عنوان الموضوع : ولدى الله يهديه سياحة الامارات
مقدم من طرف منتديات الضمير العربي

السلام عليكم
خواتي انا كتبت الموضوع متامله ما اشوف مشاهدات بلا ردود لان تعبت وابا حل
خواتي انا عندي ولد واحد عمره سنتين و9 شهور حركي وايد ومشاغب بس هذي مب مشكلتي مشكلتي اذا سرت مول او حديقه او منتزة يشرد مب انه يسير بعيد ويرد لا يشرد واذا خوفته قلته بسير عنك يالله باي يقولي باي انادي انادي ولا يرد على مرة شرد عني بالمول تميت ادوره واصيح دقيت على اهلي دورو وياي اخر شي اخوي حصله متخبي داخل محل تخيلو ومرة الثانيه لقيته متخبي ورا الالعاب قلت بمنع عمري وامنعه من الطلعه بس امي قالتلي هذا مب حل لان اذا اطريتي ورحتي مكان وطلعتيه بيحس انه استواله فتره ما طلع بيسير يستكشف خليه بيتعود والله تعبت وياه اخاف يضيع واخاف عليه من هالهنود والباكستانيه ضربته وخوفته بخليه واروح ساعات احط له بالشنطه الشغلات اللي يحبها وانادي له بس يطنش وقت الطلعه ما يبا غير يشرد ايباد الموبايل كل شي جربته والله اتم احاتي وانا في البيت الحين مقررين نسافر اخاف يضيع بالامارات امان بس الدولة اللى بسيرها ما فيها امان دخيلكن ابا حل والله صار قلبي يعورني من الخوف عليه ما عندي غيره الله يهديه ويعقل

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
هههههه. أختي الله يحفظه ويبارك فيه ضحكتيني لأنه ولدج ذكرني ببنت أخوي ربي يحفظها يوم كانت عمرها سنتين لثلاث سنين كانت نفسه بالضبط وكانت جايبة لأهلها ولينا الرعب حتى مرة شردت منا على البحر ودخلت في البحر لين وصلت نص البحر ونحن والكل ركض وراها! كان فيلم رعب !. بس الحين ما شاء الله عليها عقلت وقربت تصير عمرها 6 سنين .ولدج بعده صغير , وما يعرف المخاطر ولا حتى بيفهمها في هذا السن وهو يبى يكتشف العالم ويشوف كل شي قدامه مفاجآت وعلى فكرة هذا يمكن يكون دليل أنه ماشاء الله عليه ذكي فأنتبهي لهذه النقطة ونمي ذكاؤه
. بقول لج على بعض الخطوات وإن شاء الله تفيدج أختي .
1- قبل ما تطلعي كلميه بهدوء وقولي له لو تبى تطلع معاي أتم ماسك بإيد ماما ولو ما بسوي كذا برجعك على طول البيت . وفعلاً لو شرد منج أمسكيه بسرعة ورجعيه البيت ورجعي أطلعي ( أعرف مشوار بس بيعرف أنج جد).
2- لو سوى حركته وشرد خبريه ذيك اللحظة أنج بتعاقبيه , قولي له خلاص مرة ثانية ما بتطلع معاي وخذي منه شي يحبه ولا تعطيه له يوم يومين لين يعتذر ويقول ما بيعيد هذه الحركة مرة ثانية . أو العقاب الثاني أطلعي وخليه في البيت عند حد من أهلج ولا تاخذيه معاج وقولي له ما باخذك أنت تشرد وحتى لو صاح عادي قوي قلبج وطلعي عنه .وإذا طلعتوا وكان عاقل وسمع الكلام وماشرد أمدحيه وكافئيه .
3- لا تقولي له قصص تخوف عن الشردة وغيره لأنه هذا بيخليه خواف وما واثق في نفسه .
4- فيه رباط خاص في السوق , هذا الرباط تربيطيه في الياهل وطرفه عندج ويعطيه مساحة للحركة ولكن لو تحرك بعيد تقدري تشديه لج.( هذا بيفيدج في السفر).
5- دايماً حطي في جيب طفلج أو على صدره بطاقة فيها أسمه وأسم أبوه وعنوانكم ورقم الموبايل ولو مسافرة حطي عنوان الإمارات وطبعاً باللغتين العربية والأنجليزية ولو البلد اللي سايرينه ما يتكلموا هذه اللغتين يفضل بعد تكتبه بلغة هذه البلاد إحتياطاً .
6- دايماًيوم تطلعي معاه يكون معاج حد كبير ثاني , أبوه , عمته , خالته .مع أنه الأفضل ريال علشان يخاف منه شوي .
7- نقطة مهمة لازم أذكرها في البداية : لو عندج حد من أطفال أهلج أكبر منه وقريب منه يعني عمر خمس سنوات أو أكثر , خليه يقعد معاه ويكلمه أنه لازم يكون مع أمه وأنه خطر أنه يشرد منج وأنه ممكن يضيع .ترى اليهال يفهموا على بعض أكثر ويسموا كلام بعض .
الله يبارك فيه ويحفظه ويجعله من الصالحين .آمين

__________________________________________________ __________

>>>> الرد الثاني :
مشكوره على ردج
جربت اييب ربطه كسر خاطري قالي ماما الله يخليج بلعب بس برد استخدمها وجربت اقولها لو شردت ما بوديك يقولي اوك ماما ويشرد ما يحب امسك ايده بالنسبه للبطاقه بسويها ان شاء الله ومشكورة اختي بسوي اللي قلتيه بطلع وبخليه

__________________________________________________ __________

>>>> الرد الثالث :
ع فكرررره نفس ولدي بالظبط يشرررررد حتى ابوه يكررره الطلعه بسبب هالحركااات يعكر مزاااجنااااا. الحل الوحيد حضااااااااانه دخلي لان هو فيه طااااقه يبا يطلعها. ممكن بيتج صغير او مافيه حوي من جي مضاايق يبي مكاااان شررررررررح لان انا الحوي مالي صغير اوديه فيلااا عمتي ويتم يراااكض ف الحوي مستااانس وخف الحمداللله

__________________________________________________ __________

>>>> الرد الرابع :
الله يهديه

اشتري baby walking belt حاولي تدربيه في البيت ما عليه شوي شوي ينربط ولا يضيع

او مسكيه إذا ما طاع ردي مسكيه مره ثانيه مب من اول مره بيسمع الكلام لازم تعوديه وحتى لو بكى شو فيها اهم شي ما يضيع

لا تضربيه يمكن خايف لكن بعد لا تخليه هالشكل بيضيع واذا ما رضى حطيه بالعربه وعطيه شي ولو بكى آخر شي بيسكت وبيهدى وبيسمع الكلام

الله يصبرنا

__________________________________________________ __________

>>>> الرد الخامس :

المشاركة الأصلية كتبت بواسطة ام براق
ع فكرررره نفس ولدي بالظبط يشرررررد حتى ابوه يكررره الطلعه بسبب هالحركااات يعكر مزاااجنااااا. الحل الوحيد حضااااااااانه دخلي لان هو فيه طااااقه يبا يطلعها. ممكن بيتج صغير او مافيه حوي من جي مضاايق يبي مكاااان شررررررررح لان انا الحوي مالي صغير اوديه فيلااا عمتي ويتم يراااكض ف الحوي مستااانس وخف الحمداللله



صح انا ساكنه بشقه بشوف الحضانه على اقل ادخله 3 شهور