عنوان الموضوع : معانا حق نزعل ولا ؟؟؟
مقدم من طرف منتديات الضمير العربي

مرحبـا خواتـــي...
حابة أفضفض لكم اللي بخاطري.. لأني أبغي ارتاح .. وأبغي اعرف هل أنا على صح ولا غلط .. وما أدري إذا هي مشكلة ولا .. وماتوقع إلها حل .. انا بتكلم عن موضوعين

الموضوع الأول الله يسلمكم .. أنا متزوجة من 7 سنين الحمدلله .. وزوجي مب من الأهل ... بس من معارفنا.. ونحن مب ساكنين مع أهل ريلي.. ساكنين بروحنا
المهم هو أكبر واحد من إخوانه الأولاد ..بس مش مكمل دراسته بسبب ظروف صارت له.. المشكلة أنه أهله مب مسوين له سالفة موووولية ..
كله يفكرون انه مايفهم شي .. مع أنه مايقصر دوم يخدمهم ويسويلهم ويوديهم واييبهم... بس وايد مسوين له طاااااااف ..
يعني مرة سمعت انه في واحد ياي يخطب وحدة من حمياتي.. طبعا هم ماخبروه .. ولا طلبو انه اييي .. عمي بس طلب أخوه اللي أصغر عنه ب 3 سنين .. أخوه هذا مسوي عمره الكل في الكل ومتزوج بنت عمته وماكلين الأخضر واليابس
اتخيلو إذا حد سافر من إخوانه مايخبرونه .. كله يخافون يخبر الناس .. انزين شو فيها؟؟ والله استغرب من تصرفاتهم .. واذا عرف يقولون له اخوك عنده شغل.. مايقولون له سافر.. مع انه خواته اليهال يعرفون كل شي .. وهو الكبير خبر خير .. آخر من يعلم وأنا اللي اقوله أو يسمع من حد من أهله..
يعني إذا واحد من الأهل طلعت له أرض أو انتقل بيت يديد مايخبرونه... كله يدسون .. صراحة يضحكوني.. إذا بيسافرون مايخبرونه الا وقت ما بيطلعون .. يعني بنلحقكم مثلاً!!!!

مايخبرونه بأي شي لدرجة أنه أخوه الثالث لما ملج .. خبروه بعد الملجة ... وإخوانه وخواته كلهم يدرون باللي يصير بالبيت بس هو لا... بس تعالو شوفوهم لما يبون شي .. على طوول يتصلون له ... فلان نحن نبا ونبا ...!!!!

شي يقهرني بصراحة ... ليش هو مب إنسان يحس .. والله وايد يغمضني كله يحسسونه انه اقل عنهم
شو الحل وياهم ؟؟؟؟؟



الموضوع الثاني اللي ابغي اكلكم عنه انه ريلي قبل مايتزوج كان عنده غرفة هو وأخوه اللي أصغر عنه وهذا متزوج بنت عمته وساكنين في بيت بروحهم ..
ونحن كل جمعة نتجمع عندهم وإذا حد من عيالي أو عيال أخوه يبغي يرقد نرقدهم في هذي الغرفة .. المهم شوي شوي أخوه وحرمته قامو مايروحون بيتهم .. .. يرقدون في هالغرفة اللي هي كانت غرفة ريلي وأخوه قبل.. وشوي شوي يابو أغراضهم وملابسهم وملابس عيالهم .. لانهم تعودو يخلون عيالهم بيت عمي .. ويروح هو وحرمته السينما والسناتر لين آخر الليل..

المهم كل مابغي اروح ارقد عيالي ألقى الغرفة مقفولة.. وعمتي قالت لي المفتاح ضايع .. طلبت المفتاح من ريلي .. وكل مابغي اروح الغرفة .. عمتي ويها يتغير تقولي ملابس فلانة في الغرفة تبغي تمنعني بأي طريقة .. أقولها انا برقد ولدي بس لانه ماعنده مكان يرقد فيه..والله العظيم والله الشاهد اني بس شفت جلابياتها معلقة في الغرفة .. عمري ماشفت شي من الملابس الداخلية ...أصلا مافي كبت في الغرفة وملابسهم كله في الشنطة

ومرت أخوه قامت تفاتن مرة على عمتي بس انا ماكنت موجودة .. خبروني بالسالفة.. تقول لعمتي كيف هذي تدخل وملابسي الداخلية في الغرفة.. الله وأكبر عليها كيف تجذب .. وعمتي وايد تخاف منها لانه لسانها وايد طويل وتخبر أمها بكل شي وأمها وايد ملسونة وبيت عمي وايد يخافون منها ويسوون حق بنتها ألف حساب..حتى عقب هالسالفة مرت أخوه زعلت وماقامت تسلم علي !!!! بس أنا رحت سلمت عليها ولا كأن صار شي .. لأنه هذا حقي وانا مب غلطانة اذا دخلت الغرفة

بس أنا اللي قاهرني في السالفة أن بيت عمي مب معاي واقفين مع اخو ريلي وزوجته اللي خذوا الغرفة عني وماشاورو ريلي وهو أخوهم الكبير لا احترام ولا شي الحمدلله والشكر.. بس حطوا أغراضهم ومنعوني أدخل ارقد عيالي .. عيالي يصيحون أوقات وارقدهم في غرفة الطعام اللي قريبة من المطبخ وايد ازعاج وكل شوي الخدامات يفتحون الباب واليهال مايرقدون.. وأنا لما كنت حامل مالقى مكان أريح فيه شوي.. كله يالسة على هالغنفات متيبس ظهري.. رمست مرة عمتي قلت لها نحن لنا حق في هالغرفة بعد ..قالت لي بس هم أغراضهم موجودة مايصير تدخلون ..قلت لها كيف يحطون اغراضهم وياخذون الغرفة بدون مايشاورون ريلي ويعرفون اني ارقد اليهال .. طبعا زعلت ومدت بوزها وحمياتي طلعوني انا الغلطانة ... وقالولي انتي تفرقين بين ريلج واخوه لما ترمسين في هالموضوع.. مايشوفون عمرهم شو يسوون ..هم اللي يفرقون بتصرفاتهم.. وريلي بعد كلم أخوه .. قاله نحن بعد نبغي الغرفة مب كله حقكم .. اتخيلو شو رد على ريلي .. قاله كلموا حرمتي!!!!
وليش انته مالك كلمة .. أبغي أعرف منو الريال فيكم !!!!!

والحين اخو ريلي وحرمته ردو بيتهم عقب ماكملو سنة طايحين في بيت عمي .. بس بعدهم محتلين الغرفة واغراضهم فيها ..
بصراحة انقهرت .. وقلبي عورني على ريلي عيالي .. وهم مافيهم ذرة احساس الحمدلله والشكر ..


لو كنتوا مكاني شو بتسووون ؟؟؟؟

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
قههههررررررررررررررررررر

أنا لو مكانج بفتح الغرفة وبعق أغراضهم برع سبيل ,, ملابس داخلية ولا خارجية ما يهمني

واللي ما يشتري يتفرج

وخلهم يتنازعون ويحتشرون ويزعلون مع السلامة
ما بتتغير حياتنا ولا بينقطع رزقنا بزعلهم
اللهم عافنا

أختي خذوا حقكم
مب بس عشان امها ملسونة نخاف منها .. انزين وملسونه وخير يا طير
كل الناس عندهم لسان وكلهم يتكلموا واللي يبا يخرب سمعة حد ما يتريا الزلة منه
عادي بيقعد يألف والناس السخيفة اللي نفسهم بتصدق

وبعدين هم شو لهم اذا الريال مكمل دراسته ولا لأ ,, كيفه حررررر
ياما ناس ما كملت دراستهم بس لو تقارنينهم باللي متخرجين حتى من الجامعات بتحسينهم أحسن عنهم واعقل عنهم باتخاذ القرارات وأنا شاااايفة بعيني هالنوعية
أكبر مثال أنا وريلي
ريلي عنده شهادة ثانوية وأنا عندي شهادة جامعية ,, بس لو تقارنين المعلومات والثقافة اللي امبينا بتقولين العكس سبحان الله


اسميني انقهرت, حطيت عمري مكانج

الغالية سوي اللي تحسينه يريحج ويريح ريلج وعيالج وما عليكم من حد
اتونسوا واستانسوا وسيروا وردوا واذا عندكم مجال تسافرون سافروا ولا تخبروا حد عنااااد

وربي ييسر أموركم ويطلع لكم بيت وتفتكون من هالصدعه


__________________________________________________ __________

>>>> الرد الثاني :
بسوي طاف
احس الموضوع ما يستاهل اني اعور راسي عليه خاصه موضوع الغرفة
بس الموضوع الاول هالشي يخص ريلج واذا هو مضايق ومب مرتاح المفروض هو يرمس اهله
انتي مالج شغل فالموضوع

واسمحيلي هذا راي الشخصي

__________________________________________________ __________

>>>> الرد الثالث :
ياختيه الموضوع الاول بالنسبة لريلج ليش مايشاورونه انا بقولج يمكن ريلج مايروح لهم دوم يمكن مايبونج انتي تعرفين كل شيء بالمختصر المفيد فعشان جي مايخبرونه
اما الموضوع الثاني المفروض هاي الغرفة تكون للكل وماعليج من حد واذا مايبونج تروحين بيتهم عليج بالزيارة السريعه وتوجبين صلة الرحم والسلام ختام

__________________________________________________ __________

>>>> الرد الرابع :
واضح من الموضوعين ان ريلج انسان طيب وهادي وشخصيات اخوانه أقوى وابرز في العيله وهالشي خلاهم يتلاشونه ويهمشونه لأنه عنصر غير فعال عندهم والحل في رأيي ان ريلج يبدا يبرز نفسه عند اهله وفي طرق واساليب مثال : حاولو تزورون اهله كل خميس او جمعه وتاخذون فواكه أو تشترون عشى خفيف عالدرب وتودونه وانتي بعد بين فترة وفتره اهدي عمتج هدية بسيطه (عطر, دخون ,قطعه ... الخ) هالزيارات المتواصله بتخليه يتقرب منهم ويعرف أخبارهم فما بيتجاهلونه أبدا

__________________________________________________ __________

>>>> الرد الخامس :

المشاركة الأصلية كتبت بواسطة الأصالة
بسوي طاف
احس الموضوع ما يستاهل اني اعور راسي عليه خاصه موضوع الغرفة
بس الموضوع الاول هالشي يخص ريلج واذا هو مضايق ومب مرتاح المفروض هو يرمس اهله
انتي مالج شغل فالموضوع

واسمحيلي هذا راي الشخصي



مشكورة أختي عالرد ..
بالنسبة لريلي هو يتضايق طبعا بس هو من النوع الكتوم اللي مايرمس بس مستغرب من تصرفاتهم
وانا اقوله طنش .. ياخبر اليوم بفلوس باجر ببلاش..
بس الواحد كم بيطنش مب مرة ولا مرتين
الواحد اتيييه غصة في بعض الأوقات
وبالنسبة لموضوع الغرفة .. أنا خلاص لاعت جبدي ..ماقمت اروح الغرفة من فترة يمكن أكثر من 6 شهور ..
ماحب اعور راسي .. واحسهم منحرجين اوقات بس مايعرفون شو يسوون
يخافون يزعلون الحلوة