عنوان الموضوع : رواية (خايف ياقلبي خايف ) رواية رائعة
مقدم من طرف منتديات الضمير العربي

]السلام عليكم
اليوم راح انزل روايه من نوع فريييييد ومميزه
للكاتبه \ماعدت اقوى على الجروح

من جد الروايه هاذي تجنن
بمعنى الكلمه

واتمنى تعجبكم زي ما عجبتني

اتركممم مع الروايه




(1)

تبعثرت امام ناظريها الأوراق....
وتطايرت افكارها في الآفاق...
فانبرت تبحث عن بلسم...
ينير لها واقعا قد اظلم.......
اضاء لها عشرون شمعة...وشمعه...
هناك ذرفت عينها دمعة...
تذكر نفسها وهي من الحزن تحترق...
لحبيبا قرر ان يفترق...
فودعت عالمها مهرولة إلى البحر.....
تنشد الهروب من لوعة القهر....
لكنها اصطدمت بواقعها....
يلاحقها ويطاردها.......
فتساوت لديها كل الألوان........
واضحى واقعها بلا عنوان.....
فتساءلت؟؟؟؟؟؟؟
لما الحزن يعترينا؟؟؟؟
ويسيطر على جوارحنا ويكوينا.....
فتخور قوانا عند مواجهة الصعاب....
ونغلق علينا الشبابيك والأبواب....
فنرضخ للقدر المحتوم...
لماذا ايها الزمان المغرور؟؟؟؟؟؟؟؟

كان حلم..وتحول الحلم إلى كابوس..واصبح الكابوس ماضي مؤلم..

وصار الماضي وحش كاسر يغرس انيابة في حنايا القلب كلما مرت عليه الذكرى.....

ماذا جرى لي..وكأني جردت من احاسيسي..لا اشعر بقلبي ينبض..دموعي وكأنها تحجرت.

.لماذا اصبحت بهذه العدائية والحقد والأنانية؟؟

ربما لأني اعطيت واكرمت من لا يستحقون؟؟

انا كعود ثقاب تحول إلى رماد..بعد ان اشعل شمعه وذابت واحرقها الصبر..ا
رى السواد في كل مكان وكل شخص..
ولا ارى البياض إلا في شعري الذي شاب من كثرة همومي..
كنت مثل اي فتاة في مثل عمرها..

احلم بفارس احلامي..رسمت ملامحه بدقه في خيالي.
.وتخيلت حياتي معه..تمنيت الحب .. كنت اريد رجلا يحميني من نسمة الهواء...ا
رتمي بين ذراعيه اذا ضاقت بي الدنيا..رجل يمسح دموعي قبل ان تنزل.
.رجلا يشعر بها دون ان تبوح له..رجل يعتبرها كجوهره ثمينه لا وجود لمثلها في الكون..هذه كانت احلامها....
..حب ورومانسيه.. لم تتعدى ذلك..لم تفكر بالعلاقه الزوجيه..ظنت ان ذلك يأتي بعد الحب والزواج..
او ان حبيبها لن يخذلها في ذلك...ولكــــــن...........
الساعه 5 الفجر..........صوت الأذان .......صحت ساره من النوم......
راحت الحمام تروشت وتوضت...بعد الصلاة..نزلت لقت امها وابوها يشربون قهوه..
.(اموووت على ريحة القهوه العربيه من الصبح)..
ساره:السلام عليكم صباح الخير...

ابو عبدالرحمن وام عبدالرحمن: وعليكم السلام ...صبحك الله بالنور...
ام عبدالرحمن: تعالي يمه افطري...
ساره : مو مشتهيه .. بشرب كوفي وبفطر بالدوام...
ام عبدالرحمن : قهوه من الصبح وانتي على لحم بطنك يابنتي لازم تاكلين شي يفيدك.....والخ
ساره: (في نفسها) كل يوم نسمع نفس الأسطوانه,,,,,يالله صباح خير....
وهي طالعه فوق لقت ولد اختها فيصل نازل.....صباحو ياحلو....مارد عليها .......اهي تدري ان ماله خلقها بس تحب تتناقر وياه من الصبح.....
اعرفكم على ساره شوي........
ساره 24 سنه...مخلصة جامعه تخصص حاسب آلي.. موظفه في شركه كبيره وصاحب الشركه من قرايبهم..
ابوها كان موظف في ارامكو وتقاعد...وامها ربة بيت ..الاثنين طيبين حييل ..وام عبدالرحمن ..كل طبية الدنيا بقلبها...وتحب عيالها وعيالهم..
ناس من الطبقه المتوسطه .... لكن اللي يشوف كشخة ساره مايقول كذا..تتعب على شكلها واجد..
عندها 4 خوات..ثنتين متزوجين..(نجلاء) ولدين وبنتين الكبار
.(محمد 15.).(جود 14 )هذول الاثنين مطيحين الميانه مع ساره وهي دايم تقول
لهم احترموني انا خالتكم اكبر منكم بس مافي فايده ,,لكن اهي مبسووطه من هالشي.
.و(هدى) عندها ولدين وبنوته البنوته اسمها(لينا سنتين).هاذي روح وقلب ساره ماتقدر ماتشوفها يوم واحد.
.دايم تقول انها ماتحبها لكن على ميين .

.والكبيره ارمله (اماني) وعايشه معاهم وعندها ولد واحد هو (فيصل)
او فصيببل زي ماتحب تسميه ساره.قريبه من ساره واجد وعلى طول تشكي لها همومها ..
.والاخيره مو متزوجه (فاتن) واكبر من ساره بسنتين..اما اخوانها فهم 5 ..
الكبار2 متزوجين عبدالرحمن الكبير شخصيه ورزه ودايم يوقف معاهم في اصعب المواقف ,
,,سعد متزوج وعنده بنيتن موظف كبير في بنك هذا قتيله شي
اسمه ساره كان راح يروح فيها وبتعرفون السبب بعدين.. ثلاثه اصغر من ساره...
.اللي اصغر منها على طول اسمه (بدر19) ساروه مثل مايسميها تموت فيه جميل
درجه اولى دايم يقولون لهم هذا مو اخوكم ..ابيض واشقر ..عيونه عسليه وناعسه

ورموشه نازله على تحت وخشمه طويل العظمه اللي فوق بارزه شوي وها اللي زايد حلاة خشمه
..ووجهه طويل وعظمات الوجه اللي تحت عيونه بارزين مسوي سكسوكه خفيفه .
. طويل وجسمه حلو واكتافه عريضه ..... بأختصار عذاااب الولد.. لكن للأسف وجهه دايم اصفر لأن عنده مرض وراثي بالدم.. ودايم يطلعون بآخر الليل او عز الظهر ياخذون فره بالسياره (ناس فاضيه) او يشترون اسكريم من باسكن على حسابها طبعا......

..ينصب عليها احيانا بس هي تدري وعسل على قلبها......اما الصغار( سلمان) هذا يموت على شي اسمه دبابات,, (تركي) آخر العنقود او الجعده مثل مااسميه دلوعة امه كل يبيه يحصله,, هذااااااااااااااااااااااااااااار درجه اولى وسوالفه ماتخلص ابي اعرف من وين يجيب كل هالسوالف بس اذا غاب عن البيت يترك مكان خالي طبعا راح يصير البيت هدوء... ياحلوهم ....

اما ســــارة,,,,,,,,بطلة القصه
ساره مطلقة مرتين........ومثل ماتقول عن نفسها ماعندها حظ....
.وحاقده على كل رجال يمشي على الارض ......بيني وبينكم يحق لها بعد اللي شافته...
.... نعمووومه بيبي فيس..طولها حلو وجسمها متناسق ..ووجها طويل ..بشرتها حنطية مايله للصفار.
.وعيونها بنيه ناعسه..خشمها طويل وصغير
...اما شفايفها ورديه صغيره لكن مليانه شوي..
شعرها بني طوله متوسط ناعم
.. على طول كشخه حتى لو هي قاعده في البيت فيها عناد واصرار اذا بغت
شي يصير يعني يصير واللي مايعرفها يقول عنها مغروره, صريحه وماتحب حد يتحكم فيها ..
. واذا جات تطلع الكحله ا

اهم من العبايه هههههههههه...طبعا وانتو بكرامه ماتلبس الا كعوب عاليه .
.صحيح مو ناقصة طول بس هي تحب كذا...عندها صديقه وحده من ايام الثانويه شيماء.
..وبيتهم قريب منهم يعني رايحه لعندها او اهي جايه لها.....
ا
ما بطل القصه.....
ناصر (31 سنه) مطلق من اكثر من 3سنوات..راح تعرفون ليش مع الاحداث
. شخصيه رزه ..طويــــــــــــــــــــــــــــل...جسمه رياضي عضلات صدره وبطنه محدده.
.اسمر شوي..او مثل مايقول على نفسه حليب مع كوفي...
عيونه خضرا مايله للعسلي ناعسه ورموشه نازله على تحت (يشبهه بدر لحد كبير) وخشمه طويل ..
.وشفايفه حلوين ..على طول مخفف اللحيه والشنب...
ملامحه ماخذه الجمال الغربي والشخصيه السعوديه..انتو تخيلو...اممممم مثل الممثل اللي في لوست اللي اسمه (سوير)...مغروور وشايف نفسه حاط بباله كل البنات
بنظره زباله,,ومستحيل يعطي وحده منهم وجه,,
,ومايرضى بالغلط ابد..اذا حط الشي براس يسويه يسويه لو مهما كلفه.
.عنده واسطات ونفوذ كبير .. وحاقد على جنس الحريم(مثل ساره ماجمع الا وفق)

امه بريطانيه تزوجها ابوه لما راح بعثه دراسه...وتوفت من 3 سنوات
..عنده شهاده كبيره من اضخم جامعات بريطانيا ويشتغل مع ابوه في شركاته
(المدير التنفيذي) عاش ببريطانيا اكثر من 20 سنه.. ولما قرر يتزوج رجع السعوديه
..ابوه محمد رجل اعمال معروف وله نفوذ ... له هيبه تحترمه حتى لو ماتعرفه.
. متزوج من بنت عمه بعد ام ناصر.
. (ام فهد) زوجة ابوه طيوبه وناصر مثل ولدها ومايناديها الا يمه..عندها 3 اولاد و3بنات.
.فهد الكبير(26) الله يهديه بس...يدرس بالخارج..وراعي بنات وشرب ومخدرات
عكس اخوه..الله يحمينا ويحمي المسلمين
...اما البنات(بدريه) متزوجه وعندها ولد وبنت.
.(نوره) مو متزوجه تدرس بالجامعه سنه ثانيه حلوه ورشيقه ونعوومه عاقله..وراكزه...
.(ندى) وماادراك ماندى تدرس بالثانويه ثاني علمي..ودايم مناقر مع ناصر واختها نوره.
.مرجوجه وتحب الهبال والرقص والوناسه..وشعارها طنش تعش تنتعش.

....اما الصغار (ريان ونواف) توأم ياحبي لهم 5 سنوات بالروضه..يموت فيهم ناصر ..
ومايقدر يزعلهم.. يذكرونه بولده اللي ماشافه من زمان...

.. اما عبدالله ولد ناصر (3 سنوات) ماشافه مو يوم عمره 4 شهور.
. امه اخذته معاها بلد اهلها واهو ميت يشوفه بس مايدري وينه ماخلى شي ماسواه..
واذا قعد يفكر يحس حاله بينجن..عشان كذا يطلع كل مشاعر الأبوه في اخوانه الصغار.
.ونسيت اقولك لكم مضرب عن الزواج..الا وحده تجي بمزاجه(اقول لكم ماجمع الا وفق)

نرجع لساره.....
وفقت عند الدولاب تختار لها ملابس
...شوي ضحكت يعني من بيشوف شنو راح البس.
..اخذت لها جينز..وتي شيرت اسود..وفقت عند المرايه وهي تطالع ......
...نفسها...
وفقت امام مرآتي...لم اتعرف على نفسي...من تكون هذه؟؟
هذه انسانه مختلفه..تحسست ملامح وجهي..لم تتغير
..اذن مالذي تغير؟؟تبدل كل مابداخلي..ها أنا اتكسر واتحطم..رغم اني واقفه.
.ولكن مابداخلي هو اشلاء وبقايا انسانه..احاول ان الملم بقايا اشلاء قلبي
..ولكن عبث..اشعر كأني ساعه سرقت عقاربها..ورغم ذلك لم يتوقف الزمن.
.مانفع هذه الساعه بدون عقارب وكأن حياتي مثل الحفره العميقة..كلما اخذ منها كبر حجمها
..عمري الذي يؤخذ وهمومي التي تكبر وتزداد وتعرقل خطواتي
..كم تتملكني تلك الرغبه..واشعر كانها نار تستعر في داخلي.
.رغبتي في الأنتقام من ذلك الحقير..الذي داس على كرامتي..وقتل كل ماهو جميل بداخلي..
كم اكره نفسي عندما اتذكر كم كنت سهله بين يديه.
.ربما لذلك لفظني بعد ان اخذ مااراد مني بالقوة.
.وداس علي كما تداس اعقاب السجائر......

قطع تفكيرها جوالها يرن...
رغد: هلا سوسو وينك انا عند الباب..
ساره : طيب نازله...اخذت كوب القهوه وشنطتها ولبست جزمتها
بسرعه ونزلت وقبل ماتطلع من باب البيت لبست نظارتها الشمسيه الكبيره شانيل..

رغد زميلة ساره بالدوام..يروحون مع سواق واحد اللي هو سواق الشركه...
رغد (21 سنه)بنوته نعومه دبدوبه شوي..لكن مرحه
ودووم تضحك وعلى طول تقول لساره لازم نتطلقي للحياة ...بس مافي فايده من كلامها..

ساره وهي تركب السياره: السلام عليكم..
رغد: وعليكم السلام... صباح الخير..روقنا ياحلو...
ساره: ههههههههه
رغد : ايه اضحكي شنو ماخذين من الدنيا,,
رن جوال ساره:الو..
المدير : السلام عليكم ..
ساره : وعليكم السلام...
المدير: شوفي في على مكتبي ملف لشركة..
. لازم يخلص اليوم ,, وعندك فواتير ضروري ,,,
ساره في بالها : لسه ماافطرنا.... ان شاء الله ...

في مكان ثاني...
كان نايم على السرير,,, صاحي بس لسه ماقام,,,
اندق الباب...
ناصر بصوت كله نووم: نعم,,,,
نواف : فتح الباب وهو يقول صباح الخير,,
ناصر : صباح الخير,, ش عندك؟؟
نواف : يقول لك ابوي اقعد,,
ناصر وهو يقوم من السرير: زين قمنا... اصبحنا واصبح الملك لله....
نواف : انت ماتستحي تقوم قدامي كذا.....
ناصر كان لا بس بس بنطلون وصدره مكشوف .. وعضلات صدره بارزه بشكل خيالي ......
ناصر : اقول لا يكثر ...روح عن وجهي يلا....
ابتدا يوم شغل جديد...]

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
اللحين بنزل البارت الثالث

__________________________________________________ __________

>>>> الرد الثاني :
"]تابع

يوم الملكه.......في غرفة ساره
ساره كانت ميته من الخوف وقلبها من كثر ماهو مقبوض حاسه انها مو قادره تتنفس.....
وشيماء جنبها,, ماسكه يدها وتقرا عليها وتحاول تهديها...
ساره لبست فستان اخضر لونه تفاحي فااااتح وفيه لمعه ورديه.
. مفتوح من الصدر وبدون اكمام او حتى سيور تمسكه وكان واسع شوي من فوق وكل شوي ترفعه
.. وفيه من تحت وردات صغاار مرره وكل ماارتفع قل الورد ... ومروله شعرها حاطه ميك اب لبناني.
.. مبين جمالها الطفولي..
لما شافها بدر قال اقول قولو حق راشد (خطيب ساره) ترى بنتنا محجوزه..
جايبه الجمال منين يابت... اخس عليكي مخبياه فين ....
ضحكت ساره وهذا اللي يبيه.. لأنه كان حاس فيها..
جات شيماء وفي يدها كاس مويه وطلع بدر .....
شيماء: هاا شلونك الحين ....
ساره : ماتغير شي..

شوي جات اماني وهدى ونجلاء ..

اماني : يلا ساره عبدالرحمن يقول انزلي عشان الشيخ ياخذ موافقتك وتوقعي.....

ساره : سكتت شوي... بعدين قالت استنو شوي......


هدى : بلا كلام ماله داعي .. وغمزت لها ترى راشد مستعجل.....

غمزه هدى كأنها خنجر بقلب ساره ..... حست برجولها ماعاد تحملها وبمغص..

ومو قادره تاخد نفس... شيماء حطت يدها على كتفها.. سمي بالله وقومي..

قامت ساره ....وهي حاسه بحجر ثقيل على صدرها....

كان سعد واقف عند الباب.... وشافها وهي جايه....

سعد : ماشاءالله ايش هالجمال كله... الله يهني راشد...
.
.وهمس بأذن ساره ترى وصيته عليك وقلت هذي اختي الصغير الغاليه دير بالك عليها...

..واذا زعلك او شي قولي لي... وباس جبينها .. يلا حبيتي..
ساره طول ماكان يكلمها منزله راسها.. لأنها حست انها لو رفعت عينها راح تبكي وتخرب المكياج....
وهي داخله تعلقت جزمتها بالسجاده... وبغت تطيح لكن سعد مسكها...
سعد : اسم الله عليك شفيك ؟؟
ساره : وهي تعدل فستانها من فوق لأن بان شوي من صدرها.. ولا شي اخوي
..وهي تقول بنفسها(هذي من اولها طيحه على الباب)
دخلت على باب المجلس واخذ الشيخ موافقتها.. ولما جات بتوقع طاح القلم من ايدها..
بدر كان واقف.. وعلى طلع قلم من جيبه وعطاها اياه.. ناظرته ساره وهو حس فيها..

شفيها اختي.. ليش مو مبسوطه....
وقعت وطلعت...
وراحت مكان الحريم شيماء كانت تستناها على الباب......
اول ماشافتها مسكتها وهزتها : شوفي ماراح احضنك لأني اعرفك راح تبيكين امشي داخل ..
دخلت على الحريم والنظرات بين اعجاب وحقد وغيره خاصة بنات خالها وبنات عمها..
. ليش اختارها هي بالذات...
وشوي جات ام راشد وخواته..وسلمو عليها وباركوا لها..
ام راشد : قومي يمه نروح المجلس الثاني الحين بيجي راشد...
ساره حست جسمها شب ناررر...الحين بشوف وجهه.. وبتتعرف عليه عن قرب

..كانت خايفه ومرتبكه وحاسه بدوخه لأنها ما نامت ولا اكلت من امس
جلست ,,,,, وشوي دخل راشد.. لما دخل سلم عليها وهو ياكلها بعيونه اكل.....

راشد : الف مبروك..
ساره : ... اللله ....يبارك...فيـــك
راشد انتبه لها ماسكه الفستان من فوق عشان مايطيح ويبان صدرها..
جلس جنب ساره.. وقال لأمه وخواته يطلعوا..

ام راشد : لا اوصيك على البنت الله فيها..
راشد : لا توصين حريص وعيونه مازالت على ساره..
طلعوا .. وهي حست بقلبها طلع من مكانه... مو قادره تتنفس...
انتبهت له وهو يدور في جيبه .. طلع باكيت سجاير وولاعه وقعد يدخن ..
جن هذا فوق ماانا مخنوقه يدخن بعد...
....طبعا هذا كله وساره للحين ماشافت وجهه...
بعد ماخلص سيجارته قرب منها...
ساره هنا خلاص ماقدرت تتحمل جات بتقوم مسكها وين يابنت عمتي..

ماردت عليه ورجعت مكانها.. قرب منها اكثر وباس خدها...هي انقرفت من ريحة الدخان.....
رفع وجهها بيده وشافته.. انصدمت...
كان اسمر واجد وخشمه كبير وعيونه صغار وداخله على جوه حتى شماغه مو لابسه
زين وشعره طالع من قدام وريحة الدخان تفوح منه.. بأختصار مافي شي حلو .....
. اقصد بعيون ساره.....
نزلت عيونها على طول من الصدمه ...... وهو قام يضحك ضحكه نرفزت ساره مررره....
ليش ياربي ليش..... وقعد يسولف معاها ...وهي ترد بكلمه او كلمتين لأنها مو قادره تجاريه بالسوالف الماصخه تبعته.....
كان كل كلامه عن النت وعن الهكر وكيف انه قدر يخترق ايميلات ناس واجد...
وكيف انه يدوام يوم بالاسبوع والمدير مايقدر يكلمه... وطول اليوم نايم
.. حست انها انسان فاضي من جوا ماعنده شخصيه حتى بدر اخوي شخصيته اقوى منه..

ولا نظره جاده للحياة وقال كلام
انصدمت منه اكثر.... راشد: طبعا بعد الثانويه راح تقعدين بالبيت..
ساره : رفعت وجهها تطالع فيه.. ليش..؟؟
راشد : مافي فايده من الدراسه مصيرك تقعدين بالبيت....
ساره : بس انا ابي اكمل دراسه..
مارد عليها.. لأنه كان مركز عيونه على صدرها اللي بان شوي من فوق ..
جا جنبها ومسكها من خصرها بطريقه تخوف حست كأنه هجم

عليها... حاولت تبعده لكن ماقدرت .. وقام يبوس فيها في خدودها وشفاتها ورقبتها.
. وهي خلاص مو قادره تتحمل... وتحاول تبعده بس مو قادره
شوي اندق الباب..
ساره : تنفست بقوه الحمدلله...
راشد : اوووف من هذا المزعج .. الواحد ماياخذ راحته مع زوجته...
وهو يناظر ساره نظرات تحس وكأنها بدون ثياب.....
عدلت ساره فستانها ورتبت شعرها شوي.. لأن الافندي حاسه..
دخلت ام عبدالرحمن : السلام عليكم
وعليكم السلام.....
ام عبد الرحمن :جيت ابارك لكم ودخل وراها بدر وسلمان وتركي

ساره حست براحه لما دخلوا..... بعدت عنه .. وهو استغرب .
.ليش تبعد عني ماكانت مبسوطه؟؟
وقعدوا شوي.. يسولوفون معاه ..بدر حس في اخته..
بدر: اقول يالنسيب مو ناوي تمشي ترى البنت عندها بكره مدرسه..
ساره ضحكت بداخلها (كانت ناويه تغيب هي وشيماء وبدر,
, ايه بعد اخو العروس ووصيفتها على قولة شيماء)
راشد : طيب .... وصل حده..
ولما مشى قرب لساره وهمس : مافي بوسه لبكره .....
ساره استحت ونزلت راسها مو قادره على قربه منها وعلى ريحة الدخان ماعنده اسلوب ابد..
ولا يعرف يتعامل مع البنات ابد...
على طول راحت ساره لغرفتها بدلت ملابسها...
ولبست لها دشداشه قصيره بينك فاتحه وفيها دبدوب كبير بالوسط فكت شعرها وقعدت قدام التسريحه تشيل المكياج......


عند ناصر......
نوره : ناصر ابيك بسالفه..
ناصر : خير وش عندك......
نوره : انت ناوي تكلم ابوي عشان تخطب هيفاء صح....
ناصر : ايه نعم.. ليش تسألين..
نوره : لكن هيفا مو مثل مانت فاكرها تغيرت واجد
ناصر : كيف يعني..
نوره : هيفاء سافرت مع امها الكويت لأهل ابوها ورجعت وحده ثانيه غير اللي شفتها وعرفتها من قبل..
........تغير فيها كل شي اخلاقها وتفكيرها.. وحتى كلامها ...لو تشوفها الحين ماراح تعرفها..
ناصر : لا تقولين كذا عن بنت عمتك... وبعدين احساسي مايخيب...
نوره : بس يااخوي ابي مصلحتك صدقني .. صارت وحده ثانيه.....
هيفاء لما كبرت شوي مشت مع رفيقات سوء.. صارت تكلم وتطلع مع شباب

وتدخن وكل شي عندها عادي وماعندها اي طموح بالدراسه ولا بأي شي همها السوق والشباب
والفلوس وبس.....

وناصر كان يبي بنت جاده وهاديه عندها طموح وتفكيرها راقي...
ناصر : نوره لكن انا احبها وهي تدري بهالشي....
. ويمكن اللي تقولين عنه طيش مراهقه..
نوره : صحيح انك انسان متحرر زي مايقولون لكن بتظل رجل شرقي وماراح ترضى باللي تسويه..
ناصر : اسمعي انا احبها وانشاءالله بعد الزواج راح تتغير.....
نوره : لا تخلي حبك لها يضعفك...
ناصر : لا تشيلين هم......
نوره : والله انت اللي بتشيل هموم اذا مشيت ورى قلبك.....
ناصر : اتمنى يخيب ظنك...
نوره : ياريت....
ناصر قام وراح لأبوه المكتب اللي بالبيت
ناصر : السلام وعليكم السلام
ابو ناصر : وعليكم السلام حياك يبا

ناصر: الله يسلمك .. يبا بغيتك في سالفه......
ابوناصر: عارف ياولدي.. تبي بنت عمتك..
ناصر : ايه يبا..
ابوناصر : خلاص ياولدي بكره انشاءالله اكلم عمتك واكلم عمامها
(ابو هيفاء توفى لما كان عمرها سنتين وربتها امها وخالها ابوناصر)عشان نروح نتقدم لهم رسمي وماراح يلقون احسن منك..
ناصر قام وباس راس ابوه : الله يطول بعمرك ...

على المخده....
كان ناصر مبسوطه ويفكر في الزواج.. وساره كانت تبكي....على حظها
كرهت خطيبها......وهي اذا كرهت شي مستحيل ترجع تحبه مره ثانيه.....
ناموا اثنينهم..
ناصر مبسوط
وساره دمعتها على خدها.....
اليوم الثاني كان يوم اربعا....
صحت ساره الصباح ونزلت لقت امها واماني ..
جلست معاهم وهي سرحانه...
نزل بدر :الحلو وين سرحان..
ساره : بدير الله يقطع سوالفك...
بدر: ههههههه اقول انتي عازمتنا على فطور اليوم صح
ساره : مستغربه من اللي قال؟
بدر : محد قال لكن انتي عروس وعندك مهر وانا طالب بأول ثانوي .. يعني ...
ساره : هههههههههه طيب وكم بدر عندي وين تبي تفطر مالك الا سندويش فلافل بريال.
بدر: لا والله ....والله مايردني الا سينابون او كوستا.ولا اقولك ستار بوكس عشان تفلسين مره وحده
ساره : ههههه يفداك والله
رن التلفون
ردت اماني: هلا صباح الخير .. اي موجوده لحظه.. ساره شيماء..
ساره : هلا شيوم.. لا تقولي افطرتي..
شيماء : الناس تسلم تصبح شي.. مافطرت الفطور على حسابك ياحلوه...
ساره : طيب تعالي على بال مااجهز ونروح المارينا مع بدر..
شيماء : مسافة الطريق...
بدر : يمه عطيني مفاتيح سيارة ابوي..
ام عبدالرحمن لا يايمه روحوا مع السواق..
بدر: يمه انا مو بزر اعرف اسوق والرخصه باخذها بعد كم شهر..
ام عبدالرحمن : لا يايمه انا اخاف عليك من نسمة الهوا..خلي السواق يوصلكم برضاي عليك
بدر : انشالله تامري امر....
جات شيماء وسلمت عليهم وطلعت لساره غرفتها..
ساره :هلا وغلا وحشتيني..

شيماء : علينا .. اخاف عريس الغفله ياخذك مني..وتعالي ايش هالحلاوه
من الصبح اثاري الزواج يحلي وانا مدري(وهي تغمزلها)
ساره كانت لا بسه بطلون ابيض وتي شيرت احمر ومفتوح شوي من فوق
وفيه زخرفه ناعمه من جنب بالابيض
ساره غصت بالكلام ونزلت راسها: اي عريس اي هم..
ورفعت راسها كنها طنشت : اقول خلينا ننبسط اليوم ولا حقين على النكد
شيماء :استغربت في وحده تتكلم كذا بعد اول يوم ملكه..ليش ساروه تتكلمي كذا وش صار ,,
ساره : اقولك بعدين هذا بدر ينادينا.....يلا ننزل
نزلو شافوا بدر لا بس بنطلون جينز ازرق وتي شيرت ابيض ولا بس كاب ازرق ومكتوب عليه بالابيض
شيماء : اقول سروه ماتزوجيني اخوك طالع يجنن
سارره: ههههه اصغر منك بسنتين ونص
شيماء : عادي كلي شي مباح في الحب والحرب
ساره : مالت عليك امشي بس
بدر: يلا ماتخلصون سوالف وتعيبين على تروك مسكين
نزلوا وركبوا مع السواق..
وراحوا المارينا يفطرون... طبعا ماخلو شي ماطلبوه عناد في ساره بس
بدر : وش رايكم نقعد للغدا ونتغدا..

شيماء : والله فكره.. انا موافقه..
ساره : لا والله تبون تفلسوني. مافي غدا..
في المارينا تحت كان يدور على المحلات يبي يشتري هديه لبنت عمته او اللي بتصير خطيبته......
اخيرا..اشترى لها خاتم ناعم على شكل ورده وبداخلها فص وردي على شكل قلب..

طلعوا من المارينا وهم مبسوطين..
لكن كان في اثنين قبلهم ناغزهم

ناصر من كلام اخته نوره

وساره من اللي جاي مع خطيبها

البارت الثالث قريب انشاءالله

__________________________________________________ __________

>>>> الرد الثالث :
اتمنى تكوون عجبتكممم

وماااتكون الروايه موجوده من اول

وبسسسسس

__________________________________________________ __________

>>>> الرد الرابع :
يعطيك العافيه
تنقل للروايات الغير مكتمله...

__________________________________________________ __________

>>>> الرد الخامس :
حلوه تجنن تهبل حماس كمليها لاتطولين.