عنوان الموضوع : تجربتي بالاجهاض... عبرة و نصيحة لصحة الجسم
مقدم من طرف منتديات الضمير العربي
بسم الله الرحمن الرحيم
السلام عليكم و رحمة الله و بركاته
خواتي السموحه على هذي المشاركة ان كانت تسبب الضيق للبعض
بس انا محتاجة اني اكتب عشان افضفض و عشان غيري يعتبر
أتذكر بيت الشعر "كان و كان و كان و كان و غص القلب بالأحزان"
تزوجت و تأخر حملي سنة و دعيت و سعيت و الله رزقني الحمد لله بنوته مثل القمر
و بعد الأربعين على طول حملت الحمد لله اللي رزقني ولدي حبيبي
فرحت بالحمل الاول لأنها بكري و كل وحده تفرح بحملها الأول
و فرحت بحملي الثاني لأنه الولد شيخ الشباب عضيد اخته
و الله أكرمني بعد 6 أشهر بالحمل و كان ولد..
لكن
كل من سألني كنت اقول ولد بس انا كان خاطري بنت
و كان ريلي دائما يناشبني على الاسم مصر يسميه اسم قديم كبير و مصر بين فترة و الثانية يقهرني و يقول بسميه
لين قلت له انت اقعد حن لين يموت الولد في بطني
و كنت افكر اكيد بتعب عيالي صغار
كيف بوفق بينهم
ريلي بعد ما قصر فيني...
كله يزعلني ما يحس بتعبي ما يستاهل البيبي
كنت اقول له البيبي حركته ضعيفة ودني المستشفى كان مشغول و يطنش يتحراني بس ابي اضيع وقته
سافرنا عشان اعالج بنتي قبل السفر قلت له ودني افحص قال مشغول بعد ما رجعنا قلت له ودني افحص قال مشغول
و ممنوع اطلع بدونه.
في يوم من الأيام.. تضاربنا لين عصب و ضربني على ظهري 3 ضربات بكل قوته
تميت بالفراش.. ثاني يوم وزنت و الصدمة كانت اني نازلة 2 كيلو بليلة وحدة
انا حامل 6 اشهر و ما حسيت بحركة البيبي..
رحت لمركز طبي ما فيه عيادة نسائية لكن فيه هندية شاطرة تسوي التراساوند
و الصدمة كانت كبيرة و الخبر كان صعب
البيبي مات
حبيبي تركني
كأني يوم قلت "بيموت في بطني" كان في ملك و راح ولدي
اتصلت لأخته قلت لها خبريه عشان ايي يوديني المستشفى لازم أطيحة قبل لا يصير فيني التهابات بالرحم
و على طول اتصل قال انا ياينج و كان يصيح مقطع نفسه من الصياح و يقول أنا السبب
قلت له كيف بتي الحين؟ ألحين صرت فاضي !!! لما الولد كان يعيش كنت مشغول وش اللي فضاك ألحين.
رحت المستشفى بالدرب ارسلت لأختي مسج "البيبي ميت في بطني" و غلقت فوني و الدكتورة قالت لازم طلق و ولادة لأن البيبي كبير ما يعتبر سقط, بعد ساعات أهلي كلهم حولي الحمد لله على نعمة الأهل فعلا كانوا خير سند و وجودهم شكل فرق كبير, حتى خواتي ثنتين نامن عندي
و عطتني تحاميل مهبلية على دفعات حبتين كل 3 ساعات
من الظهر لين الساعة 10 بالليل
و ثاني يوم ريلي شال البيبي سميناه و وداه المقبرة غسلة المطوع و صلوا عليه و دفنوه و طاح المطر حزتها
و سوا لي تنظيف للرحم
و رجعت البيت ولادة و نفاس لكن من دون البيبي
طير من طيور الجنة
قدر الله و ما شاء فعل
لله ما اعطى و لله ما أخذ و كل شيئ عنده بمقدار
و عرفت فايدة اضافية للرضاعة الطبيعية بانها تعدل تقوس الظهر للخلف لن الحامل يتقوس ظهرها للخلف عشان تقدر توازن جسمها و هي تشيل جنينها في بطنها و من تولد تبدأ ترضع و تميل للأمام قليلا أثناء الرضاعة الطبيعية و مع الوقت يرجع الظهر لشكله الطبيعي
و فايدة ثانية ان الرضاعة الطبيعية ترجع الرحم لحجمه الطبيعي
انا ألحين أعاني من آلام شديدة بالظهر و نفخة بالبطن
بالأخير الحياة تجارب و دروس و عبر نتعلم منها
أستقبل مشاركاتكم و نصائحكم و نقدكم البناء
الحمد لله على كل حال و الله المستعان.
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
ان شاء الله الله بيعوض بخير فديتج ..
وولدج بإذن الله طير من طيور الجنه ..
لاتحزنين تراه بيكون شفيع لكم يوم القيامه ان شاء الله ..
والله يكون بعونج ..
والله يهدي زوجج ..
والسموحه منج ..
__________________________________________________ __________
>>>> الرد الثاني :
رددي (( اللهم أجرني في مصيبتي وإخلف لي خيرا منها )) والإنسان في حياته ممكن يرتكب أخطاء بس يتعلم منها بإذن الله .. والله يعوضج خير يأاااارب ..
__________________________________________________ __________
>>>> الرد الثالث :
عيوني دمعت ع قصتج
طير بإذن الله يشفع لكم يوم الحساب
والحمدالله توج بعز شبابج
ان شاءلله تملين البيت بنات و اولاد
قولي الحمدالله
يمكن هالشي سبب عشان ريلج يهتدي
انا مؤمنه ايمان يقين ان كل شي ماينكتب انه يصير هي خيره من الله
و حكمتها تطلع مع الايام
الله يهون عليج و يرزقج ماتتمنينه
__________________________________________________ __________
>>>> الرد الرابع :
الله يعوضج خير ويهدي ريلج
__________________________________________________ __________
>>>> الرد الخامس :
حبيباتي
الدبه
الزوجة الباردة
عشق طاهر
مطر البلاد
أشكركم على وقفتكم الجميلة معاي
و صدق المثل اللي قال " رب أخ لك لم تلده أمك"
رد مع اقتباس
