عنوان الموضوع : قصة ولادتي ببنتي عفاري لصحة الجسم
مقدم من طرف منتديات الضمير العربي

السلام عليكم بناات..
بقولكم اليوم قصة ولادتي اللي كانت تاريخ 17\6 و يبت بجري عفاري فديتها..

يوم الاربعاء تاريخ 17\6 كان عندي موعد طلق صناعي لاني كنت مطوفه موعدي باسبوع..
هاك اليوم ما ادري شو كان مستوي فينا..ههه مكيف غرفتنا اخترب و ما طاع يشتغل.. و رقدنا في غرفه ثانيه و ما يانا رقاد موليه.. و انا ناشه من الفجر مع اني ما رقدت .. يمكن من الوناسه هههه لاني كنت متحرقصه ابا اربي.. المهم نشيت و تعدلت و سشورت شعري و حطيت ميك اب خفيف و لبست و سرت المستشفى و دخلوني.. كنت انا و ريلي بس .. ما بغيت اخبر امي لاني كنت ادري اني مطوله و ما بغيتها تتعب فديتها..
المهم .. يتني الدكتوره و قالتلي بنعطيج تحميله عشان تفتح الرحم و لازم اتريا 6 ساعات و عقب بيحطولي تحميله ثانيه.. كانت الساعه 12 الظهر..على الساعه 3 ياني ويع خفيف و انا مستانسه و يالسه اسولف ويا ريلي.. و العصر يوني امي و اختي و يلسوا عندي لين العشاء و انا الويع بعده خفيف.. و اميه تتحرطم عليه و تقولي لعوزتي عمرج.. جان ترييتي لين ياج الويع بروحه.. و انا اقولها برايه اميه ابا اربي.. حليلي ما ادري شو اللي يايني.. المهم يت الدكتوره و قالت حق قوم اميه بعدها مطوله يمكن تربي باجر.. جان اقولهم عيل سيروا ارقدوا عشان باجر تون مصحصحين و انا بتم ويا ريلي>> وايد اتحرى عمري شجاعه..
و من روحت اميه و اختي بدا يزيد الويع.. و يت دكتوره ثانيه و يوم شافتني عصبت على النيرسات و قالتلهم الحين هاي يايبينها عشان تولدونها والا تعذبونها!! و انا مب عارفه شو السالفه.. قالت لازم يعطونج طلق في المغذي لانه انتي اصلن مافيج ويع و هاي التحميله ما تسوي شي.. جان تي النيرس و تحطلي الابره و تميت شوي و زاد عليه الويع وااايد.. ما توقعت انه ويع الولاده جيه.. و ريلي مسكين يالس حذالي و يقرا عليه و انا احس عمري بموووت من كثر الويع و عقب شوي يت الدكتوره تفحص و قالتلي فاتح عندج 5.. لازم افتحلج الماي.. و يابت شي طويل و فيه مثل السلك و دخلته و انا ميته من الزياغ و حسيت بويع فضيييييع و عقب حسيت بالماي ينزل.. و هني بدا الويع الصدقي.. هذا كله و انا بروحي ريلي طلعوه برع و قوم اميه محد كنت احس اني وحيده و اقول حق النيرس سيري ازقري ريلي.. يوم يا وشافني بهاي الحاله تم زايغ و اتصل حق اختي و خبرها و قالها تعالي انتي و عموه.. و عقب يابتلي النيرس الغاز و قالتلي تنفسي فيه يوم بتيج الويعه.. يوم تنفست فيه.. ريحته خايسه و خلاني اهلوس و احس انه بيغمى عليه و ريلي يالس حذالي يقرا.. جان تلوع جبدي و حسيت اني برجع.. و مب قادره اتكلم.. حاطه ايدي على حلجي و اأشر حق ريلي عشان يقوم و هو مسكين يتحراني اباه يمسك ايدي.. بس الحمدلله اني في اللحظه الاخيره قدرت اتكلم و اقوله قووووووووم >>>> ههههه و رجعت جدامه و قفطت و هو حبيبي ياب الكلينكس و نظف حلجي و يقرا عليه فديته.. شويه و تي النيرس مال شفت الليل.. و اونها لطيفه يايه تسلم عليه و انا فيني ويع جان اتي و تحط ايدها على ركبتي و تقولي شخبارج.. صوتها كان مزعج و انا فيني ويعه .. جان انهد عليها و اقولها اسكتي عني و اظربها في بطنها.. ريلي حليله فقط و زاغ مني..حليلها لا تعرفني ولا اعرفها.. بس من هذيج اللحظه وانا حاطه دوبي من دوبها.. هني ما قدرت اتحمل الويع جان اقول حق ريلي ابا ابرة الظهر خلاص انا بموت عنك... زقرلي النيرس جان اقولها ابا ابيديورال انجكشن .. اتويع و ارمسها انجليزي بعد ههه و هي طمه.. تقولي يو وونت باس يورن؟؟؟ جان تحصل لها ظربه ثانيه في بطنها و اقولها انتي غبيه ما تعرفين شي سيري ازقري الدكتوره.. و هي مصره تقولي انا اعرف قولي شو تبين.. قلتلها باك انجكشن و عقب فهمت.. و عقب شوي ودوني غرفة الولاده.. و انا بروحي و اقول للنيرس سيري ازقري ريلي و فيني صيحه بس الحمدلله ما صحت و كنت قويه.. المهم ياني ريلي و تمينا في غرفة الولاده نتريا الدكتوره عشان الابره.. و يوم دخلت.. طلع ريااال!!! و انا مب لابسه شيله و لابسه ثياب المستشفى.. ريلي تم معصب بس ما قال شي و انا قافطه.. الدكتور فهم ريلي و شرح له عن الابره و طمنا انه ما منها خوف و من خذيتها الحمدلله رب العالمين.. خف الويع وااااااايد و بس كنت احس الويع من تحت.. يوني امي و اختي و يلسوا ويايه و كانت النيرس بس موجوده و بين فتره و فتره اتي الدكتوره تفحص.. على الساعه 4 الفجر قالت الدكتوره فاتح 9 و انا بموت من الويع.. جان تطلع عني!! و النيرس لابستني و يالسه تفتح القراطيس و تجهز الطاوله و انا منقهره منها و اقولها ازقري امي و ريلي و مب مسوتلي سالفه.. عقب حسيت انه شي بيطلع.. و اقولها شي بيطلع.. تقولي لا تسوين بوش بعده ..و تميت اتويع و ميوده عمري ما ابا اسوي بوش .. بس خلاص احس لا ارادي.. عقب سألتها اسوي بوش؟؟ جان تقولي اذا تبين سوي!!! شويه و دخلت الدكتوره و تمت تقولي بوووووش بووووش .. و انا اسوي و تقولي لا غلط!! اقولها انزين كيف؟؟ تقولي سوي.. و يوم اسوي تقولي غلط!!! ما علمتني كيف اسوي بوش و عقب قالت البيبي تعبان .. هاتوا الشفاط.. و انا زايغه شو هذا الشفاط بعد.. كنت احس براس البيبي شوي و بيطلع.. ما صبرت عليه و حطت الشفاط و شفطوا بينتي و حطوها على صدري فديتها كانت صغيرووونه.. عقب تميت ساعه اتريا دكتورة الخياطه تخيطني.. و ريلي و امي متحرقصين برع يبون يدخلون.. عقب يت الدكتوره و يلست تخيطني.. و قالتلي بسويلج خياطه تجميليه لانه مسوين للبيبي شفط و المكان تقطع شوي.. بس ما كنت احس بشي لاني كنت متخدره.. لا حسيت بالقص ولا بالخياطه.. و يلست اسولف ويا الدكتوره و هي تخيطني و طلعت اخت ربيعتي >>> هههه متفيقه اسولف و اتعرف .. عقب ما خلصت دخلوا امي و اختي و ريلي و يلسوا ويايه شوي .. بس اميه فديتها كانت تعبانه فقلتلها سيري و عقب تعالي.. و تميت انا و ريلي بس.. انا ربيت الساعه 5 و لين ما خيطوني 6:30 و تميت اتريا لين الساعه 9 في غرفة الولاده عشان يودوني غرفه.. اونه السيستم خربان و وايد حريم ربوا اليوم و ماشي غرف.. بس الحمدلله يوم شفت بنتي نسيت كل العذاب اللي تعذبته الله يحفظها لي و لابوها و يجعلها من الذريه الصالحة يا رب .. و الله يسهل على كل الحوامل .. صح انه الولاده عذاب.. بس متعه والله.. اهم شي الوحده ما تكون خايفه و لازم يعلمونج كيف تسوين بوش من قبل..

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
زيغتيني والله وانا بعدني في بدايه حملي

الحمدلله ع سلامتج ومبرووك البيبي

__________________________________________________ __________

>>>> الرد الثاني :
حبيبتي والله وااااايد تعبتي

الحمدلله ع سلامتج و سلامة البنوته

ادعيلي هالأيام لأني بربي إن شاء الله

والله يسهل على كل حامل يرزق كل وحدة الذرية الصالحة إن شاء الله

دمت بود

أم سارة

__________________________________________________ __________

>>>> الرد الثالث :
تستاهلين السلامة خيتوو و تتربى بعزكم

__________________________________________________ __________

>>>> الرد الرابع :
الحمدلله ع سلامتج و سلامة البنوته
ادعيلي قريبت ولادتي
يارب يسهل عليه وعليكم .... ><

__________________________________________________ __________

>>>> الرد الخامس :
تستاهلين السلامه .... وميروك ما ياج....