...ماجد...
لف ولقى مساعد جاي يركض...
ماجد/هلا...ماقلت لي انك بتجي كنت بمشي تصدق!!
مساعد/بتمشي!!!!ليش وينها الصيدة!!!
ماجد/تقصد ريما...راحت...
مساعد بانت عليه خيبة الامل هو جاي يشوفها مخصوص/وين راحت؟؟؟
ماجد/امها مسافرة الليلة دبي وتبي تشوفها...
مساعد بتشكيك/اخاف مصرفتك بس!!!!
ماجد بثقة/وش مصرفتني اللله يهداك...صار لنا فوق الساعتين مع بعض وتونا بنقعد نشرب لنا شي الا امها داقة ...
مساعد/........
ماجد بفرح/بس تصدق هي وعدتني بقعدة حلوة لانها كانت تبي تسولف معي بس امها دقت في الوقت الغير مناسب....
مساعد صار يمشي وهو يفكر فيها!!!!!
ريما دخلت البيت واكياسها في يدها...ولقت امها جالسة مع ندى وغادة....
ريما/السلام....
وعليكم السلام....
ام محمد/وينك انتي؟
ريما رفعت الاكياس/بالسوق....
ام محمد/وش كل ها الاكياس...
ريما قعدت ورمت الاكياس جنبها بدون اهتمام..../كم قطعة عجبوني واخذتهم,,,,
ام محمد/وش صار على الجامعة؟
ريما/كل شي تمام باقي بس تعطيني المبلغ علشان ادفع لهم,,
ام محمد/الليلة بطلع اسحب لك...
غادة/ليش وين بتدرسينظ
ريما/في العربية المفتوحة...
ندى/حلو....اي تخصص...
ريما/ادارة اعمال...
غادة/ريما...حددنا عرسنا انا وتركي.....بيكون بعد ثلاثة شهور....
ريما/حلو حلو...عسى بس في السيف....
ام محمد/أي مو لانك انتي اللي بتدفعين؟؟؟
ريما بنرفزة/وان شاءالله باي زبالة بيكون العرس!!!!
مالقت لجوابها رد الاعيونهم المفتوحة على وسعها وهم يناظرونها...
ندى/ريما شها الكلام!!!
ريما/يعني الواحد مايقدر يكون صريح معكم!!!
غادة بنرفزة/يوم انك تبين عرس فخم وحركات ليش ماكملتي مع ولد عمك فلوسه وااجد وكان بيسوي كل اللي نفسك فيه...!!!!
ريما حست نفسها مخنوقة في ها اللحظة وماقدرت ترد على غادة لان لسانها انربط فجاة اخذت بعضها وقامت بعصبية وراحت غرفتها...
ام محمد بعصبية/انتي ليش قلتي لها ها الكلام؟؟؟؟
غادة/بنتك مسوية روحها بنت الوزير!!!!
ام محمد/ليش جبتي سالفة ولد عمك!!!!!!
غادة/.........
ام محمد/هو اللي فسخ الخطوبة مو هي ياحظي يعني ماله داعي تذكرينها بها الشي!!!!!!
غادة/.................
ندى/انا بروح اشوفها...
ام محمد/قومي شوفيها..واذا زعلت اخذي بخاطرها....
ندى/ان شاءالله يمه...
راحت ندى لريما غرفتها وتمنت انها ماتكون قفلتها دقت الباب مرتين ومالقت جواب فتحت الباب لقت اغراضها مرمية على سريرها باهمال وعبايتها على الارض بس هي مو موجودة...
طلعت من الغرفة لقتها في الحمام وصوت الماي مفتوح شكلها تتروش هزت راسها باسف لانها عارفة طبع ريما اكيد تبي تهرب من الموقف كله!!!!!
نور/هاااي بنات...
شروق/هلا....
نور/وين ريما ماجت؟؟؟يعني مو انا اللي متاخرة بروحي؟
نورهان بعصبية/ريما ماراح تجي!!!
نور بدهشة/ليه!!!غريبة احنا مو متعودين نطلع بدونها!!!
نورهان بعصبية واضحة/وليش ان شاءالله مانطلع بدونها؟؟؟؟
نور سكتت وماقالت شي لانها توقعت ان صار بينهم شي من سالفة البارح...
شروق/يالله نورهان خلينا نمشي يمكن نلقى لنا شي زين.......
نورهان بدون نفس/يالله.....
وحدها نور ماكانت فاهمة شنو صاير هي عارفة ريما زين حقانية وماتحب احد ياخذ حقها بس ها السالفة بينهم من زمان يعني وش الجديد!!!!وبعدين شروق صايرة تقعد بالنص بينهم يعني هي اكيد سبب الفتنة ها المرة!!!!!
وحدها ريما كانت فاتحة الماي علشان تسمع صوته ويغطي على صوتها اللي مذبوح من البكي...ياربي خلاص انا مو قادرة ليش كل مااحاول انسى يذكروني مرة ثانية فيه وفلي سواه فيني!!! ياربي ماابي افكر خلاص انا عاهدت نفسي اظل قوية لين يجي يوم انسى فيه هذا كله...بس متى راح يجي ها اليوم متى!!!متى يجي وارتاح شوي من ها العذاب اللي انا عايشة فيه....حسبي الله ونعم الوكيل فيك ياولد عمي حسبي الله عليك......
مساعد كان تفكيره مشغول بريما من شافها ذاك اليوم وهي دخلت باله وحلف مايتركها في حالها ابدا بس كيف يوصل لها معقول ياخذ رقمها من ماجد...ولا من نورهان...اول مرة يحس انها صعبة وانه متورط,,,, ماجد اليوم كان متحمس وهو يتكلم عنها ياترى لو عرف اني قاعد ارسم واخطط عليها بيتضايق وبيزعل ولا ماهي ماثرة فيه....
مساعد شصار لك ريما صايرة تاخذ جزء كبير من تفكيرك وهذا اللي مايصير؟؟؟؟
زياد كان قاعد بغرفته وقدامه مذكرات الجامعة بس التفكير كان بعيد حييييييييييل كان شارد ومايدري في شنو هل في امه اللي من تطلقت من ابوه وتزوجت غيره ماعمرها سالت عنه؟؟؟ولا عن ابوه اللي متزوج اربع وعنده عيال مشاءالله وهو لاهي عنهم ولاهو داري من اللي ماكل وشارب ومن اللي نايم بجوعه!!!!
كل تفكيره كان في انه يلقى له وظيفة ويصرف على نفسه منها ويرتاح من كل شي حواليه,,,باقي له سنتين ويخلص الجامعه ومايدري هل بيتوظف وظيفة سنعة ولا حيا الله...
هو كاره عيشته كلها اصلا مافي شي حوالينه يخليه يحب الدنيا لا ابو ولاام ولااهل مثل العالم والناس...حتى ماديا ماهو مقتدر على طول السنة خطه استقبال بس!!!!اوووف يازياد من ها العيشة اووووووووف لمتى ياربي لو وظيفة بالفين ريال تغنيني عن الحرام وتسد احتياجاتي لين اتخرج واتوظف....
صباح اليوم الثاني...
طق طق طق طق...
ريما بثقل/يالله صباح خير منو؟
ندى/انا...
قامت ريما وفتحت لها الباب..
ريما/ندى خير وش تبين؟
ندى/ليه حرام اني اقعد معك لو اسولف معك ؟؟جيتك امس مرتين لقيتك نايمة..المهم مو هذا موضوعنا صديقتك تحت تنتظرك...واخيرا شفنا ها الصديقة اللي ماتكلمين احد عنها....
ريما بدهشة/صديقتي!!!وين؟؟؟(وفي بالها تقول أي صديقة!!!)
ندى/بالمجلس تحت....
ريما/وش قلتي لها؟
ندى/قلت لها بصحيك وبناديك...
ريما تضايقت بس استغربت من هاذي اللي جايتها من الصبح..
ريما/طيب بغسل وبلحقك,,,,,,
غسلت ونزلت وهي مو حاطة في بالها احد معين يزورها لانها وبكل بساطة ماعندها زمالات في الدراسة كيف بعد صديقات!!!!ها الشي مستبعد من حياتها بس ماطال تفكيرها كثير يوم دخلت ولقت .....
عبدالله/يعني بقدر اشوفك...
ندى/مو اكيد انا بطلب من ريمي ان احنا نطلع مع بعض واذا وافقت بعطيك خبر...
عبدالله/ريما حبابة وبتوافق اكيد
ندى/بس ماراح اشوفك بروحي ياعبدالله...
عبدالله/انتي تبين تشوفيني ولا لا؟
ندى/ابي اشوفك بس خايفة
عبدالله/خايفة مني...
ندى/لا ....
عبدالله/من شنو خايفة؟
ندى/هذا اللي عندي اذا انت موافق بكلم ريما وبرد عليك..
عبدالله/اه........امري لله حتى لو اشوفك من بعيد...
زياد/وائل
وائل/هلا
زياد/تصدق مالي خلق اليوم احضر ولا محاضرة
وائل/هذا وانت الفالح واللي تبي تخلص وتشتغل بسرعة..
زياد/اه..تعبت والله
وائل/خير صاير شي جديد..
زياد/سلامتك ...بس الملل والقهر بيقتلوني...
وائل/زياد..انت رجال اكبر من الحكي هذا كله....
زياد/شسوي يا خوي شسوي الدنيا مافيها غير الهموم!!!
وائل/لالالا مو كذا يازياد الدنيا فيها كل الاشياء حلوة بس احنا نشوفها بشكل ثاني ياخوك....
زياد/اللي عايش عيشتي يلاقيها هموم وبس مافيها للحلاوة لون ولاطعم...
وائل/اقول قوم خلنا نروح محاضرتنا ابرك من كلامك لانك اليوم صاير كئيب...
ريما بدهشة/نور..!!!!!!
نور وقفت يوم شافت ريما ويوم شافتها منصدمة من شوفتها/هلا ريما...انا اسفة اني زرتك بدون موعد....
ريما اللي للحين من زيارة نور قعدت/لا عادي...تفضلي....
نور/شلونك...
ريما/............
****************************
__________________________________________________ __________
>>>> الرد الخامس :
ارجو من كل عضو يحب يرد
يرد في ادب ويحترم مشاعر الغير او لا يرد
ولكم كل الشكر
رد مع اقتباس
