عنوان الموضوع : نور السحاب مع اكشن الولاده وقصتي مع دانه للصحة
مقدم من طرف منتديات الضمير العربي

في البدايه السلام عليكم ورحمة الله وبركاته
بعد مرور 5 ايام على ولادتي لاحلى بنوته ربي يخليها لي ويكتبها من الصالحات يارب حبيت اني اخبركم بقصة ولادتي والي تخللها ( حلوه تخللها ) وايد من الموقف المضحكه والمبكيه ياله ما بطول عليكن نبد باسم الرحمن
انا في البدايه واعوذ بالله من كلمة انا عطوني موعد 3-5 وبعدين ومع مرور الايام استوا الموعد 1-5 ومن بداية حملي اكتشفوا فيني السكر وفقر الدم طبعا فقر الدم مقدور عليه لكن السكر اااااه وما ادراك ما السكر عله في عله مرض وتعب وحرمان وابرو ودم عزكم الله كل يوم لاذم 5 مرات فحص و5 ابر انسولين وانا طول الوقت ادعي بالاجر والعافيه وان الله يكتب لي حسنات وياجرني في تعبي

الشهر الاول كان برمضان والله لا يراوي حق مسلم التعب الي تعبته باول شهر حتى ريلي كان وايد يرحمني ويقولي اذا هذا بدايته الله يعينج على بعدين مر شهر رمظان والكل كان ينصحني اني افطر بس الحمدلله صبرة واحتسبت الاجر وما فطرة ولا يوم بس الي حز بخاطري اني ما قدرة على الست وانا الي متعوده اصومهن بس الل كان يقولي دام انج متعوده خلاص باذن ربج بيكتبهن لج

ومر الشهر الثاني والثالث والرابع والخامس على خير وما راجعت اي مستشفى حكومي بس الخاص علشان اشوف جنس البيبي واطمئن على صحته ومن عرفت انها بنت استانست لان عندي بنتين و3 اولاد وكنت حاطه براسي انها بتكون الاخيره فكنت اريدها بنت والحمدلله الله عطاني الي اريده

ووصلنا للمرحله الاخيره وهي من 7 الى التاسع وهني عاد بدات معانات السكر ادري بعضكم بيقول اني ابالغ لكن الله الشاهد اني هلكت ها السكر يوم ويرتفع ويوم ينزل مرات يوصل فوق 300 ومرات تحت ال60 كرهت الاكل والسكر والحمال استغفر الله بس كنت دائما احتسب الاجر وكان الي يشوفني بال7 يعتقد اني بربي من شكلي والتعب الي باين علي
ووكنت اعد الايام من دخلت الثامن لانه ياني الطلق اتصدقون من الثامن ياني الطلق كل ليله يعذبني وبالنهار كنت لاذم اشغل نفسي بي علشان تمر الايام بسرعه وببداية التاسع استانست خلاص بربي وكنت بتجمع بنات العين ووايد استفدة من خوتي جزاهم الله خير مع اني مب بجر بس الوقت كان يمضي معاهم واحنا نسولف طبعا ما اريد اذكر اسامي بس اول وحده فتحت ها التجمع ميميه وبعدها اظن ام حمدان جزاهم الله خير وبصراحه ما حسينا بالوقت واحنا نشتكي لبعض ونسولف

المهم دخلة التاسع واليوم السابع من التاسع كانت ملجت بنت اختي واخوي وقبل لا اروح الملجه شفت الله يعزكم دم في البدايه خفت بس بعدين حسيت ان لا بعدني بس بالملجه كنت وايد تعبانه وحاسه اني خلاص موصله وما بقدر اتحمل اكثر

ومر الاسبوع الثاني وانا كل يوم تعبانه وفيني طلق بس كان بارد وثجيل وكن ادعي وخذت ماء زمزم من خت ريلي الله يجزيها كل خير وقريت فيها ورد الولاده وكل يوم كنت اشرب كاس وامسح على بطني واقرء سورة مريم وحاولت اني اختم القران قبل لا اربي بس لاسف ما ختمته طبعا هذا كله بالاسبوع الثاني من التاسع وكان عندي موعد يوم الاربعاء 14-4 -2017 وبالاصح 3 مواعيد مع التثقيف الصحي والتغذيه و3 دكاتره الحمل والسكر

ووصلنا للجد فحصتني الدكتوره وكان مفتوح 2 سانتي وقالت لي ياله هانت الرحم عنج رطب وخلال ها اليومين بتربي رديت البيت وبراسي شي يقولي بتربين يعني بتربين ووصلنا للخميس 15-4 وزاد التعب فيني وها اليوم يوم عائلي يعني لاذم نتجمع في بيت اهل ريلي
بس انا ما رحت ريلي شل العيال وانا تميت بالبيت وما ادري شو ياني كنت مشتهيه روبيان وخذت لي صحن من الملاح وكلته كله وبعد ما كلته حسيت ان الطلق زاد علي استغربة قلت يمكن الروبيان يزيد الطلق وسويت سيرج بالنت ما طلع لي شي المهم طرشة البشكاره تاخذ لي زيت خروع من الصيدليه ويابته وخذت ملعقه وبعده تررررررررررررررررررررا بدا الاكشن

خلوكم معاي بالجزء الثاني ادري طفره بس بنتي قامت برضعها وبسبحها واذا في وقت بكمل القصه اليوم

خواتي لا احد يرد لين اكمل القصه

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
مبرووووووووووووك ع البنوووته ..

الحمدلله ع سلااااااامتج ..

اوووووكي الغلااا فالانتظااار نترياااا باقي القصه .. خذي راحتج .. ^_^

__________________________________________________ __________

>>>> الرد الثاني :
نترياااج الغلا خذي راحتج ..

__________________________________________________ __________

>>>> الرد الثالث :
فديتج والله الحمدلله ع سلامتج
وقرة عينج بشوف بنتج^^

__________________________________________________ __________

>>>> الرد الرابع :
بسم الله ردينا
وصلنا ليوم الخميس والي ريلي خذ العيال وساروا بيت يدتهم وانا كلت الروبيان وبعدها خذت الخروع (حشى قلب مسلسل مكسيكي ) وبعد الخروع حسيت الويع يزيد وانا مسويه عمري شاطره علشان من اروح المستشفى افتك واربي وانا مب عارفه شو يترياني

وردوا العيال ورقدنا وباليل ما غمضة عيني دقيقه وحده الويع ورا بعضه وقلت الحمدلله هذا الفرج وعلى فكره نسيت اخبركم ان بالمستشفى عطوني موعد للطلق الصناعي يوم 22 الخميس الي هو اليوم

وانا كنت خايفه من الطلق الصناعي وعلشان جذيه استانست بالام وقمت 6 الصبح ورحت برع الغرفه وانا امشي وبعدين رحت حق ريلي الساعه 8ونص وقلت له ياله قوم مب قادره اتحمل الويع وكان بين كل ويعه والثانيه اقل من 5 دقائق وقام بسرعه ودخل الحمام يتلبس ولما طلع شافني راقده من التعب طول اليل مب نايمه قالي خلاص رقدي وطلع برع الغرفه ورد على الساعه 12 الضهر رد الغرفه ولما قمت من النوم لقيت شي حار بين ريولي وكان دم وايد يعني مب شويه انا هني خفت وقالي ريلي ها اروح الصلاه والا اؤديج المستشفى قلت له لا خلى الطلق يزيد روح ويوم بترد بنروح ووصيته يدعيلي بالصلاه فديته قالي ما يحتاي توصيني وراح وهو يركض انزين ليش تركض يعني بيزيد الطلق ههههههههه بصراحه ضحكني
ولما رد كنت انا مجهزه عمري تسبحت وكشخت ونزلت الشنط واتصلة حق امي وركبت السياره وطفت على امي ومن قرادة الحض اخترب تيلفوني وانا افكر الحين اشقائيل ببشر ربيعاتي خخخخخخخ متفيجه وصلنا توام ونزلنا انا وامي من صوب قسم الولاده وراح ريلي يحجز بالخاص ودخلنا قسم الولاده وخذوا بياناتي
ونزلوني على السرير عاد هني الوعه بعد الفحص مبطلين عيونا انا وامي ها كم قالت 2 سانتي امي ما سمعتها عدل واقول حمدالله 4 وانا فيني صيحه واقول لا مب 4 2 بس امي ضاقت فيها الدنيا كل ها الالم و2 وكان كلام النيرس نفس كلام الدكتوره قالت بس النفس طريه وبتفتح بسرعه وين بتفتح بسرعه وها الكلام من امس وعلى فكره كان الدم بعد ينزل مني وايد وخلوني بغرفة الولاده لين الساعه 5 العصر وهو نفس الشي 2 سانتي عاد انا قعدة احلل وعرفة ان ها الويع والدم كله من الخروع والا النفس مب طايعه تفتح ابد

بعدها ودوني طلعوني بغرفه بروحي ويوا خواتي عندي واتصلة بالدريول وخليته ايب كل الاغراض علشان اكون مستعده والويع مثل العاده كله راح وراحوا خواتي عني وتميت انا وامي وطبعا النفسيه داووووووون لا شي ويع ولا ولاده والنفس مب فاتحه وعلى فكره بنتي كانت معاي وراحت مع خواتي وهني خلصت الجمعه ورقدة على الساعه 12 وطبعا ما في رقاد من التفكير هل ياترا بربي باجر او لا

__________________________________________________ __________

>>>> الرد الخامس :
مبروووووووووك ماياج فديتج