مصير عيالي عقب ابوهم لسلامتك

[khouloud]

عنوان الموضوع : مصير عيالي عقب ابوهم لسلامتك
مقدم من طرف منتديات الضمير العربي

هلا عزيزاتي

صار لي فتره ما شفتكم ولا دخلت المنتدى

ع العموم جيت وياي حيرتي بعد ايام بخلص عدتي كأرمله صحيح كانت العده صعبه بس الحمدلله طابت بعض الجروح اللي في خاطري

ورضيت بنصيبي في هذي الدنيا وقريت كذا موضوع عن عضوات فقدن ازواجهن الله يصبركن عزيزاتي

مشكلتي :

انه اهل ريلي واهلي ينتظرون الرد مني بخصوص زواجي من اخو ريلي رحمة الله عليه

واخو ريلي اصغر عني بسنه تقريبا ف هم يقولون كيف بتعيشين روحج ومطالب الدنيا زادت ولازم يكون عندج ريال مع العلم انه اخو ريلي هو اللي طالب الزواج مني بس صبر على شان العده

مع العلم ان الزواج بيكون عباره عن عزيمه فقط

وانا ياحبايب

موافقه ومب موافقه

موافقه من ناحية انه عيالي صغار ويبون ابو يحميهم ويكون في عونهم ويعوضهم عن ابوهم ومابيحصلون احن عليهم من عمهم واللي معور قلبي انه علمهم ينادونه باباه

وانا ياعزيزاتي

اروحي استقلت من شغلي لانه وحده من الخوات في المنتدى قالت اسألي شيخ عن شغلج في البنك ولما سألت طلع شغلي حرام لانه البنك اللي اداوم فيه من البنوق الربويه ف استقلت وماخذت رواتبي

ومب موافقه

اقول يمكن مابرووم اتأقلم مع اقرب الناس لريلي رحمة الله عليه اكيد بيكون فيه نوع من التحفظات والحيا

وعقب اقول لا ليش اوافق الناس شوبتقول؟

بس انا ابا اامن مستقبل اليهال

عيالي بتطلع لهم مستحقات ابوهم والمبلغ فوق الربع مليوون بيتقاسمونه مع اخوهم من ام ثانيه وهم قصر ف بحتاج حد يوديني واييبني نخلص الاجراءات

وبعد ابا اسوي لهم مشروع صغير يأمن مستقبلهم

وبحاجه لريال يكون سند لي ويساعدني ويرتب افكاري

كيف برابع روحي؟ مارووم

هذا غير مشاكل الدنيا اللي ماتخلص

مرات اقول يمكن هذي نزوه هوه يمر فيها خاصه انه شافني عدل في يوم توفى ريلي ومرات اقول بس مهما كان هوه انسان خلوق ومشهود له بالاخلاق عند كل العرب

مابا اتزوج شخص يطمع فيني وفي عيالي ابا ريال يعينني انا وعيالي الثلاثه

لو كان ماشي اطفال كنت برفض هالريال وانا مغمضه وبقول مب في حاجه له وماباه

بس وضعنا محتاج ريال

شورن عليه الله يرضى عليكن

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

أولا بادي بقول: أجاركِ الله في مصيبتكِ وأخلف لكِ خيراً منها والله يرحم أبو عيالج ويكرمه،،
ثانيا: استخيري ربج،، عقب شوفي شور أهلج (الثقة اللي تعتقدين إن آراءهم منطقية وتعتمد على العقل)،،
ثالثا: ادرسي المر من كل الجوانب وشوفي شو سلبيات هالزواج وشو إيجابياته واعتماداً على هذا وشور الأهل وطبعا الاستخارة قرري،،
رب ييسر أمورج ويوجهج للخير والصواب،،

__________________________________________________ __________

>>>> الرد الثاني :

المشاركة الأصلية كتبت بواسطة كتاكيتو
أولا بادي بقول: أجاركِ الله في مصيبتكِ وأخلف لكِ خيراً منها والله يرحم أبو عيالج ويكرمه،،
ثانيا: استخيري ربج،، عقب شوفي شور أهلج (الثقة اللي تعتقدين إن آراءهم منطقية وتعتمد على العقل)،،
ثالثا: ادرسي المر من كل الجوانب وشوفي شو سلبيات هالزواج وشو إيجابياته واعتماداً على هذا وشور الأهل وطبعا الاستخارة قرري،،
رب ييسر أمورج ويوجهج للخير والصواب،،



الغاليه
استخرت الف مره وماحسيت بإشاره او دليل

__________________________________________________ __________

>>>> الرد الثالث :

الله يوفقج انتي وعيالج

يارب ان شاء الله ويبعدكم من كل شي

حبيبييتي انتي بعد انسانه محتاجه حد يشاركج حياتج مب انه ريلج مات خلاص وقفت الدنيا و

وانا انصحج اتوكلي علي الله ووافقي علي الريال

وان شاء الله يسعدج ولا تحطين اختي مبررات على شان موافقة

انا ولد عم امي كان متزوج وحدة وسبحان الله الريال مات عقب 3 سنوات وما يابت عيال من ريلها

عقبها بسنة اتزوجت اخووووووه محد رمس عنها

لو تمينا علي رمسة الناس عيل عزا الله كلنا خبز

واذا عن ريلج اتراه الله يرحمة ان شاء الله

وان شاء الله ريلج يحبج ويحب عيالج وما بيحصل انسان امين اكثر من اخووة
لج انتي

وعيشي حياتج يا الغالية لا تفكرين برمسج فلان وعلان لانه وايد اشيا في هدنيا خسرناها عشان رمسة الناس

يوم اييي ولد الهندية قلنا لا شو بيقولون عنا الناس
يوم ايي واحدة زين وما فيييه شييينة لاكن فقير ومب من مستوانا

صدقني رمسة الناس تحرق القلب لاكن في وضعج الناس ببتفهم الموضوع

ومعاه الايام كل شي بيكون عادي روتين بس عطي عمرج وقت حبيبييتي

وكل شي خليييه علي رب العالمين

واقر سورة البقرة واستغفر وادعي ربج انه ايسرلج الخير

واتمنى ان شاء الله الله يرزقج بنت واتسمينها نور مب عشاني عشان اتنور حياتج

وعلي فكرة اسمي الحقيقي غير بس احب هل اسم لانه معظم الي اساميهم نور صدق ينورون حيات الانسان

وربي يسعدج وان شاء الله اتيييبين اخوان لعيالج ان شاء الله يارب

ومبروك حبيبييتي ومقدما

__________________________________________________ __________

>>>> الرد الرابع :

الله يرحم ريلج و يغفرله ..

و انا من وجهة نظري

اذا الريال زين و ما عليه كلام و اخلاقه تشهدله

و يصلي و يصوم - يعني محافظ على الامور الدينيه

و عيالج يحبونه

وافقي يا اختي

لن الحرمة في هالزمن تحتاج سند و عون لها

تحتاج ريال - يوقف وياها و ياخذ بإيدها

و يعينها على تربية العيال و أمور الدنيا من تأمين المسكن

و المكان المناسب لتربيه العيال و الأكل و الاهتمام و الرعاية

لأنج يا اختي بتتعبين بروحج يا اختي ..

حريم اليوم مب مثل حريم قبل ..

حريم اليوم - محتاجين لريال يساعدهم في حياتهم ..

و اذا انتي تشوفين اذا هو طمعان في حلال أو ورث اخوه

و انه مغصوب أو مب مناسبنج -

ما اقدر اقولج ارفظيه - شوفي و اتأكدي اكثر من اخلاقه

و اكيد انتي تعرفينه بحكم انج كنتي عايشه معاه في نفس البيت


و انتي صلي و استخيري يا اختي

و ما خاب من استخار ..

__________________________________________________ __________

>>>> الرد الخامس :

المشاركة الأصلية كتبت بواسطة جود الشارجة
عظم الله اجركم اولا

اختي تبين راي العقل

وافقي....لانه الريال من لحمهم و دمهم ولا بتحصلين حد احن على عيالج منه .
يعني انتي لو متأكدة انه محد ضغط عليه بفكرة خذ ارملة اخوك عن يتشتتون العيال مع زوج غريب او او او او ...
توكلي على الله و انتي مغمضة
الحرمة مهما يكون ما تسوى من غير ريال يسندها على مصاعب الدنيا..فما بالج وانتي في رقبتج 3 يهال...و لا تنسيـــــــــــــن تربية الحرمة تفرق الف مرة عن تربية الريال.

الف مبروك مقدما




محد ضغط عليه من الاهل متأكده ولكن اتوقع انه تمادي طليقة اخوه ومشاكلها معانا من اهم الاسباب اللي خلته يفكر يرتبط فيني وفيه سبب انه كان خاطب وحده بس مايحب الاعراس ف ماكان يبا عرس

يبا عزيمه بس واهل البنت تموا يرفضونه لين ماعرست البنت بعد هذا سبب من الاسباب مابجذب عليج